Minung 12 a thattu SAC ralkap phu hna cu
Sagaing ramṭhen, Yinmapin (ယင်းမာပင်) peng ah minung 12 a thattu SAC ralkap phu hna cu nihin March 11 zinglei ah bomb lung 12 in doh an ton caah SAC ralkap 30 leng an thi, tiah Chindwin Yoma (ချင်းတွင်းရိုးမ) ṭangrual phufonh nih cathanh an chuah. A luancia March 8 ah Yinmapin (ယင်းမာပင်) peng, Latpandaw (လက်ပန်တော) khua minung 12 meikhangh in a thattu SAC ralkap phu hna cu nihin March 11,
zinglei suimilam 8:46 hrawng ah Yinmapin(ယင်းမာပင်) peng Myautnung(မျောက်နုံး) khua lei an kal i, Gyaujya(ကျွဲကျ) khuapawng Bu Tu Rein bomb khor chung an phanh ah bomb lung 12 puahhnawh an tong i cuka hmun ah cun SAC ralkap phu minung 32 cu an thi colh, tiah Chindwin Yoma (ချင်းတွင်းရိုးမ) ṭangrual phufonh in Bu Tu Rein battalion nih cathanh an chuah.
Cun nizaan March 10, zinglei ah Yinmapin (ယင်းမာပင်) peng Ooboe(အိုးဘို) khuapawng ah SAC ralkap phu hna cu mizapi vengtu ralkap phufonh nih bomb an puahhnawh hna caah SAC ralkap chungtel minung 5 cu an thi lai, tiah Yinmapin (ယင်းမာပင်) PDF nih cathanh an chuah. A cung I kan langhter cang bantuk in a luancia March thla ni 8 ah khan nawlngeihnak latu SAC ralkap hna nih Yinmapin (ယင်းမာပင်) peng, Latpandaw(လက်ပန်တော) khua mi 12 cu meikhangh in an rak thah hna. The Chin Post
Russia nih Ukraine a tuk ruangah harnak phunkip tong in Ukraine ramchung in a chuak kho lo mi Pakistan siangngakchia nu pakhat cu India cozah nih a chanhchuah i a rauh hlan ah a chungkhar sin a phan cang lai, tiah theih a si.
Pakistan siangngakchia nu Asma Shafique nih cun, “Atu bantuk in harnak chung in nan ka bawmh caah kai lawm tuk,” tiah Ukraine ram khualipi kyiv khuapi um India Embassy sin ah lunglawmhnak a chim pinah India Prime Minister Modi cung zong ah lunglawmhnak a chim. “India Embassy bawmhnak thawng in a rauh hlan ah ka chungkhar sin dam tein ka phan ko lai,” tiah a chim chap.
India nih hin Bangladesh ram mi pakhat zong Ukraine ram in an chuahpi cang pinah atu zong Nepal ram mi 8 an chanhchuah cang, hna tiah theih a si. Ukraine ram ah um mi India Sianghngakchia 18,000 tluk cu India cozah nih Ukraine in a laak khawh cang hna, tiah theih a si. Credit: The Chin Post
