Mipi Hriamtlai Nih Ralhrang Tampi An Thah Than Hna
Sagaing ramṭhen, Myaung (မြောင်) peng le ChawngOo peng chung ah minebomb thianhhliamhnak a tuahtu ralhrang phu hna cu mine puahhnawh an ton caah ralhrang phu minung 6 an thi, tiah mizapi vengtu ralkap phu lei nih an chim. February 3, zanlei sang caankhat lo ah hmunhnih in ralhrang phu hna cu mine puahhnawh in doh an ton caah a thi mi an um leng ah hliamtuar zong an tam, tiah theih a si.
Black Eagle Defence Force-MMU in chimphuannak nawlngeitu Bu Tung Sae(ဗိုလ်သုံးဆယ်) nih, “February 3, zanlei suimilam 4:25 ah ChawngOo lei in mine thianhhliamhnak tuah a timtu ralhrang phu minung 25 cu Yepusa(ရေပိုးစား) lampial ah mine puahhnawh in doh an tong.
Cuka hmun ah cun ralhrang phu minung 6 an thi, cun, zanlei suimilam 4:50 hrawng ah Myaung(မြောင်) sakhan lei ah ke in a kal mi ralhrang phu minung thazaang 50 hrawng le mine thianhhliamhnak tuah ding in a kalmi ralhrang phu hna cu Myaung (မြောင်) lamṭhennak ah mine puahhnawh in doh ṭhan an si,” tiah a chim.
Ralhrang lei a thi mi hna le hliamtuar mi hna cu mizaw phortu motor nih a thiar hna, tiah a chim chap. Myaung lam ṭhennak hmun kahdohnak ah Kinpungwat(ကင်းပုန်းဝပ်) um mi ralhrang phu hna nih hriamngan le hriamhme hmang in an duhnak hmunpoh ngol lo in an kah caah minung pakhat nih a ke ah hliam a tuar, tiah theih a si.
Cu kahdohnak ah cun Black Eagle Defence Force – MMU, Myinmu(မြင်းမူ) mizapi ralkap, People’s Defence Force Myinmu-MMU, Myaung (မြောင်) peng mizapi vengtu ralkap CDSOM; an dihlak phuli fonh nih tuahmi a si, tiah theih a si.
Credit: The Chin Post
