Press "Enter" to skip to content

Mipi Vengtu Ralkap Le Ralhrang Kahdohnak Ah Mipi 17 An Nunnak Liam

Sagaing ramṭhen, Shwebo pengkomh KhinOo peng le an pawnghrawng khua ah March 5 thok in nihin March 10 tiang, ni 6 chung ah khuachung mipi hna le PDF ralkap in minung 17 nunnak a liam, tiah KhinOo PDF nih an thanh. SAC ralkap hna nih a luancia March 5 thok in KhinOo peng le an pawnghrawng khua hna cu internet an thahpiak hna i,

Cu hnu cun nifatin ngawt in kahdohnak a chuak. Ni 6 chung kahdohnak ah SAC ralkap nih hriamngan in voi 50 leng mizapi ralkap an kah hna lengah mizapi inn hna cu meikhangh in an hrawhpiak hna. SAC ralkap hna cu rallam an sialnak Theintaw (သိမ်တော်)

khuapawng ah bomb in doh an ton caah SAC ralkap chungtel cheukhat an thi i hliamhma tuar zong an um, tiah theih a si. SAC ralkap phu hna nih Sagaing ramṭhen, KhinOo peng telh in Gyunlae (ကျွန်းလည်), Theintaw(သိမ်တော်), Tayatpin (သရက်ပင်) khua hna ah hriamngan le hriamhme an kah.

Cun, nizaan March 9 zong ah Tatpe(သက်ပေး) khua cu luhhnawh in mipi umnak inn an khanghpiak hna. Cun, nizaan March 9 ah Moeta(မူးသာ) khua in Yatehkung(ရသေ့ကုန်း) lei ah SAC ralkap phu hna cu an lut i khuachung ah chekhlatnak tuah in mipi thilri an hrawhpiak dih hna, tiah theih a si. Credit: The Chin Post

Chin ramkulh, Rihkhuadar ah Chin mizapi vengtu ralkap le SAC ralkap kahdohnak a chuah ruangah mipi 2000 hrawng cu India ramri lei ah an zaam hna, tiah khua mi sin in theih a si. Rihkhuadar khua mi pakhat nih cun, “Kahdohnak cu a chuak ti lo nain a caan ah meithal puahnthawng theih ding a um. Rihkhuadar khua mipi dihlak ngawt cu India ramri lei ah kan zaam hna i, zinglei ah an zuatmi saṭil rawlpek ah khuachung ah kan lut tawn.

Khua mi dihlak ngawt in ramri ah cun kan zaam hna,” tiah a chim. Chin mizapi vengtu ralkap hna le SAC ralkap hna cu March 5 ah khan an rak i kap i, cu kahdohnak a chuah hnu ah Rihkhuadar khua mi hna cu hmundang ah an zaam hna. Rihkhuadar pawng SAC ralkap sakhan cu SAC nih ralkap thazaang an chap fawn.

Rihkhuadar pawng ramri lei umkal cu caan karlak phihkhar ding in le, khuachung luh hlan ah CDF-Hualngoram cu theihternak tuah hmasa ding in CDF-Hualngoram nih cathanh an chuah. Khuachung innzuat saṭil rawl pek caan cu zinglei lawng ah caan on a si, tiah khua mi sin in theih a si.

Rihkhuadar cu India ramri Rih tidil pawng ah a um mi khua a si i, kahdohnak ruangah khuachung innlo kaang in, an rawkral lai tiah thinphang in khua mi cu an um, tiah Rihkhuadar khua mi hna sin in theih a si. Credit: The Chin Post

Be First to Comment

Leave a Reply

Your email address will not be published.