Mipi Ralkap Hna Nih SAC Ralkap Ceilak An Thah Hna, Minung (6) An Tlaih Hna

Shan-Karenni Ramri Ni 5 Chung Kahdohnak Ah SAC Ralkap 88 Leng An Thi, 6 Tlaih An Tong. Shan ramkulh thlanglei le Karenni ramkulh ah rallam a sialmi SAC ralkap, caan karlak Battalion Commander ṭuanmi Deputy Colonel Lin Lin Htun telh in ralkap 88 leng an thi i, 10 leng hliamhma an pu. Ralkap 6 zong an meithal he an i ap(surrender) tiah NUG runvennak zung nih an thanh.

March ni 8 lioah Shan ramkulh thlanglei le Karenni ramkulh chung ah rallam hmun 4 in a sialmi SAC ralkap pawl cu KA, KNDF, PDF hna nih an rak kah hna caah SAC ralkap 88 leng an thi tiah theih a si.

Kahdohnak cu March ni 8 in 12 tiang a chuak i, caan karlak Battalion Commander ṭuanmi Deputy Colonel Lin Lin Htun telh in ralkap 88 leng an thi i 10 leng hliamhma an pu. Cu pinah ralkap 6 nih an meithal he an i ap, tiah theih a si.

KNDF ṭangṭi phu hna nih, MA 3 zun 3, MA 1 zun 2, RPG zun 2, 60mm zun 3, Ngakyimi seh meithal zun 1, zen-kuan tampi le tangka kyats sing 5 an chuh rih hna, tiah theih a si.

March ni 11 chun suimilam 12:00 hrawng in zanlei suimilam 3:00PM tiang hrawng Pekhon peng kahdohnak lioah Khah Mah Yah 423 in Battalion Commander pa zong a thih pin ah ralkap 29 an thi, 5 cu an zen-kuan he tlaih an tong.

March ni 11 ṭhiamṭhiam Pekhon peng Lyuaipaw tlang kahdohnak ah SAC ralkap 20 an thi i, Jet Fighter le Helicopter zong in an kah hna, tiah NUG runvennak zung nih an langhter.

March ni 12 ah Pinlaung peng phungki Sianginn pakhat ah umhmun a khuarmi SAC cu sniper in kah an ton caah 6 an thi. Cu pin ah Pekhon peng Pekhon nichuahlei kahdohnak ah SAC ralkap 19 an thi i, ralkap 1 tlaih a tong. Shwesan khua kahdohnak zong ah SAC ralkap 12 an thi i 10 hliamhma an pu, tiah theih a si. The Chin Post

March ni 19 chunhnu ah Bago ramṭhen, Tayawady pengkomh Nattalin ah ti aa kholhmi nu 3 cu ti an paam caah an nunnak a liam tiah tualchung mi nih an chim.

Nunnak liammi hna hi chungkhar pakhat in an si i Nattalin khuachung Tasi sang Aungyadana lam ah khuasami Daw Mi Mi Kyaw(kum 35), a fanu Ma Yon Ta Poe(kum 13) le a tunu Ma Shwe Yi Min San(kum 15) hna an si. Ti an paamnak hmun hi Nattalin peng le Zikone peng aa tonnak Kyahkatwayone(ကြခပ်ဝါးရုံ) khua pawng Yoe tidongpi ah ti an paam tiah tualchung mi pakhat nih a chim.

“Inn khat ah a umṭimi chungkhar pakhat in hringtu a nu, a fanu le a tunu tiin minung pathum cu an i kholhnak ah ti an paam i an nunnak a liam” tiah a chim.

Ti paamnak in nunnak liammi nufarual hna cu nihin March ni 20, chunhnu suimilam 2.30PM ah Nattalin, thlan hmun ah an vui hna tiah theih a si.