Press "Enter" to skip to content

Mipi Humhimtu PDF Minung 12 Cu Ralhrang Nih An Tlaih Hna i An Thah Dih hna Hnu Ah An Phum Hna>>>>>

Ralkap In Mipi Humhimtu PDF 12 An Kaihmi Cu An That Thluh Ih An Phum
========================================

Sagaing ramthen Kani Myone ih PDF le ralkap doawknak ah ralkap cun PDF lam an kaih ngahmi 12 cu an nunnak zuahsak duh loin an that thluh ih ,khur pakhat ah 3 tivekin an phum. Cumi cu neta ah ruang hawl PDF pawl in an va hmufang.

July 26 ni ah doaw an si ih, ralkap lamin PDF pawl manlo lai, ralrin lo caan ah RPG bomb in an kap ciamco cu PDF lam dung an sip ih ,dungsip man lo pawl cu ralkap in an kai vivo. Hrekkhat hriam tuar ih an kaihmi a um bangin hrekhat cu hriam tuarlo lawlaw ih an kaihmi khal an um. Cupawl cu an nunnak zuahsak duh loin an that thluh.

Cumi thuhla ah Kani PDF hotu cun “Doawknak cu a sosang tuk. Kan feh rero laiah ralkap lamin RPG bomb thawn in kap ciamco ih bomb 7,8 hrawng an hmet puak. Cuvek a si tikah kan sahimnak hrang kan tlanih hrekkhat tlan man lo pawl cu an kai. Neta ah kan doawknak hmun kan zohsal cu khur pakhat ah ruang 3 tivekin an rak phum.

“Hrekkhat cu an kawngah meithal cerek ngahnak a um ih hrekkhat cu an kaih hnuah an lu rori ih an kah thatmi an tam. Hrekkhat cu nungdam in an kaih hnuah an vuak thatmi khal an um. Nungdam ih an kaihmi khal zuah loin an that thluh. Mi 9 ruang an phum ih mi 3 cu an thahnak hmunah an tanta men. Ralkap pawl in an kaih hnuah an thahmi zaten 12 an si,” tiah VOA thuthang a simthei.

July 9 le 10 khalah ralkap cun Kani myone Yin khua kiangih beunak hawl mipi lakin mi 15 an rak that zo. Kani PDF cu Kachin ralkap KIA thawn tangtlang in ralkap dotu an si ih,ralkap tam tuk an rak that zo ve. Cuvek tikah an karlak boruak a sosang ringring lai a si.

Be First to Comment

Leave a Reply

Your email address will not be published. Required fields are marked *