Mipi Ralkap Nih Meithal Le Sniper Phun (5) An Ser Chuah, An Tha Kho Taktak Khi
MN PDF nih Sniper telh in meithal phun 5 tlamtling tein an ser khawh. 2023 January 24 — Mandalay ramṭhen, MN PDF nih Sniper telh in meithal phun 5 tiang tlamtling tein an ser khawh tiah theih a si.
An ser khawh mi methal phun hna cu Sniper, Uzi, Rifle, Carbine, Thlikthok hna an si tiah MN PDF nih an thanh.
MN PDF nih anmah kuttuah meithal, bom pawl in kahdohnak an tei tawn bantuk in peng huap kahdohnak pawl zong ah an hriam pawl hmang in kahdohnak ah an i tel tiah theih a si. The Chinland Post |
Relchap; Upadi Hngalhkauhnak; Bia halnak : Miphun pakhat le pakhat kar asiloah chung (phun) pakhat le pakhat kar ah remlonak chuahpi ding tiang khin catial hi upadi nih a khapnak a um maw?
Lehnak : British nih a kan pen hlan i an rak sermi Indian Penal Code kha Myanmar a pen hnu ah kan hman ve. Mah upadi hi kum 160 leng a si cang nain upadi tling taktak a si. Remh len hau loin chantiluan he aa tlak in a kal kho peng. (a herhnak zawn ah remh le chap a um pah) Penal Code chung ah tu na biahalnak he aa pehtlaimi a um ve.
Ahopaoh bia in maw, ca in maw, hmelchunhnak in maw, hmuh khawhmi aiawh thil in maw asiloah phundang in maw, Myanmar ram chung khua a sami aa dang mi chung (phun) pakhat le pakhat karlak ah huatnak asiloah ralchanhnak lungput ngei dingin a forhtu asiloah forh dingin aa zuamtu cu kum 2 tiang thawng thlak maw, phaisa liamter maw, a pahnih fonh zong in maw sual phawt a si lai tiah Penal Code caang 153A ah a um.
//Fianhnak : Myanmar ram chung ah khua a sami aa dang mi chung (phun) pakhat le pakhat karlak ah I ralchanhnak siseh, huatnak siseh a chuahtertu asiloah a chuahter khotu konglam pawl kha hloh dingin lungput dik lo a ngeih lo leng ah tluangtlam tein cu kong chim kha hi upadi caang ning in sual a tling lo. (I huatnak a um tawnmi kong kha daihnak chuak seh tiah lungput dik he tluangtlam tein cu huatnak kong chim cu sual a si lo tinak a si.)
Hi upadi nih aa tinhmi cu Myanmar ram chung khua a sa mi miphun pakhat le pakhar karlak, chung (phun) pakhat le pakhat karlak ah huatnak, ralchanhnak ser kha khap ding a si.
Chinram zong ah miphun dangdang khua kan sa. Cun Chinram ah chung a phunphun kan um cio hna. Tahchunhnak ah Zahau, Hlawnceu, Zathang, Zo tibantuk kan um. Chung hme deuh zong um a si rih. Hi bantuk pawl karlak ah ralchanhnak asiloah huatnak chuahter dingin ca t’ial ti bantuk kha upadi nih a khap. I hua hna seh, i ral hna seh tiah forh len asiloah forh dingin I zuam len kha upadi nih a khapmi cu a si.
Minung hi kan lungput hngalh khawh a si lo. Asinain ca kan tial tikah zei lungput dah a ngeih hnga timi ruahdamh khawh a si. Lungput dik lo in a si maw, asiloah forh phun lungput in a tialmi a si maw timi pawl ruahdamh khawh a si. Hi bantuk tete lungput dik lo ngei in chung pakhat le pakhat, miphun pakhat le pakhar karlak ah i hua dingin, I ralchanh dingin forhnak ca tete t’ial hi kum 2 tiang thawng thlak khawh a si timi kan hngalh ahcun kan i ning deuh men lai dah.
Lungput dik tein catial I zuam usih. Ralchanh dingin asiloah huatnak chuak fingin forhnak ca phunphai tial hrial usih. Credit; Salai Thawngpi
