Mipi Le Mipi Hriamtlai ThahDing a Kal Mi Ralhrang Cu An Mah Tu An Thah Diam Hna
Monywa in a chuakmi SAC ralkap Jumper motor pakhat, SAC ralkap citmi motor pakhat le raltuknak tank pakhat cu Monywa-Mandalay lampi ChawngOo peng ah bomb lung 12 in puahhnawh an tong. April 19, zinglei suimilam 6:00 hrawngah PDF phu 4 fonh nih SAC ralkap cu bomb kan puahhnawh hna tiah Myaut peng mizapi vengtu ralkap phu in Bu TaitGa nih a chim.
” Thawng kan theih caah, zingkhua in kan bawh hna, cu ka lam ah cun suimilam 24 chung kan bawh hna, a voikhatnak ah motor 3 in an ra, ke in a rami zong an um. Hmunhnih ah bomb kan tarh, bomb kan hmanhnak hmun an phanh ah pakhat cu an hmuh caah bomb hri cu thianhhlimhnak tuah an i tim, cu liobah cun bomb kan puahhnawh hna. SAC ralkap nihcun raltuknak tank in an kan kah. Bomb puahhnawh nak in SAC ralkap 16 an thi.
Jumper motor a rawk tiah “Bu Tait Ga nih cun a chim. SAC ralkap bomb puahhnawh tu hna hi 11 Brothers Revolution Forces(Myaung), Myaung peng TGR, BNTF le Burmese Guerrilla Force-B.G.F(Myingyan) phufonh hna an si tiah theih a si. Magway ramtthen, Gangaw khuachung Sipin sangchung ah ral veng in ai chok mi palik motor cu Yaw Defense Force (YDF) nih April 19, zaan suimilam 10 hrawngah an kah i palik bawi pakhat telh in 4 an thi, minung 6 fak ngai in hliamhma an tuar, palik motor khaltu cu a zaam tiah YDF sin in theih a si.
“Si-pin sang khuabawi zung ah a si, motor he ral ven ah ai chokmi SAC kuttang um palik hna cu kahdoh an tong, palik bawi pakhat tel in 4 an thi, minung 6 hliamhma an tuar. Palik bawi cu sizung in a ruak an chuahpi kan hmuh, SAC kuttang um palik minung 4 an thi tiah fehter a si” tiin YDF in chimphuannak nawlngeitu nih Yangon Khit Thit Media ah a chim.
YDF nih motor he ralven ah ai chok mu SAC ralkap kuttang um palik hna cu an hnu lei in kan kahdoh hna, motor khaltu cu hliamh a si lo caah a motor he a zaam, cu ruangah hriamthil kan la kholo tiah YDF in chimphuannak nawlngeitu nih a chim chap. Yaw hmunhma ah YDF telh in Yaw tualchung hriamtlai phu, PDF hna le SAC ralkap kar ah nitin ti awk in kahdohnak a chuak i SAC ralkap nih thazaang tampi hmang in Gangaw peng le Gangaw khua pawnghrawng ah rallam an sial tiah theih a si.
