Mipi Vengtu Ralkap Nih Kawl Ralhrang An Phomh Than Hna, Thi Le Hliam An Tam

Chindwin tiva in a rak kai mi ralhrang tilawng 5 cu mizapi vengtu ralkap phu hna nih nihin February 9 zing Sml 11:45 ah tichung hman mi bomb in an puahhnawh hna i hriamngan le hriamhme he an kah chih hna caah ralhrang hmaikal tilawng 1 an rawk i ralhrang 4 an thi, midang 8 hliam an tuar. Cu ralhrang a thi mi ruak le aa hliam mi hna cu va la ding in Minkin tilawng dinhnak hmun ah mizaw phor motor nih a hngah hna, tiah theih a si.

Minkin peng, Tuang Phyo (‌ေတာင်ဖြူ) khua lei ah a rak kai mi ralhrang tilawng 5 cu MKPDF Battalion 2, tatkhuai 3 le Chindwin Rangers phu hna nih an kah hna i ralhrang hmaikal tilawng 1 cu bomb nih a puah i a rawk, Nga Ung(ငအုံး) khua tiva kam ah an remh i zanlei Sml 1 hrawng ah Minkin lei ah a kai ṭhan. Minkin khua tilawng dinhnak hmun ah ralhrang a thi mi le aa hliam mi hna phor ding in mizaw motor nih a hngah hna, tiah MKPDF 2 nih cathanh an chuah.

Ralhrang Cozah Rianṭuantu Minung 60 Leng Nih An Rian An Chuahtak!; Sagaing ramṭhen, YeeOo (ရေဦး) peng education department rianṭuantu hna le twe-oak (ထွေအုပ်) zung rianṭuantu hna nih February 8 le 9 ah rian chuahnak ca an pek, tiah education department lei rianṭuantu hna sin in theih a si. February 9 ah education department rianṭuantu minung 30 le twe-oak (ထွေအုပ်) zung rianṭuantu minung 8 nih rian chuahnak ca an chiah, tiah theih a si.

Education department lei rianṭuantu pakhat nih cun, “Runvennak tuahtu phu nih SAC rianṭuantu hna sin ah ralrinnak an pek hna, atu ah cozah rianṭuantu cheukhat cu ‘CDM tuah uh’ ti in an chimhmi hna zong an um, cu ruangah rian in an chuah zong hi a si kho,” tiah a chim. February 8 ah khan YeeOo(ရေဦး)

peng ah a ummi education department rianṭuantu minung 28 nih rian chuahnak ca an chiah hnu in february 9 ah rian chuahnak ca chiatu education department chung in, rengsang a tlaitu siang-uk minung 6 an um ṭhan, tiah theih a si. Ralhrang phu hna hmanrua/thilri pohpoh cu a herhning in kan tawlrel lai, tiah YeeOo (ရေဦး) mizapi vengtu ralkap phu nih cathanh an chuah. The chin post

Rakhine ramkulh, Amm (အမ်း) peng ah Daw Ma Sein cu a luancia 2020 kum election lio ah vote voihnih na thlak an ti caah nihin February 9 ah biaceihzung nih myanmar phaisa singkhat liam ding in biakhiahnak an tuahpiak, tiah sih-ni pakhat nih a chim. Kum-50 hrawng a simi Daw Ma Sein cu phungrelnak caang 171 in Amm (အမ်း) pengkulh biaceihzung nih Myanmar phaisa liam ding in biakhiahnak an tuahpiak, tiah sih-ni U Kyaw San Naing nih RFA ah a chim.

Daw Ma Sein nih cun vote voihnih ka thlak ko, tiah nihin ah a phuan ve. “Ka sin ah vote thlaknak catlap pahnih a phanh caah voihnih in ka thlak,” tiah a chim. Cuti a chim ruangah biaceihzung nih Myanmar phaisa singkhat liamter in biakhiahnak an tuahpiak hnu ah nihin February 9 ah an thlah than, tiah theih a si.

Daw Ma Sein cu Amm(အမ်း) peng thimnak commission riansang a tlaitu pakhat a si mi U Tu Yein Tun nih phungrelnak caang 171 in taza a rak cuai. Rakhine ramkulh ah a luancia 2020 thimnak ah vote dik lo nan tuah, ti in Rakhine ramkulh vuanci-choh hlun a si mi U Ngi Puh le si-pin vuanci hlun U Min Awng hna cu phungrelnak caang 103(a) le 109 in tazacuai an ton lio a si. the chin post

Mindat Ah Ralhrang Hriamngan Kahnak In Ngakchia Pakhat A Nunnak A Liam!; Ralhrang nih nai hrawng cu Mindat peng chung khuate hna ah lamhlat kahnak hriamngan in a duhnak poh an kah peng hna, tiah theih a si. A luancia February 7 zong ah khan Mindat in meng 9 pawngkam ah Matupi in Mindat ah a kir mi ralhrang motor run nih an duhnak poh an kah caah khor chung i aa thup mi tang 7 kai lio ngakchia pate pakhat cu hriamngan kuan nih a tlak caah a nunnak a liam, tiah Mindat peng mizapi uktu phu hna nih cathanh an chuah.

January 25 ah Matupi in Mindat ah a kal mi ralhrang motor 80 hrawng cu ni 14 a rauh hnu in February 8 ah Mindat khua chung an lut ṭhan. Cu ralhrang pawl an luh ṭhan hnu cun Mindat nitlaklei sang um Khah-Lah-Yiah 274 hna nih Mindat peng khuate hna cu hriamngan in an kah lengmang hna, tiah theih a si.

Atu bantuk in hriamngan in an kah hna nak kong he pehtlai in CDF-Mindat ah ṭuanvongeitu pakhat nih cun, “Matupi in Mindat i an rak ṭum ṭhan lio lampi ah CDF nih an kah hna, bomb in an puah hna i ralhrang a thi mi le a hliam mi an tam. An thinhunnak langhternak ah Khuachung an luh khawh in, khuachung an phaknak hmun pohpoh ah meithal an kahnak hi a si, tiah kan hmuh,” tiah a chim. The Chin Post