Mipi Ralvengtu Ralkap Hna Nih Palik An Kah Hna I, Pakhat A Thi
Minkin Peng Ah Palik 2 Kah An Tong I Pakhat A Thi: Sagaing ramṭhen, Minkin peng, Tuang Twin ah March 26 zinglei Sml 7:00 hrawng ah SAC palik sakhan in khualeng ah a chuak mi Palik 2 cu Minkin mizapi vengtu ralkap nih an kah hna i palik pakhat cu a thi, tiah Tuang Twin khua mi hna nih an chim.
Cu palik 2 cu Minkin peng Tuang Twin hmunhma Monyua – Yargyi – Kalay Wah lam ah kah an si i, India lei kalnak lam pial pawng ah umhmun a khuar mi SAC palik an si, tiah theih a si. Palik 2 cu cycle pakhat in Myomah khua lei ah an kal, tiah Mizapi vengtu ralkap nih an theih i, lamtan ah rak bawh in an kah hna, tiah Minkin PDF hruaitu pakhat nih a chim.
Kah an ton ruangah palik 1 cu hliam faak a tuar i Myomah a phanh hnu ah a nunnak a liam, tiah theih a si. Minkin peng chung ah SAC ralkap le PDF phufonh hna cu atu le tu hmaitonh in kahdohnak a chuak.
SAC nih uknak an laak February 1, 2021 thok in March 20, 2022 tiang kumkhat luan chung ah Myanmar ram pumpi in kahdohnak voi 3,302 tiang a chuak cang, tiah Institude for Strategy and Policy-Myanmar ISP(Myanmar) nih March 25 ah an thanh. Cu kahdohnak ruangah cun civil mi 642 nak tlawm lo an thi cang, tiah an langhter.
A luancia February 2022 cu kahdohnak a voi tam bik a chuah thla a si i, thlakhat chung lawng ah voi 584 nak tlawn lo kahdohnak a chuak. 2021 December thla hi civil mi a tam bik an thih thla a si i, kahdohnak ruangah civil mi 128 nak tlawm lo an thi, tiah ISP Myanmar nih an chim.
SAC nih uknak an laak kumkhat fai ah ramchung ah umnak chuahtak in ralzaam dirhmun a phan mi minung 752,589 an si cang i, uknak laak hlan i a rak zaam cia mi minung 497,200 he, an dihlak ah singhra(1,000,000) leng an si cang, tiah ISP Myanmar nih an langhter. Credit; The Chin Post
