Mipi Ralkap Nih SAC Ralhrang Minung 15 An Thah Pin Hna Ah An Motor An Khangh Chih
Sagaing ramṭhen, Tanhsae (တန့်ဆည်) peng Sing-lan(စိန်းလန်း) zung le Wayinnge-Yuatit khuapawng ah SAC ralkap le pyusawthi phufonh hna cu nizan April 2 zaan suimilam 9:00 hrawng ah mizapi vengtu ralkap hna nih voi 3 tiang bomb an puah hna. Cu bomb puahnak ah cun SAC ralkap motor pakhat a kaang i, a rawh lengah motor pakhat zong hliam a si. SAC ralkap le pyusawthi chungtel minung 15 hrawng an thi, tiah theih a si.
“Bomh kan puah a voikhatnak cu zaan suimilam 9:00 ah a si i, a voihnihnak cu suimilam 9:10 hrawng ah a si,” tiah MDF(Myanmar Defense Force)-Taza Tiger nih an chim. SAC ralkap le pyusawthi bomb a puahtu hna cu Myanmar Defense Force-Taza Tiger le Tanhsae (တန့်ဆည်)( Sheeboo battalion 10) phufonh an si. Mizapi vengtu ralkap phufonh hna cu hliamhma tuar loin hnu an tolh kho, tiah theih a si.
Shinmatawng ah SAC Ralkap Bomb Puah An Tong I Minung 3 An Thi : Nihin April 3 zinglei suimilam 10:00 hrawng ah Magwe ramṭhen, Shinmatawng (ရှင်မတောင်) tlang lei kainak lam ah motor pakhat le cycle 3 he a kal mi SAC ralkap le palik hna cu Yesakyao PDF nih bomb lunghnih in an puah hna i, minung 3 an thih lengah hliamhma tuar zong an tam, tiah Yesakyao PDF nih cathanh an chuah.
“Thawng kan theih mi a um caah lampi in SAC ralkal pawl cu kan bawh hna. Kannih cu hriam tling kan ngei lo nain thawngpang pek in a kan bawmtu an um caah kan thazaang a ṭhawng deuh. Ram hmunhma zong kan thei deuh i, kan thinlung zong a thawngdeuh, cu kan ngeih mi lungput he cun kan doh,” tiah Yesakyao PDF chungtel pakhat nih a chim. Bomb puahhnawh an si hnu ah SAC ralkap hna nih an duhnak hmun poh an kah nain Yesakyao PDF lei hliamtuar an um lo, tiah theih a si.
KNU nih an control nak Laykekaw ah rallam a sial mi SAC ralkap batallion pakhat in major rank a si mi ralbawi pakhat le ralkap pakhat cu an meithal he KNLA sin ah an i ap, tiah theih a si. KNLA sin i aa ap mi hna cu SAC ralkap khah-mah-yiah 585 batallion in Major Tin Lin Aung (ဗိုလ်မှူးတင်လင်းအောင်) le ralkap Ko Hein Min Thwe(ကိုဟိန်းမင်းထွေး) an si i, MA-1 meithal zuun 1, MA-3 methal zuun 1 le pistol zuun 1 cu Kawkareik(ကော်ဘရစ်)
KNU ralbawi captain Tapaw(တာပေါ) kut ah an pek thawng KNU nih an thanh. Khah-mah-yiah(ခမရ) 585 hi sah-kah-khah(စကခ) (13) kuttang ah a ummi batallion pakhat a si i an camp hi Tanintharyi ramṭhen Bohpin(ဘုတ်ပြင်း) peng ah a um mi a si.
Atu tan hi Laykekaw ah kahdohnak a chuah hnu thla 4 chung ah KNLA sin i SAC ralkap an i ap voikhatnak a si, tiah theih a si. SAC ralkap a ap mi hna cu KNU nih ṭha tein kan zohkhenh hna i tlaih a tong mi zong phung ning tein zohkhen an si, tiah KNU nih an thanh.CRD THE CHIN POST
.
