Mipi Hriamtlai Min Aung Hlaing Sakhan An Kah i Ralhrang Zong Tam Tuk An Thi
Magwe ramṭhen, Myiang Peng, Bahin khua um Palik sakhan cu PDF hna nih March 28 ah luhhnawh in an kah hna caah SAC ralkap 9 hrawng an thi i, SAC ralkap nih cunglei in an kah ve hna, tiah theih a si. March 28 zinglei Sml 11:45 hrawng in kahdohnak cu aa thok i zanlei Sml 4:00 tiang Magwe ramthen,
Myiang peng Bahin khua um palik sakhan cu Myaing Villages Revolution Front ( MVRF ), PRA, Kyua Thit Nat, Pale (Pah – Kah – Phah), PPDG Tiger hna i bawm in an kah. SAC ralkap lei nih Jet Fighter pakhat in, cunglei in an vun kah ve hna caah mizapi vengtu ralkap hna cu hnu an tolh ṭhan. SAC ralkap 9 an thi i PDF 2 hliam an tuar, tiah theih a si.
Yesakyao Ah SAC Ralkap Bomb Puah An Tong I Minung 3 An Thi : Magwe ramṭhen, Yesakyao (ရေစကြို) pengchung ah SAC ralkap motor cu bomb puah an ton caah SAC ralkap 3 cu an thi colh, tiah theih a si. Nihin March 29 zinglei suimilam 11:00 hrawng ah Yesakyao (ရေစကြို) peng, Sinchawng(ဆင်ချောင်း) khua le Zikung(ဇီးကုန်း) khua kar ah SAC ralkap motor 2 cu bomb lunghnih puah an si, tiah Yesakyao-PDF nih cathanh an chuah.
SAC ralkap motor 2 chung ah pakhat cu a rawk i, minung 3 an thih leng ah cheukhat cu faak ngai in hliamhma an tuar, tiah theih a si. Hliamh a tong lo mi SAC ralkap hna nih hriamngan he an kan kah nain, mizapi vengtu ralkap lei hliamhma tuar an um lo, tiah theih a si. The Chin Post
Myawady, Tebawbu Khua Pawng Kahdohnak Ah SAC Ralkap 13 An Thi: Kayin ramkulh Myawady peng, Myawady-Wawlay lampi ah a ummi Tebawbuu (သေ့ဘောဘိုး) khua pawng ah rallam a sialtu SAC ralkap le KNLA phufonh hna cu nihin March 28 chunhnu ah faak ngai in an i kap, tiah theih a si. Cu kahdohnak ah cun SAC ralkap lei 13 an thi, tiah KNLA phufonh in Mwayhauth (မြွေဟောက်) nih cathanh an chuah.
Nihin March 28, chunhnu suimilam 3:00 in zaanlei suimilam 6:00 hrawng tiang kahdohnak a chuak i KNLA lei nih hin kahdohnak ah Sniper an hman, tiah theih a si. KNLA phufonh in hliamtuar an um lo, tiah Mwayhauth(မြွေဟောက်) nih cun an langhter. Kahdohnak ah SAC ralkap lei nih raltuknak motor 2 an hman ve, tiah theih a si.
Sagaing ramṭhen, Myaung(မြောင်) peng ah CDM siangcachimtu hna hruainak in sianginn on a si cang i tualchung mipi vengtu ralkap hna zong nih ca ṭha tein cawn a si khawh nakhnga zong an dirkamh hna, tiah Education lei rianngeitu hna nih an chim. Atu hi Myaung peng chung um mi CDM siangcachimtu pawl le volunteer pawl i bawm in sianginn pawl on khawh nak ding an i zuam cuahmah i khua 30 deng ah sianginn an on khawh cang, tiah theih a si.
Sianginn on khawhnak ding a tawlreltu pakhat nih cun, “A herh mi zong Myaung mipi vengtu ralkap he kan cawk i kan sersiam dih cang. Khua he aa tlak ning in KG, Primary School, Middle School, High School tiin kan on lai,” tiah a chim. Sianginn ah hin catang kainak exam siloin thla fatin test tuah a si lai i school committee zong ser a si.
Tualchung mipi vengtu ralkap nih security a laak fawn lai. Cun, dohthlennak a dih i, phung ning tein NUG nih sianginn a on tik ah kum le catang aa tlak lo deuh mi hna cu committee nih a tuaktan ṭhan te lai. Myaung Education Network nih Education he pehtlai in rian an ṭuannak hi ni 25 chung a si cang i, atu tiang ah:- Sianginn 17,
Siangngakchia 3053, KG kai lio 739, Primary kai lio 1113, Middle kai lio 958, High school ngakchia 243 nih Myaung Education Network an rak pehtlaih, tiah theih a si. Khuate zong ah sianginn ṭha te i ong in ca kan chimh hna lai, tiah Myaung Education Network nih thawng an thanh.
