Mipi Ralvengtu Nih Ralhrang 20 An Thah Hna Lengah Hliam An Tam Tuk Rih
Magwe ramṭhen, Gangaw peng, Min Yua um ralhrang sakhan cu YDF le Myiang PDF nih February 10 zan Sml 7:20 ah an kah hna i ralhrang 20 an thih leng ah 18 nih hliam an tuar, tiah YDF nih cathanh an chuah. Ralhrang lei in tamlak an thi ko nain cu sakhan cu an la kho lo. YDF ralkap pakhat a nunnak a liam i, midang pakhat nih hliam a tuar caah hnu an tolh ṭhan, tiah theih a si.
February 11 ni zinglei ah ralhrang bawmtu tam lak cu Min Yua sakhan ah cun an rak phan. YDF nih a pawngkam hrawng cu an kham dih caah hliam a tuar mi ralhrang hna cu an chanh kho hna lo, tiah YDF nih an chim. Cu bantukin Karenni ramkulh ah February a zarhhnihnak chung ah ralhrang le mizapi vengtu ralkap phufonh karlak kahdohnak ah ralhrang lei ralbawi tel in ralhrang 8 an thi, tiah KNDF nih cathanh a chuah.
February 10 zing Sml 7:15 in Loikaw peng, Pha Hti Ma( ဖာတီမာ) khua pawng ah ralhrang le Karenni ralkap KA/ KNDF hna karlak ah zanlei Sml 4:30 tiang kahdohnak a chuak i ralhrang lei in 7 an thi; tam lakte nih hliam an tuar, tiah theih a si. A thi mi le aa hliam ni an tam tuk caah ralhrang nih tank hmang in an kah hna i, Pha Hti Ma( ဖာတီမာ) le Pa Ce (ပါကျဲ)khua mi minung 2 zong an thah hna lengah mipi umnak inn hna cu mei in an khanghpiak hna, tiah theih a si.
February 10 zanlei Sml 1:30 hrawng ah Phe Kone( ဖယ်ခုံ) peng, Kuang Mine (ခေါင်မိုင်) khua pawng ah a um mi ralhrang thazaang 100 leng cu Karenni ralkap nih bomb in an kah hna i ralhrang a thi mi zong an um, tiah theih a si. February 9 ahkhan Phe Kone peng, Pin Lung khua ah umhmun khuar mi ralhrang le ralhrang kuttang PNO hna cu Karenni ralkap nih an kah hna i ralhrang ralbawi pakhat a thi, tiah KNDF nih a chim.
Demoso peng zong ah kahdohnak a faak ngai i Demoso palik sakhan ah umhmun a khuar mi ralhrang phu cu Karenni mizapi vengtu ralkap phufonh nih an kah hna i ralhrang a thi mi le a hliam mi an tam, tiah tiah theih a si. February 12 le 13 ah khan Loikaw peng, Myo Paw( မြို့ပေါ်) veng le Hmung Pia(မှုံပြာ) khua tikhor pawng zong ah kahdohnak faak ngai a rak chuak i ralhrang a thi mi le aa hliam mi kong ah fiang tein kan thei kho rih lo, tiah KNDF nih a thanh.
Credit: The Chin Post
