Mipi Vengtu Ralkap Nih Min Aung Hlaing Ralkap Tam Taktak An Thah Than Hna
Magwe ramṭhen, Gangaw pengkomh chung ah SAC ralhrang phu hna le mizapi vengtu ralkap phufonh karlak ah (February 20-25) 5 chung kahdohnak a chuak i cu kahdohnak ah cun ralhrang lei minung 20 leng an thi, tiah PDF Saw phu nih nizan February 25 ah cathanh an chuah. February 20 ah SAC ralhrang phu motor 16 in SAC ralhrang minung thazaang 200 hrawng cu Gangaw pengkomh in Chin ramkulh lei ah kal in Lawngshi(လောင်းရှည်) ah kaphnih kar kahdohnak a chuak.
Saw peng, Suailuaigin (ဆွဲလွဲကျင်) pawng ah February 20 in kahdohnak a chuak i ralhrang phu lei in minung 6 an thi. February 21 ah ralhrang minung 4 an thi ṭhan i February 22 kahdohnak ah ralhrang minung 11 an thi ṭhan, tiah cathanh an chuah. February 25 zinglei kahdohnak ah ralhrang phu lei nih helocopter he hliamhma tuar mi cheukhat cu an kalpi hna, tiah theih a si.
Cu kahdohnak ah cun PDF-Saw, CDF-Kanpalet le CNA phufonh nih ralhrang phu cu an kahdoh hna i mizapi vengtu ralkap phufonh lei hliamtuar an um lo, tiah an cathnah ah cun an langhter chih. A luancia February 16 ah Saw in Lawngshi (လောင်းရှည်) ah a kalmi ralhrang phu hna cu PDF-Saw nih bomb in an doh hna caah SAC ralhrang minung 3 an rak thi, tiah theih a si. Credit: The Chin Post
US nih Ukraine President Zelensky cu hmunhimnak ah kan in chiah lai tiah a nawl nain President Zelensky nih a al hna, tiah US Media pawl nih an langhter. Ukraine President Zelensky nihcun US nih hmunhimnak ah kan in chiah lai an timi cu, “Raltuknak cu meithal kah in a si, Kei ka herh mi cu zenkuan le hriamnam lawng si, tiah a leh hna,” ti in a biachim theitu pakhat chirhchan in an thlenglei ram media hna nih ṭial.
Washington Post nihcun, “US nih Ukraine bawmh ding ah ai tim,” tiah kaphnih cozah lutlai pawl chirhchan in a ṭial ve. Russia ral ralṭha tein a dir onhtu Ukraine President Zelensky cu Social Media ah thangṭhat a tong taktak, tuan deuh i bia a rak chim zong ah, “Nan kan tuk ahcun kan hmaifang/hmailei lawng nan hmuh peng lai, zeitik hmanh ah kan keng/hnulei nan hmu lai lo,” tiah an rak chim bal. A chim duhnak cu kan in ṭih hna lo i “hnu kan pil in ka in surrender lai lo” a ti duhnak si.
Ukraine President Zelensky a zaam cang ti mi thawngpang a leng nain zahan zaan ahcun Zelensky le a kuttang hna nih Ukraine khualipi Kyiv kan chuahtak lo tiah video file in an chim. Ukraine President Zelensky hi pesident a si hlan ah cun lemcang thiam tiah theihhngalh hmasa mi si.
