Press "Enter" to skip to content

Mindat Khuachung Ah Ralhrang Nih Meithal Le Bomb Puah Thlorh In An Puah

Mindat khua, Bawathit(ဘဝသစ်) sang khua hrialnak lam ah nihin February 7 zaan suimilam 8:00 hrawng ah ralhrang pawl motor le cycle in an kal i meithal duh thlorh in an puah pah thluahmah, tiah theih a si. Mindat khua mi pakhat nih cun, “Tuzan suimilam 8:00 hrawng ah Bawathit sang ah meithal thawng minute 15 chung a pehpeh in kan theih. Cu hnu ah tlawmpal an dai i Mindat in meng 10 aa hlatnak hmun ah hriamngan thawng kan theih ṭhan, meithal thawng zong aa tel. Suimilam 8:45pm tiang hriamthil puah thawng kan theih,” tiah a chim.

A luancia ni 10 hrawng ah Matupi in Mindat lei ah a kal mi ralhrang motor 80 hrawng cu nihin tiang Mindat khua an phan kho rih lo, an lamthluan ah CDF-Mindat nih an rak kah peng hna i, a thi mi an tam, tiah CDF-Mindat nih thawng an rak thanh. Nizan zong ah Mindat peng le Magwe peng ri chung ah ralhrang nih rallam sial an i tim, tiah mipi vengtu ralkap nih thawngpang an theih caah mizapi khual tlawng rih lo ding in ralrin peknak cathanh an chuah.

Sagaing ramṭhen, Yeoo peng, Taungpyinngae khua pawng ah mipi vengtu ralkap le ralhrang kar kahdohnak um lo nain ralhrang nih nihinh chung pehzulh in helicopter hmang in bomb an thlak hnu ah ralhrang tampi a chiah hna, tiah khua mi nih Yangon Khat Thit Media ah an chim. “kahdohnak cu a um lo nain nizan zanlei zong ah helicopter a rak zuang i bomb a thlak. Bomb hi voi Voi nga hrawng an thlak i cu hnu ah helicopter dang pakhat a rak zuang i ralhrang pawl a rak chiah hna. Taungpyinngae khua pawng um mi khua vialte zong an zaam dih cang. Zei ruangah atu bantuk hin an tuah zong fiangin kan thei kho lo,” tiah khua mi pakhat nih cun a chim.

February 6 zingka suimilam 11:45 zong ah Yeoo peng, Taungpyinngae khua, Aungyetwin khua le Paluzawa(ပလူဇာဝ) khua pawng hrawng ah helicopter in M-35 an thlakhnawh hna, tiah theih a si. Helicopters in ralhrang pawl an rak chiahnak hmun cu Minkin, Kani, Yeoo, le Depaewin peng pawl aa tonnak hmun a si. Ralhrang pawl a chiatu Helicopters hi paruk an si, tiah khua mi hna nih cun an chim. Helicopters in an rak chiah mi hna ralhrang hi 70 hrawng an si i nizan zanlei ah Taungpyinngae khua cu an luhhnawh hna i, inn zeimawzat an hrawh hnu ah phungki sianginn ah umhmun an khuar, mipi cheukhat zong an tlaih hna i an hrem hna, tiah theih a si.

Be First to Comment

Leave a Reply

Your email address will not be published.