Mipi Runrengtu Ralkap Nih MAH Ralkap An Phomh Hoi Hna, Thi An Tam

Patein-Monywa Lampi Ah SAC Ralhrang Ralkap Bomb Puah Hnawh An Ton Caah A Thimi An Tam Tuk Lai! Sagaing ramthen Yinmabin peng chung Patein-Monywa kalnak motor lampi cungah SAC ralhrang ralkap rual kalmi cu PDF fonhmi phu nih bomb an puah hnawh hna caah a thimi an tam tuk lai tiah Reginal Friend Frighter nih cathanh an chuah.

Febuary 17 chun hnu leiah Patein-Minywa lampi ah meithal puah pah in kahdohnak tuah dingah a kalmi SAC ralhrang ralkap rual cu Reginal Friend Frighter le an hawile phu nih bomb 7 hmangin an rak puah hnawh hna hi a si.

Patein-Monywa lampi, 28 uico zuatnak dum le Myauh Ya Ma hlei karlak ah meithal puah hratin motor lampi in a kalmi SAC ralhrang ke ralkap hna cu RFF phu nih rak bawh hratin bomb 7 bakin an rak puah hnawh hna. A thimi uico rual cu lamkam in an thiar hna, an hruai lenmi zong hmuh an si i, mipi vengtu leikap ah himdam in kan i zukphiak kho tiah Reginal Friend Frighter phu nih an chim.

Bomb puah hnawh an ton hnuin SAC ralhrang ralkap hna nih pawngkam ah a ummi khua chungah lut hratin ningcang loin thilsual an tuah i, Ung Tung Pin khua le Gyi Sa Ciah khua karlak ah a ummi minung umnak inn cheumhat cu mei an khanghpiak tiah theih a si.The Federal Times Ref: Deltanewsagency, Global Chinland

Chansaunak Salm 34:12-14 Nun nuam tein nun le chansaupi le lunglawm in nun cu nan duh maw? Nan duh ahcun, bia tthalo chim kha i sum u, lih kha chim hlah u. That lonak kha hrial u law tthatnak kha tuah u; daihnak kha duh u law nan hmuh khawhnak hnga fak piin i zuam u.

Minung nih kan kawl mi thil lak ah a tel ve mi cu chansau le nun nuamh hi a si. Chansau cu Bawipa thluachuah a si. Nun nuamh cu Bawipa duhning in an nungmi nih an hmuhmi a si. Chansaunak ding ah hin ngandam a herh. Ngandamnak ding ah cun eidin le umtthutto ning ah ralrin a herh ve. Nun nuam tein nun khawhnak ding ah hin zeidah a herh bik ti ah na ruah?

Cathiang nih a kan chimhmi hi theih ttha le tuah ttha zulh ttha a si. Biattha lo chim kha i sum. Kan chimmi bia hi an cohlan lo ah cun kan mah cung ah a tlung tthan an ti. Biattha lo chim mi kha zeirel loin um. Nangmah nih na chimmi hi va lak tthan ko, ti hna. Na lungchung ah chia hlah law, a chimtu caah a si tthan ko lai. Ralrin ngai a herh. Cucaah cun Biattha lo chim hi kan i sum ding a si.

Lih chin hlah u. Biatak le bia hman chimmi cu a mah telawng in a dir kho. Lungretheihnak a chuahpi lo. Lih chim mi cu lih dang nih kilh kamh a herh tawn. Lih dang in kilh kamh khawhnak ding ah lih lawng te ruah a herh. Lungthin a ba. Lungthin a rit i chan tawinak a si.

Tthatlonak kha hrial u. Kan lungchung in kan ruah i a tthalo tiah kan ruahmi le kan tuah tik ah kan chiattha thleidannak nih taza a kan cuaimi cu hrial ding a si. Lai nawn hna hi cu a fiang tuk mi tthatlonak a si. Lihchim in Lainawn belte hi kan i theih lo karh ah kan tuah sual tawn. Mipa pakhat lih in a sining na chim i midang lungthin chung ah na that ahcun lainawn a si kha philh hlah.

TThatnak kha tuah u. Midang a lawmhtertu, nangmah zong nai lawmhmi le na pawng kam um mi caah lawmhnak a chuahtertu thil tuah hi a ttha. Tthatnak tuahmi nih siangpahrang kha ttih ding a um lo. Misual cu dawi hau lo in an zam tawn. TThatnak tuah hi i rialchih peng. Pathian sin ah bawmhnak hal. Na lawm lai. Na chan a sau lai.

Daihnak kha duh. Buainak sertu le daihnak duhmi hi um a si ttheo. Na lungchung daihnak ding caah NIHIN CU DAIHNAK ka duh lai. Lunglawmtein um ka zuam lai, tiah ruat. A ho hmanh nih na ruahmi cu an in cuhkalh lai lo. Nangmah ta te a si ko lai. Na tonmi thil kip ah tthatnak in hmuh le chiatnak in hmuh nai thim khawh. Nangmah thimmi te na co ko lai. Na hmuh khawhnak hnga fakpi in i zuam. Thlacam. Bawipa nih an bawmh lai kha philh hlah. By- Bil Hmung