Press "Enter" to skip to content

Mipi Vengtu Ralkap Le SAC Ralkap Kahdohnak Ah Mipi Lei Hliam An Tam

Sagaing ramṭhen, Kalay lei in a rak tum mi SAC ralkap, pyosawthi le tualchung hriamtlai phu hna kar ah March 20 ah kahdohnak a chuak i, zaam manh loin aa hreng sual mi ralzaam mipi pawl va bawm ding in a kal mi PDF pawl cu SAC ralkap nih burbuk in a thlithup in an kah hna i, minung 6 hliam an tuar, tiah PDF-Gangaw nih thawng an thanh.

Kalay lei in a ra mi SAC ralkap le Hantawady(ဟံသာဝတီ), Kuhkaa(ကုက္ကား), Myohkhayaan(မြောက်ခင်ရန်း) khua i a ummi pyosawthi hna nih kahdohnak chung ah zaam manh lo in aa hreng sual mi ralzaam mipi umnak hmunhma pawl ah hriamngan in an kah hna ruangah hi bantuk in PDF-Gangaw nih va bawm ding in an kal hnawh hna lio ah kah an ton hi a si.

Kahdohnak ah SAC ralkap lei a thi mi an um nain zeizat an si an fianter kho rih lo. SAC ralkap nih rallam an sialnak ah a um mi vawlei cawhnak seh 1, lei thuannak seh 3 le motor 3 cu an hrawh hna i, innzuat caw pawl zong an kah hna, tiah PDF-Gangaw nih an thanh. Credit: The Chin Post

Rakhine ramkulh, Ann khuapi chung ah aa dor mi Chin mi 1300 leng cu March 26 thok in an umnak hmun cio ah kirter ṭhan ding in SAC kuttang Rakhine ramkulh cozah nih timhtuahnak a ngei, tiah theih asi. Ann khuapi, Pedadung ralzaam camp le Celhhmun ralzaam camp hna ah a rak i dor mi Chin miphun ralzaam hna cu an umnak hmun cio ah kirter ṭhan ding in Febuary thla chung ah khan SAC kuttang State Cozah nih min cazin an laak i,

an cazin ning ah innchung khar 307 an si i, a milu in 1381 an si i, an zate in an umnak hmun ṭhing cio ah kirter ding in timhtuah an si, tiah SAC kuttang Rakhine ramkulh cozah in biachimnak nawlngeitu U Hla Thein nih a chim. U Hla Thein nih cun an umnak hmun cio kirter nak ding caah min cazin kan laak hna i, tuthla March 26 hrawng cun kirter kho ding in kan timhpiak hna. An herhmi eidin poh cu World Food Program (WFP) nih ṭuanvo a laak dih hna lai, tiah a chim.

Ann khuapi chung ah ralzaam in ai dormi Chin mi hna hi Ann pengkulh Ngiangchaung, Lungtung, Winwa, Tinbawnhmoh, Mingalar Done, Anoh zua, Dalat khuahlun hna in a rak zaam mi an si hna i 2018-2020 karlak AA le SAC ralkap kahdohnak ruang ah a rak zaam mi hna an si hna. Hi Chin miphun ralzaam hna an khua cio i a kir ding mi hna cu SAC kuttang Rakhine State cozah nih chungkhar khat ah Myanmar phaisa ting 5 cio an pek hna lai i WFP nih thla 3 chung an eidin ding a bawmh ve hna lai, tiah theih a si.

Ann khuachung ah ai dor mi Chin mi pakhat nih cun, “Ralzaam camp um hi kan huam bak ti lo, nain khua kir ti ah le leitang phummi bomb a tam tuk caah ṭihnung, nain min cazin zong an kan laak cang caah an kan kirter i kan kir ko lai,” tiah a chim.

U Hla Thein tu nih cun an kirnak ding khua hna i a kiangkap ah bomb vialte thianh dih a si cang i ṭihnung a si ti lo, bomb bantuk ṭih a nung mi nan hmuhsual ahcun aa naih biknak ralkap camp chawnh hna i ralkap nih thiamhlimh ding in kan tawlrel lai, tiah a chim ve. The Chin Post

Be First to Comment

Leave a Reply

Your email address will not be published.