Press "Enter" to skip to content

Mipi Hriamtlai Nih SAC Ralhrang Minung 13 Hrawng An Thah Tthan Hna

Mandalay in Sagaing lei ah nizaan April 21 ah thazaang chap in rallam a samh mi SAC ralkap motor le palik motor hna cu nihin April 22 zinglei ah kahdoh an si i SAC ralkap 13 an thi, tiah tualchung mipi vengtu ralkap nih an thanh. April 22 zing Sml 10:00 Mandalay-Monywa lam, Monywa in Minmu lei kalnak Koipintaw(ဂွေးပင်တော) khua le

Bo Mingyi Kin (ဘိုးမင်းကြီးကင်း) kar ah motor pahnih in a kal mi SAC ralkap 20 hrawng cu Myaung-PDF le CDSOM nih bomb an puah hnawh hna, tiah theih a si. Bomb lungli aa thuanh mi bomb in puah an si i, motor hmailei le a sirlei a rawk. SAC ralkap 8 an thi i, a dang 15 cu an zaam. Cu hnu ah Bomb lung 11 in puahhnawh an si ṭhan i SAC ralkap a thi mi an tam ngai ngai, tiah Myaung- PDF le CDSOM nih thawng an thanh.

Cun, April 22 zing Sml 11:00 ah Sagiang in Monywa lei ah a kal mi palik motor 24 aa zul mi cu Minmu peng, Wonpyae(ဝမ်းပြည့်) le Allakappa(အလ္လကပ္ပ) khua karlak ah bomb puah hnawh an si i motor pakhat a rawh lengah palik 5 an thi, tiah DK PDF-MUU nih thawng an thanh. Minmu peng kahdohnak ah hin Minmu khuapi ah dirh mi DK PDF-MUU, Blak Eagle Defense Force MUU, CDSOM (Myaung), PAFD le ṭangrual phunga i bawn in an kah hna, tiah theih a si. Crd; The Chin Post

Relchap; SAC nih uknak an lak hnu kumkhat reng lo chung ah SAC Ralkap kut in minung 1,673 an nunnak a liam cang i, cu chung ah nu le ngakchia 290 an i tel, tiah NUG Ministry of Women, Youths and Children Affairs nih a thanh. Uknak lak hnu in April 11 tiang ah nu 156 le ngakchia 133 an nunnak a liam cang i, SAC ralkap kut in a nunnak a liam mi dihlak chung ah zatuak in 17 (17%) a si. SAC ralkap kut in a nunnak a liam mi chung ah hin mino a tam cem an si.

A nunnak a liam mi an tam cemnak hmun hi Sagain ramṭhen ah a si i, Chin ramkulh le Kaya ramkulh chung zong ah a nunnak a liam mi an tam ngai, tiah nuhrin covo lei a cawlcangtu phu hna nih an chim. SAC in chimphuannak nawlngei Zaw Min Thun nih cun NUG nih a thanh mi cazin hi a dik mi a si lo, anmah duh poh in an thanh mi a si, tiah a chim ve.

Relchap; Rakhine ramkulh Muangtaw khuapi ah ‘Arakan Army ralkap he an i pehtlai’ tiah lunghrinh in tlaih a tong mi pahnih cu April 21 ah Muangtaw pengkomh SAC biaceihzung ah kum 10 thong thlak ding in nawl an chuah, tiah an chim. Muangtaw khuapi ah Ko Ngi Ngi Niang le Muangtaw peng Ngwe Tuang khua mi U Aung Hla Ting hna cu phunrelnak 50 (အကြမ်းဖက်မှု တိုက်ဖျက်ရေးဥပဒေပုဒ်မ- 50) in dantatnak pek an si, tiah Ko Ngi Ngi Niang Sihni U Oo Khin Win nih a chim.

Atu hi anmah pahnih cu Bo Thi Tuang thonginn ah an chiah hna tiah a chim chap. Ko Ngi Ngi Niang cu a luancia March 2020 chung ah Muangtaw – Bo Thi Tuang mawṭaw lampi ah bomb a hmanh, tiah lunghrinh in tlaih mi a si. A phone cu SAC ralkap nih an checkpiak i amah he hmunkhat ah U Aung Hla Ting zong, AA meithal tlaih mi hna he hman ai thlak mi an hmuh caah tazacuai ve a si.

Ko Ngi Ngi Niang(ညီညီနိုင်) i a Upa Ko Ko Niang (ကိုကိုနိုင်) nih cun ka naupa hi AA he pehtlaihnak a ngeih lo caah biaceihzung nih nawl an chuah mi cu ka cohlang kho lo, tiah a chim. “Ka naupa cu sui sernak ah rian a ṭuan i a chungkhar a zohkhenh hna. AA ralkap chungtel zong a si lo. Hmantlak an hmuh mi zong hi Photoshop in anmah tuah chom mi a si kho ko.

Atu bantuk in nawl an chuah mi cu kan cohlang kho hrim lo, biaceihzung sang deuh ah( အယူခံ) court zong kan ong ti lai lo. Zeihmanh zong a hlei ti lai lo,” tiah a chim. Rakhine ramkulh ah SAC ralkap le AA kahdohnak pehtlai in tlaih a tong mi minung 100 leng cu SAC ralkap nih uknak lak hnu in an thlah cang hna nain minung 20 hrawng cu atu tiang an thlah rih hna lo, tiah tualchung thawnglatu hna sin in theih a si.

Be First to Comment

Leave a Reply

Your email address will not be published.