Press "Enter" to skip to content

Mipi Hriamtlai Hna Le SAC Ralkap Kahdohnak Ah SAC Minung 7 Hrawng An Thi

Karenni ramkulh, Loikaw peng chung ah SAC ralkap le Loikaw PDF/KNDF phufonh hna cu March 11 le 14 ah an i kap i, SAC ralkap lei in minung 7 hrawng an thi. Loikaw PDF pakhat cu kahdohnak ah a nunnak a liam, tiah theih a si.

Nihin March 14 zinglei Sml 8:00 hrawng ah SAC ralkap hna nih Kayan Tharyar( ကယန်းသာယာ) in Htiri( ထီရိ ) khua lei ah hriamngan pehzulh in an kah i rallam an sial. Loikaw-PDF le KNDF phufonh hna he hmaitonh kahdohnak a chuak i, Loikaw PDF ralkap Myo Aung (B) cu a nunnak a liam, tiah PDF – Loikaw sin in theih a si.

March 11 zong ah khan Lin Phung Lay lam pial um SAC ralkap hna cu Loikaw PDF le KNDF nih an rak kah hna. Cu kahdohnak cu zinglei Sml 10:00 in chun Sml 12 : 00 tiang a rau i SAC ralkap minung 7 an thi, an ruak cu mawṭaw in an phorh lio kan hmuh, tiah Loikaw PDF nih cathanh an chuah.

Nihin March14 zinglei Sml 1:15 hrawng ah SAC ralkap hna nih ralzaam mipi hna an umnak Loikaw khuapi, Daw Se khuachung cu hriamngan in an kah hna ruangah inn cheukhat cu an rawk i, khua mi cheukhat hna cu hliam an tuar, tiah KNDF Battalion 9 nih cathanh an chuah. The Chin Post

Mizoram um mi Youth For Myanmar (YFM) hruainak in Myanmar ralzaam hna bawmhnak ca ah a voihnihnak thilzuarnak cu March 18-19 ah Aizawl khuapi Millennium Center hmai ah nihnih chung an tuah rih lai. Tutan Thilzuarnak ah cun Chin hlasakthiam Guys from Chin(P. Thawng Bawi, David Lai le Benjamin Sum) le Thun Kham pin ah hlasakthiam dang tampi hna zong an i tel lai i Concert tuah pah a si lai, tiah YFM rianngei pakhat nih a chim.

“Myanmar tirawl pawl kan zuar pinah Charity Concert zong kan tuah pah lai, Guys from chin zong kan sawm hna pinah hlasakthiam dang tampi le Thun Kham zong kan sawm hna. Kan hmuh mi phaisa dihlak cu ral ruangah hartong mizapi hna ca ah a herh ning in hman a si lai,” tiah ṭuanvo ngeitu pakhat nih a chim.

Youth For Myanmar(YFM) nih February 22 (222222) lio ah a voikhatnak thilziarnak cu an rak tuah cang i an hmuh mi phaisa vialte cu Mizoram ralzaam camp i ai dor mi hna sin ah bawmhnak an rak pek.

“A voikhatnak i kan hmuh mi phaisa cu Lawngtlai District chung um mi ralzaam camp 2 kan va bawmh hna. Eidin le Muka (Cungkhuh) a herh mi Sairang, Sihhmui i um mi ralzam hna zong kan va bawmh rih hna,” tiah YFM rianngeitu pakhat nih a chim.

March 18-19 i tuah ding mi thilzuarnak ahcun Myanmar tirawl- Shan Khohsuai, Mungh letkoh: Watta Dohtthu: Mala Shan kaw, Matupi Chin tirawl, Sabuti, Tinbaw ti ṭhawng, Thumungh, Ciazan hinkha, Akyaw sung, Kyatta Danpoh, le Letphet tauh pinah Myanmar tirawl phuntling hna zuar a si lai. The Chin Post

Be First to Comment

Leave a Reply

Your email address will not be published.