Mipi Vengtu Phu Fonh Hna Nih SAC Ralkap Minung 20 Leng An Thah Hna
Sagaing ramtthen, Minkin(မင်းကင်း) peng Zin Kalay(ဇင်ကလဲ) khua pawng ah SAC ralkap khah-lah-yiah(ခလရ) 87 in ralkap thazaang 150 tluk cu nizaan April 26 zing ah tualchung mipi vengtu phu 6 i bawm in an kah hna i SAC ralkap 21 an thih pin ah hliamtuar an tam tiah Anti- Dictatorship People Revolution Army( DRPA) nih thawng an thanh.
SAC ralkap nih cun khuate pawl an khangh i mipi hnahnawhnak an pek hna ruang ah PDF hna nih an kah hna nak hi a si.Nizaan zing Sml 8 hrawng khan kah an si i kahdohnak cu minutes 15 tluk a rau, SAC ralkap hliamtuar an tam, PDF an cycle 2 a rawk i hliam tuar um lo tein hnu an tolh kho than tiah DRPA nih a langhter.
Cu SAC ralkap hna cu DRPA, FRF, GALAXY FORCE DEPEYIN – pah-kah-phah(ပကဖ), Sagaing PDF batallion 3, MDF le Tan Pauk(သံပေါက်) tualchung mipi vengtu phufonh hna i bawm in an doh mi hna a si tiah theih a si. Credit; The Chin Post
Sagaing ramtthen, Monywa-Mandalay motor lampi ChawngOo le Myinmu kar ah bomb hmanhding in a kalmi tualchung hriamtlai phu hna le SAC ralkap ralvengtu kar kahdohnak a chuak i SAC ralkap lei 2 an thi tiah Myaung TGR nih an thanh. Motor 6 he ralvengmi SAC ralkap hmaikal motor 2 in ralkap hna nih tualchung hriamtlai phu hna cu an hmuh hna caah an kah hna caah kaphnihkar kahdohnak a chuak tiah theih a si.
”Bomb hmanh ah kan kal, SAC ralkap nih ral vennak an tuah kan theilo, kanmah cu cycle he bomb hmanh dingin kan kal ah an kan hmuh caah kahdohnak a chuak, kanmah lei cu AK pahnih lawng kan ngei, lam cungah si lo in ramlak dum chungah kan tli, kan tlikpah in an kan kah. Kan kah ve hna i pakhat cu kan khen caah a thi, ” tiah Myaung TGR t hruaitu Bo Tiger nih a chim.
SAC ralkap 2 an thi, tualchung hriamtlai phu lei in minung 1 hliamhma a tuar, Tualchung hriamtlai phu lei minung 7 kan si cycle 5 he bomb hmanhding in kan kal na in, SAC ralkap nih an kan kah caah kan nun himnak ding ah tlikzaam in hnu kan tolh i cycle 2, bomb lung 4 , battery 7 le meihri bawmhnih a dihlak ah tulio phaisa in sing 12 man leng kan sung tiah an langhter.
Relchap; Nihin April 27 zinglei suimilam 9:00 hrawngah Myitgyina khuachung Mingkhing(မန်ခိန်) sangah phone battery tunnak in puahkehnak a chuak i inn kanghnak tiang a chuak tiah theih a si. Mei kanghnak ruang ah cun dothnih inn pakhat, datkhat inn pakhat le a pawngkam ah ummi Biakinn hall a kaang tiah sangchung ummi pakhat nih The 74 Media ah a chim.
” Electric wire a sawt tiah an chim, phone battery tun khawh in puahkehnak a chuak, inn cu a tlaih dih, hall cu a dihlak in a kaang dihlo” tiah a chim. Minutes 30 tluk mei a kaang, mei kanghnak ruangah hliamhma tuarmi an umlo tiah a chim chap. Kachin ramkulh Myitgyina peng Palanah(ပလန) khua cozah rubber cinnak hmun zung pakhat zong nizaan ah a kaang tiah theih a si.
