Mipi Vengtu Ralkap Le Ralhrang Kahdohnak Ah PDF Pasaltha 5 Nih Ram Le Miphun Caah An Nun An Pek
Nihin February 20 zingka suimilam 6:30 hrawng ah Sagaing ramṭhen, Khinoo peng, Tayetkan khua pawng ah ralhrang le mizapi vengtu ralkap karlak kahdohnak ah a chuak i, kahdohnak a fah tuk caah ralhrang lei nih hriamngan an hman i, PDF 5 an thi, tiah Khinoo peng thawngthanhnak in theih a si.
February 20 i kahdohnak a chuahnak; Tayetkan le Sipohtayar(စည်ပုတ္တရာ) khua cu Kanbulu ramri ah a um mi a si i Kanbulu in Pyo-Saw-Tti phu le Khinoo peng ah a um mi ralhrang nih i bawm in an kah hna tiah theih a si. Cu lawng siloin February 17 lio ah Khinoo peng, Gangyikung(ကံကြီးကုန်း) khua le Myothit khua pawng ah ralhrang le PDF karlak kahdohnak faak ngai a rak chuak i, hriamnam thazaang ah an i thlau tuk caah PDF 17 an rak thi, tiah mizapi vengtu ralkap nih an langhter.
Ralhrang Helicopter Nih Bomb Le kuan An Thlakmi Hna PDF Nih An Laak: Kahdohnak a zual tuknak Shan le Karenni ramkulh ramri ah ralhrang nih an ralkap pawl caah Helicopter in bomb le zenkuan an thlak mi hna cu PDF pawl in an laak kanh hna, tiah theih a si. Nihin February 20 zing sml 6:00 hrawng ah ralhrang le PDF pawl an i kahnak hmun i an karlak ah Helicopter in an vun thlakmi thilri tam deuh cu PDF nih an laak khawh, an laak mi hna cu 73 mm le hriamnam dang chiahnak thingkuang le kuan pawl an si, tiah theih a si.
“A dihlak in laak khawh ding a si ko nain ralhrang nih sniper in an kan kah tuk caah a zapi in kan la kho lo,” tiah Karenni ramri i raltu cuahmah mi PDF pakhat nih a chim. Helicopter in thil a vun thlakmi laak ah a ra mi ralhrang le PDF karlak ah faak ngai in kahdohnak a chuak chap hoi, tiah theih a si.
Kalaymyo Ah Aho Hngalhlo Miruak Aa Ṭhenthek Dih Mi Hmuh A Si!: Kalaymyo, Taungta sang, Golf tuknak lampi ah miruak pakhat- a lu, a takpum le a ke zong aa ṭhenthek dih mi cu nihin february 20, zinglei ah hmuh a si. Mithi ruak hi Kalaymyo, Taungta sangchung mi, amin- Ting Zaw timi pa a si i, SAC ralhrang lei mining a si, tiah a ruak hmutu nih cun an chim. Miruak hi a langh ning ahcun thah mi a si a fiang ko nain aho nih dah an thah theih a si lo.
“Atulio cu Myanmar ram chung ah phungphai(law) kalpi khawh a si lo caah hi bantuk in mi tampi cu ui thih le ar thih in an nunnak an liam cuahmah. Taungta sang i mithi ruak an hmuh mi hi SAC ralhrang lei mi a si nain PDF minchiatter duh ah anmah SAC ralhrang lei nih an tuah hramhram mi a si kho. SAC ralhrang nih mi chokvai an hmuh mi hna cu midang theih lo in an tlaih hna i, an thah hna tikah PDF thah mi bantuk in an langhter tawn,” tiah min langhter lo siangcachim pakhat nih cun a chim. Credit: The Chin Post
