Mipi Hriamtlai Hna Nih SAC Ralkap Sakhan An Kah
Sagaing ramtthen, Khin U peng SAC ralkap sakhan tel in PyoThaung(ပျဉ်ထောင်) le Ma Daung Hla(မဒေါင်းလှ) SAC sakhan hna cu April 13(pre-thingyan day) ah mipi vengtu ralkap phufonh nih an kah hna tiah theih a si. Nizaan (April 14) chun Sml 12 tluk in zaan Sml 7 tiang pyosawtee pawl an umnak Pyo Thaung khua cu Daung Sitte(ဒေါင်းစစ်သည်), Khin U Support Organization(KSO) phu le tangrual phu 8 i bawm in an doh hna.
Drone in pyosawtee pawl an umnak ah bomb an thlah i hliam tuar mi an tam i mipi vengtu ralkap phufonh hna cu hliam tuar um lo tein hnu an tolh kho than tiah Khin U peng thawngzamhnak nih a thanh. Nizaan , thawng kan theih ning ah pyosawtee ruak 6 kan hmuh i Pyo Thaung khua mi Pyusawtee hruaitu fanu zong hliam tuar tiah a pawng kam ummi sin in theih a si.
April 14 chunhnu ah Khin U palik sakhan cu Royal Guerrilla Force nih Drone in an kah i SAC ralkap 3 an thi. Zaan lei sang ah Khin U thlan ah an ruak cu an khangh hna tiah mithmutu nih an chim. Nizaan Chunhnu ah cun pyosawtee pawl an umnak, Ma Daung Hla khua cu mipi vengtu phufonh nih an va doh i a thi mi fiang in theih a si lo nain PDF pawl an kir lei ah SAC ralkap nih an hnu lei in an kah hna caah LPDF khua mipi vengtu ralkap 2 an nunnak a liam tiah Khin U peng thawngzamhnak nih a langhter. The Chin Post
Relchap; April 14 zaan ah thli le ruah a fah ruang ah Shan ramkulh thlanglei Maukme(မောက်မယ်) peng Kadugyi(ကဒူးကြီး) hmunhma ah ummi ralzaam camp a rawk tiah rian ngei tu pakhat sin in theih a si. Hi ralzaam camp ah cun chungkhar 40 fai le minung 100 tluk an i dor i chikhat caan caah phungki sianginn ah an i thial chung tiah Pa-O National Liberation Organization/ Army (PNLO/PNLA) health department in Bohmu Khun Myint Aung(ဗိုလ်မှူးခွန်မင့်အောင်) nih a chim.
Ruah cu zaanlei Sml 3:30 in Sml 5:30 tiang, Sml 2:00 chung fak ngai in sur i rial a tlak pin ah thli a hrang tuk tiah ralzaam hna sin in theih a si. Cu hmunhma cu NLO control Land pakhat a si i Loikaw hmunhma ah a ummi SAC ralkap nih rallam an sial caah a tu ban tuk in mipi an rak zaam nak hi a si.
Ralzaam an i dornak chungkhuh(muka) a tam deuh cu thli le ruah ruang ah an rawk caah cawk than ding le sakhan sak than ding hi a fawi lo tiah theih a si. Ralzaam camp sak than kawh nak ding caah bawmhnak pek a duh mi hna nih PNLO zong ah pehtlaih khawh a si tiah theih a si. Credit; The Chin post
