Mipi Vengtu Ralkap Le Kawl Ralhrang Kahdohnak Ah SAC 20 Hrawng An Thi
Mandalay ramṭhen, Myinhkyan(မြင်းခြံ) peng, Irrawaddy tiva kam Semehkone(ဆီမီးခုံ) lawngdinhnak ah raltuknak tank le ralhrang tilawng cu mizapi vengtu ralkap nih an kah hna i SAC ralhrang lei 20 hrawng an thi, tiah khua mi sin in theih a si.
Nihin March 2 zing 4:00 hrawng in Semehkone (ဆီမီးခုံ) lawngdinhnak hmun i a um mi SAC ralhrang tank 1 le Hplaat(ဖလက်) mawṭaw3 le ralhrang tilawng cu Myaung(မြောင်) khuapi mizapi vengtu ralkap le CDSOM phu, Myaung Union Army – MUA Myaung Battalion, Pyawwaatkyar Lainyone le Myinhkyan(မြင်းခြံ) BGF,
Hnalung Hlah Lumeih Gyi Phu, Tlote(တလုတ်)PDF, 27Revolution Force le Myinmu Civil Revolution Force pawl i fonh in an kahdoh hna, tiah theih a si. Tiva khat lei ral le khat lei va ral in an i kap i, cu kahdohnak cu ralhrang lei nih an thok mi a si.
SAC ralhrang lei in pa 19 hrawng an thi men lai, tiah theih a si i ralhrang tilawng zong in RPG in voi 1, 40mm in voi 1 le meithal in an kah len hna, tiah Myaung Union Army-MUA phu i Boe Ta Man Kyar nih MFP thawngthannak ah a chim.
Kahdohnak chung ah mizapi vengtu ralkap phu lei in a thi mi an um lo nain SAC ralhrang nih ruah dap in an kahnak ah Myaung khuapi Taaduan(သာဒွန်း) khua i nu pakhat cu a phei ah a khen i inn zuat satil cheukhat zong hliam an tuar, tiah theih a si. Credit: The Chin Post
Russia ral ruangah Ukraine Pumpululh chuihthiam, an ram Ukraine kilveng ding in ralkap ah a lut mi mino 2 nih an ram le miphun caah an nunnak an pek, tiah theih a si. Vitalii Sapylo kum 21 le Dmytro Martynenko kum 25 hna cu Russia ral in an ram Ukraine an venhimnak ah an nunnak a liam.
Vitalii Sapylo hi Karpaty Football Club Junior team ah Kawlbawh( Goal keeper) a si i Ukraine ralkap ah raltuknak tank hruaitu ( Ttinhka- Hmu) in a lut i Febuary 25 ah Ukraine khualipi Kiev khuapi kahdohnak ah a nunnak liam, tiah Ukraine nawlngeitu hna nih an thanh.
Dmytro Martynenko hi Pumpululh chuih laksawng zong a hmu bal mi a si i, FC Gostomel caah a hmanung bik puai ai celh khawh in Ukraine ralkap ah lut ding in Kyiv khuapi a phan i, inn khan pakhat chung a um lio ah Russia bomb nih a khen hna i, amah hringtu a nu he an nunnak a liam. Vitalii Sapylo le Dmytro Martynenko hna cu Russia- Ukraine tukdohnak ah Ukraine Pumpululh chuihthiam in nunnak a pe hmasa bik mi an si caah Ukraine mipi vialte nih upatnak sang an pek hna.
Ukraine ram caah a biapi tuk mi Rilikam kam um Kherson khuapi cu Nizaan March 2 ah Russia nih an laak khawh cang, tiah theih a si. Kherson khuapi cu Black Sea in Ukraine ramchung luhnak a si i Russia nih Ukraine ram khuapi hna lak ah an lak khawh hmasa bik mi khuapi zong a si. Atu ah cun Kherson khuapi ah Ukraine ralkap an um ti lo caah Khuapi chung ummi mipi zong nih ukhruai ding ah a rak phan mi nawl ngai rih ding in Kherson khuapi Mayor Ihor Kolykhaiev nih a facebook cahmai ah a ṭial.
Russia Defense Ministry zong nih ‘Ukraine ram thlanglei kap Kherson khuapi cu kan laak khawh cang’ tiah official tein an thanh cang. Ukraine President Zelensky nih cun EU sin ah bawmhnak a hal chap ṭhan i, atu caan hi a karlak ah um caan a si ti lo, tiah a chim. Credit: The Chin Post
