Press "Enter" to skip to content

Mipi Vengtu Ralkap Nih Min Aung Hlaing Ralkap Tam Tuk An Thah Hna

Sagaing ramṭhen, Hteecheih (ထီးချိုင့်) peng ah ralhrang motor run le tank cu nihin february 15 zing ah Hteecheih peng mizapi vengtu ralkap hna nih bomb lung 20 leng in an puahhnawh hna i ralhrang tamlakte an thi, tiah Hteecheih thawngthanhnak TR nih an thanh. “February 15 ni zinglei Sml 6:00 in aa thawh i Moengin lei ah a ṭum mi ralhrang ei din a phortu motor 33 hrawng cu Kyauk Ink ,

Bu They Kone, Inn Dim, A Ley Taw, Sa Tun, Pauh Kone, Kyat Ta Ye Chuang pawngkam ah mizapi ralkap nih bomb lung 20 leng in an rak puah hna. Hmunhma 7 ah bomb cu an puahhnawh hna i tamlakte an thi kho i, aa hliam mi zong an tam kho, motor 2 cu khalh khawh ti lo in an rawk. Ralhrang a thi mi hi a tlawm bik 20 hrawng an si lai,” tiah TR nih Yangon Khit thit ah a chim.

Cu motor run hna cu Kuan Tone (ကွမ်းတုံ) khua in an chuah lio ah lamkamkip ah an duhnak poh an kah pah caah khuate inn cheukhat hna zong kuan nih a khen i, an rawk pah, mipi aa hliam mi cu an um lo. Nihin kahdohnak ah Hteecheih mizapi vengtu ralkap lei in aa hliam mi um lo tein hnu an tolh kho. Ralhrang motor hna cu nihin zing Sml 10:00 hrawng ah Mandalay lei ah an kal, tiah theih a si.

Hteecheih i thawnglatu hna nih bomb puahnak in a thi mi ralhrang hna an ruak cu motor cung ah an khin hna i an kal ṭhan, tiah an chim. February 14 zinglei zong ah Mandalay ramṭhen, Moekok peng Kuipin khua um ralhrang sakhan cu TNLA le PDF a fonh mi phu hna nih an luhhnawh i, an kah hna. Kaphnih in a thi mi an um i ralhrang lei in 20 nak tam an thi kho, PDF phufonh lei in 2 an thi ve, tiah theih a si. The Chin Post

Magwe ramṭhen, Saw peng ah February 11 in 13 tiang, ni 3 chung a cat loin kahdohnak a chuak i, cu kahdohnak ah cun ralhrang 25 an thi i, 15 hliam an tuar, tiah Saw PDF in ṭuanvongeitu nih DVB ah a chim. Saw ramṭhen, Kyaukthu in Saw lei ah a kal mi ralhrang motor 16, minung thazang 300 hrawng cu Saw PDF le Nginaung Mahamik(ညီနှောင်မဟာမိတ်) he February 11 in 13 tiang, ni 3 chung catlo in an i kap, tiah theih a si.

Ralhrang pawl hi Kyaukthu sakhan in Saw khuapi lei ah February 7 hrawng khan an rak chuak cang. February 10 ah Nginaung Mahamik YDF le Kyaukthu le CDF(Kanpalet) hna he i bawm in, bomb in an rak kah hna. Kah-Pa-Sa (ကပစ) 25 in a rak chuak mi ralhrang hna zong Saw PDF he an i kap i Saw khuapi ah kir ṭhan, tiah theih a si.

Kaphnih kahdohnak chung ah Nginaung Mahamik lei in hliamtuar le a thi mi um loin hnu an tolh ṭhan kho nain ralhrang pawl an kham khawh lo caah mipi sin ah ngaihthiamnak an hal i, an hriamnam aa thlau nakkong zong an langhter. Kaphnih kahdohnak he pehtlai in aa hliam mi le a thi mi kong ah ralhrang lei in cathanh an chuah mi kan hmu rih lo.

Tanhse Ah Mipi Inn A Khangtu Ralhrang Motor Run Bomb Puahhnawh An Tong: Mipi umnak Inn 39 a khangtu ralhrang motor run cu Tanhse peng ah February 14 ah bomb puah an tong i ralhrang 20 hrawng an thi, tiah theih a si. Ralhrang 100 leng an i telnak ralhrang motor run cu zanlei Sml 2:00 hrawng ah Moe Buang Htik Yua Si (mah) (မူးဘောင်ထိပ်ရွာရည်(မ)) khua pawng ah hriamtlai phunfonh nih bomb an puahhnawh hna, tiah min langhter a duh lo mi thawnglatu pakhat nih The 74 Media ah a chim.

Cu ralhrang hna lam cu January 11 ni ah Kaa Puang Kyiah khua ah an lut i umhmun an khuar caah bomb puah an rak tong bal i ralhrang 10 leng an rak thi, tiah thei a si. Nizan i ralhrang pawl bomb puah an tonnak cu Tanhse khuapi i KPK, TSR, Tawkyi MyatSaw le Local PDF hna i bawm in an tuah mi a si, tiah theih a si. Ralhrang hna nih nihin february 15, zing Sml 8:30 ah Chuang Sone khua le Pha Lan Chai khua mipi inn hna cu an khanhpiak hna, tiah theih a si.

Be First to Comment

Leave a Reply

Your email address will not be published.