Miphun A Damnak Caah Na Nunnak Le Thisen Na Pek, Upatnak Sangbik Kan In Pek

A Nation Chose You! Ram nih an thim. Miphun nih an auh. Luatnak ca ah thisen an hal i na pek. Credit: Lengkawite,, relchap; Zeiruangah SAC Nih Martial Law An Chuah? Zeinihdah A Zulh Lai? Jan 31 i National Defense and Security Council Meeting ah MAH nih ripawt a pekmi cu ramchung dihlak peng 330 an um i cu chungah za ah za a daimi peng 198, runvennak tha deuh in tuah a herhmi peng 67 le biatak tein runvennak tuah a herhmi peng 65 an um ti a si.

Cu nih cun SAC nih rampi an hruai kho lo ti kha a langhter. Pohmah 425 hmangin State Emergency thlaruk an chapmi nih SAC nih ram an hruai khawh ti lonak a fianter chinchin. MAH nih za ah za a daimi peng 198 an si a ti i hi chungah UWSA ukmi peng 4 le NDAA ukmi peng 2 an i tel caah SAC nih an uk khawhmi cu peng 192 lawng a si tinak a si.

Peng dang ah zan chuah khamnak nawl an chuahmi atu tiang an leet than rih lo. Rangoon khuapi chung i peng 6 ah Martial Law an rak thanh i cucu atu tiang an leet than kho rih fawn lo.

Kan hnulei deuh ah SAC chimnak nawlngeitu Ralbawi Zaw Min Thun nih Kaya le Chin ramkulh cu kan uk khawh cang tiah a chim nain cu hnu tlawmpal Feb 2 ah Kaya ramkulh peng 4, Chin ramkulh peng 7 telh in peng 37 cu Martial Law an thanh than. SAC nih Kaya le Chin ramkulh cu a uk kho lo ti a lang.

Sagaing ramthen chung i hriamtlai hna cu thlaruk chungah kan hloh dih hna lai tiah SAC nih a rak i hrocer len nain kum 2 tiangah zei huaha an tuah kho lo. Cucaah peng 37 ah Martial Law an thanhnak a si. Cu peng hna cu Regional Military Commander nih dairek in a uk lai i peng pakhat ah ralkap biaceihzung an chiah dih lai. Cu biaceihzung nih cun fawi tein sualphawt dantatnak caah biakhiahnak an tuah khawh lai. Thihdan tiang zong an pek khawh lai.

Cucaah thiamsang hna nih cun Regional Commander le ralkap biaceihzung kha mithahnak laisen pek bantuk a si tiah an chimnak a si.

Cun NUG/PDF/CDF hna hi biatak tein a nam hna lai i EAOs pawl tu hi a daithlanh deuh rih hna lai tiah an zumh. Hrial awk a that lo tuk lawngah EAOs cu a kah hna lai ti a si. Kum hmasa nakin cunglei kahdohnak a zual lai ti hi ramchung ramleng in Myanmar kong ngiathlaitu hna nih an zumhmi a si. Thih lai ke chaih bantuk a si lai ti a si.

SAC mipi tham cu a hrannak in kan nam hna lai i an dai te ko lai tiah an rak ruah, asinain an ruah bantukin a si ti lo caah hran chinchin an i tim.

Asinain SAC ralkap hi nikhat hnu nikhat an tlawm chin lengmang i an thazang le an thinlung zong a zor chin lengmang. Tlangcung le khuate lei lawng ralhmai a si ti lo. Rangoon, Mandalay le Naypyidaw tiangin ralhmai an si cang. Khuadang cu um rih seh Naypyidaw koko hmanh ah ralbawi hna le an chungkhar hna cu lengah an chuak ngam ti lo.

Catialtu pakhat lenbang nih cun Suh Kyi lawng thong a tla lo, SAC ralbawi vialte thongtla an si ve ko, a ruang cu an inn in an chuak ngam ti lo tiah a tial.

Hmunkip ah SAC dohtu mipi ralkap an um dih. Cutikah SAC hi ralkap thazang an i deih lo tuk cang. Kum 2015 lio i Kokang Operation bantuk khan hmun pakhat ah thazang tampi fonh in kahdohnak an tuah kho ti lo. Atu ahhin battalion 3/4 fonh lawngin kahdohnak an tuah khawh i cu hmanh cu hmunkip ah an tuah kho lo. Cutluk cun SAC ralkap thazang an i deih lo.

Kum 1948 ah ramchung ral a rak tho i U Nu cozah kha a rak sung dengmang. Hmun tampi cu hriamtlai hna nih an uk i cozah hmunpi Rangoon lawng a rak taang, cucaah Rangoon cozah ti tiangin an rak auh phah.

Kha lioah tlangcungmi chungin Karen, Karenni le Mon lawng ral an tho. Kawl mi chungin CPB, Alanni le pyithuhyebaw hna lawng ral an tho. U Nu cozah lei ah Communist a duh lotu phah-sah-pah-lah, pyituhyebaw cheukhat le mipi tampi an rak dir. Cu bu cun U Nu cozah kha a rak sung dengmang.

Nihin ah cun SAC lei ah a dirmi cu mitlawmte lawng an si. Rammi dihlak za ah sawmkua cu dohthlennak ralkap lei ah an dir. Cu lawng si loin Kawl mi chungin dohthlennak a tuahtu tampi an chuak. Tlangcung hriamtlaibu a tam deuh nih SAC an doh fawn.

Cun PDF/CDF pawl an thawnnak le hriamnam an hmuh khawhnak cu mipi nih an bawmh hna caah a si i ti hi SAC nih an theih tuk. NUG nih siseh hriamtlaibu dangdang hna nih siseh tangka tampi a lutmi zong hi SAC nih a si khawh chungin kham an i zuammi a si.

PDF/CDF hna lawng si loin anmah a bawmtu mi sawhsawh hna tiangin ralhrang upadi hmangin fak piin dantat ding an i tim. Cucaah February thla thok khan “အကြမ်းဖက်အဖွဲ့အစည်းများအား ထောက်ပံ့ခြင်းသည် ဥပ‌ဒေအရ အရေးယူခံရနိုင်သည်။ (CCCT – အကြမ်းဖက်မှု တိုက်ဖျက်ရေးဗဟိုအဖွဲ့)” timi ca cu phone kip ah an kuat cang hna.

Hi nih a chuahpi khawhmi cu tangka a ngei deuhmi hna paoh palik, asiloah SAC ralbawi hna nih hriamtlaibu nan bawmh hna tiin a dik loin sualpuh i tangka tampi hal, tlaihkhih le thongtlak tiang a um kho. Atu ah Bank in tangka kuat/chuah tikah ting zakhat cung a kai ahcun ngiathlai le hlathlai an timh cang hna.

Cun tha deuh in runvennak tuah a herhmi peng 67 le biatak tein runvennak tuah a herhmi peng 65 an um ti a si i a dihlak fonh ah peng 132 a si. Cu chungah peng 37 lawng Martial Law an thanh rih i a taangmi peng dang hna hi an thanh chap te lai tiah zumh a si.

Mi tampi nih Martial Law a thanh zongah zei aa hlei lai lo, a thanh lo zongah a thanh zongah aa khat ko tiah an chim tawn. Cucu a dik lo tiah ka ruah. SAC nih fak deuh tuah an duhmi a um caah Martial Law hi an thanhnak a si. Cucaah a zeilei paoh ah ralring chinchin in biachim, holhrel le tlonlen i zuam kha a tha bik ko. Bawipa nih a rauh hlan ah teinak kan pe ko seh. Crd; Salai CP Lian