Press "Enter" to skip to content

Mipi Vengtu Ralkap Nih Min Aung Hlaing Ralkap An Kahdoh Hna Thi An Tam, An Motor Zong An Hrawh Piak Hna

Mandalay ramṭhen, Nuahtugyi (နွားထိုးကြီး) peng le Sagaing ramṭhen Pale (ပုလဲ), Htichait (ထီးချိုင့်) peng ah ral vengtu SAC ralhrang motor hna le riahcaw phortu ralhrang motor hna cu mizapi vengtu ralkap phu hna nih nihin March 5 ah bomb in an doh hna caah SAC ralhrang motor a tlawmbik 3 a rawk i, a thimi zong an um, tiah theih a si.

Nuahtugyi (နွားထိုးကြီး) peng, Watloe(ဝက်လူး) khua le Pechat(ပဲချက်) khua kar nihin March 5, zinglei suimilam 7:30 ah SAC ralhrang phu hna motor cu Nuahtugyi (နွားထိုးကြီး) PDF nih bomb lung 8 in an puahhnawh hna, tiah theih a si. Ralhrang phu hna cu Watloe (ဝက်လူး) khua lei zong ah kal in, minung thazaang tampi he umhmun an khuar i, cuka pawng hrawng hmunhma cu atu le tu runvennak an tuah, tiah theih a si.

SAC ralhrang hna nih bomb puahhnawh lai an phan caah khuami hna cawleng cu hmai norter in minung thazaang 80 hrawng he ramlak ah zohfelnak an tuah. Cun, Yinmapin (ယင်းမာပင်) Lengaut(လည်ငေါက်) khua in Pale(ပုလဲ) lei ah a kal mi SAC ralhrang phu motor cu nihin March 5, zinglei suimilam 6:46 ah bomb puahhnawh in doh an tong i SAC ralhrang lei a thi mi zong an um nain zeizat an thih fehternak a um rih lo.

Htichait (ထီးချိုင့်) nitlaklei zong ah ralhrang phu motor 29 cu mizapi vengtu ralkap phufonh nih nihin zinglei ah bomb puahhnawh in an doh hna i, cu dohnak ah cun ralhrang motor 3 a rawk, tiah theih a si.

Cu motor cu Sagaing ramṭhen, Htichait (ထီးချိုင့်) in Kachin ramkulh, Muhngin (မိုးညှင်း) lei ah a kal mi motor a si i, seh meithal cuang mi motor 1, sii phor mi motor 7, thil phortu motor 15, motor hme 4 le ralhrang dongtu motor 2 a dihlak ah ralhrang phu motor 29 a si i, cu chung ah cun motor 3 cu hrawhpiak an si, tiah khuachung thawngzamhnak nih a langhter. The Chin Post

Magwe ramṭhen, Pakokku peng ah nizaan March 4 chunhnu ah University siangngakchia 4 le khua mi 1 SAC ralhrang nih an tlaih hna, tiah Pakokku University Student Organization(PUSO) nih cathanh an chuah.

Tlaih a tong mi hna hi Pakokku Technological University ah kumkhatnak a kai lio mi Ko Lin Sat Aung(ကိုလင်းဆက်အောင်), le a dang min theih khawh rih lo mi pathum le khua mi pakhat an si, tiah theih a si.

Siangngakchia an tlaih hna ning cang hi Pakokku hrialnak lam gate ah SAC ralhrang le pyosawthi phu i bawm in cycle aa cit mi Ko Lin Sat Aung le mi pakhat cu lam an kham hna i an tlaih hna. Cun an hawi le sin ah SAC ralhrang nih an hawi le bantuk in phone an i chawnhter i a dang pahnih cu an tlaih ṭhan hna, tiah PUSO nih cathanh an chuah mi ah an langhter.

SAC ralhrang nih siangngakchia le sualnak ngei lo mipi cu nifatin an kawl hna i phung ning lo in an tlaih hna, an thah hna. An tlaih mi hna kong he pehtlai in thawng kan theih chap mi a um ahcun kan thanh than te lai, tiah PUSO in mi pakhat nih a chim. Credit: The Chin Post

Be First to Comment

Leave a Reply

Your email address will not be published.