Mipi Vengtu Ralkap Hna Nih Min Aung Hlaing Ralkap 18 Leng An Thah Hna
Sagaing ramtthen, KhinOo nichuahlei meng 8 tluk aa hlatnak Kalaloe (ကုလားလူး) khuapawng i March 30 ah rallam in a rami SAC ralkap hna cu mizapi vengtu ralkap nih bomb an puah hnawh hna tiah theih asi.
Kahdohnak cu March 30 zinglei suimilam 6:00 hrawng ah an thok i SAC ralkap 19 hrawng an thi, mizapi vengtu ralkap phu lei hliamtuar umlo in hnu kan tolhkho than tiah mizapi vengtu ralkap pakhat nih a chim. KhinOo pengchung Kalaloe (ကုလားလူး), Shalwin(ရှားလွင်) le Tamouth(တမုတ်) khua in mipi 2500 hrawng cu ralzaam dirhmun an phan tiah theih a si.
March 31 2022 Nikhat Cung Ah SAC Ralkap 62 An Thi. Myanmar ram pumpi in dohthennak tuah hnu March 31 2022 nikhat chung ah SAC ralkap 62 an thi i PDF 3 an nunnak liam tiah Yangon Khit Thit nih a thanh. Cazin ning ah SAC ralkap lei a thimi hi Karen ramkulh Kaw Ka Reik ah 15, Chin ramkulh Matupi ah 18, Sangaing ramtthen Chaung U ah 2, Shwe Bo ah 2, Taninthayi peng ah 2,
Mon ramkulh Kyaikto/ Homalin ah 6, Pakokku ah 2, Shan ramkulh Muse peng ah 5, KNU bridage 5 ah 10,an dih lak 62 an si. PDF lei in Mon ramkulh ah 1, Khin U ah 1, cun Matupi ah Chin ralkap 1, an dih lak 3 an nunnak liam.
KNU bridage 2 hmunhma Tantaung(သံတောင်) peng ah March 31 zinglei ah SAC ralkap motor run cu hmun 2 ah bomb puah hnawh an tong i SAC ralkap 3 an thi i 3 hliam an tuar tiah theih a si. Nizaan zing Sml 7:30 ah Tantawng(သံတောင်) in Taungoo(တောင်ငူ) lei ah a kal mi SAC motor pakhat cu Taungngo PDF nih bomb an puah hnawh i ralkap 1 hliam a tuar, Cu hliamtuar mi ralkap cu Taungoo siizung ah an kal pi tiah tualchung thawngzamhnak sin in theih a si.
Cun zing Sml 11 hrawng ah Tantaung in Tantaunggyi lei ah a kal mi SAC ralkap motor 17 aa zul mi cu KNLA he ttangtti simi ”Ghost Ranger UG” nih bomb(mine) an phuah hnawh hna i SAC ralkap 3 an thi i 2 hliam an tuar tiah theih a si. Bomb lung 5 in puah an i tim ko nain cycle in mizapi aa chawk let mi an tam caah a hnu bik motor lawng an puah hnawh tiah theih a si.
Cu SAC ralkap motor 17 cu Tantaunggyi Bayinnaung(ဘုရင့်နောင်) camp ah a kal ding mi an si i bomb(mine) puah hnawh an ton caah a rawk mi motor pakhat le a dang ralkap motor 6 cu Tantaung lam ah ummi SAC ralkap sakhan ah an i din tiah theih a si. Credit; The Chin Post
