Mipi Vengtu Ralkap Nih Ralhrang Umnak Hmun An Luh Hnawh, Minung 5 Bak An Thi
Shan ramkulh -Karenni ramkulh ramri Phekhung (ဖယ်ခုံ) khuachung ah hmun khuarmi ralhrang pawl cu PDF phufonh nih nihin (Febuary 22) zinglei suimilam 6:00 ah kan luhhnawh caah ralhrang minung 5 an thi i hriamnam zong kan lakkhawh tiah Phekhung (ဖယ်ခုံ)-PDF nih cathanh an chuah.
Nihin zinglei suimilam 6:00 ah Phekhung (ဖယ်ခုံ) -PDF le mizapi vengtu ralkap phufonh nih Phekhung (ဖယ်ခုံ) Luaipata(လွယ်ပါသာ) tlangpar le Kungsung(ကုန်းဆုံ) tlang ah umhmun khuarmi ralhrang phu hna cu an kah hna i, kaphnih kahdohnak cu suimilam pakhat chung hrawng a rau i ralhrang minung 5 nak tlawmlo an thi pin ah hliamhma tuarmi an tam tiah theih a si.
Phekhung(ဖယ်ခုံ) -PDF in ralkap 3 hliamhma an tuar i pakhat cu a hliamhma a fak ngai tiah theih a si. Kaphnih kahdohnak chungah Phekhung-PDF nih ralhrang hriamnam BA100 zuunkhat (ဘီအေ ၁၀၀ တစ်လက်) , MA2 zuunkhat, MA3 zuunkhat le kuan zeimawzat pin ah hriamnam dangdang hna an lak khawh. Phekhung ဖယ်ခုံ-PDF nih an kah mi SAC ralhrang hna hi tat-mah 55 kuttang um khah-lah-yiah 7 an si tiah Phekhung (ဖယ်ခုံ) -PDF nih cathanh an chuah. Crd: The Chin Post
Phapun Ummi Ralhrang Ngunkhuai Kholhnak Zung KNLA Nih An Hrawh: KNU bridage 5 hmunhma phapun(Mutraw) pengkomhYunsalin tiva (ယွန်းစလင်း) hnu lei kap ah ummi ralhrang ngunkhuai kolhnak zung cu KNLA nih an luhhnawh i an hrawh. Kahdohnak voi 4 a chuak i ralhrang 3 an thi, 2 hliam an tuar, tiah theih a si.
Sualnak ngei lo mipi nih rethei ngai in an kawl mi phaisa hramhram in a hal tawntu, Thumade(ထူမဒဲ) khua ah ummi ralhrang kuttang um ngunkhuai kholhnak zung cu KNLA bridage 5 battalion, 15 battalio 2 nih an luh hnawh i an hrawh, tiah Mutraw thawngzamhnak nih a langhter.
February 20 zing Sml-8:30 ah Kahicu(ကဟီးကျိုး) ralhrang sakhan cu sakhan ralhrang pawl ti an than karlak ah KNLA nih luh hnawh in an doh hna i ralhrang 1 a thi. Cun, Sml- 9:15 ah Mepuhkhi(မဲပုခီး) ah voikhat, Ngia-tah-yu-cu (ညာတဃိုကျိုး) ah voikhat, Mewai(မဲဝိုင်) ah voikhat KNLA nih an doh hna.
Ralhrang 2 an thi i 2 hliam an tuar, tiah theih a si. Mutraw pengkomh chung ah ri lonh in a rak lut mi ralhrang phu hna cu February ni 19 zing Sml- 9:42 ah Thumawde(ထူမောဒဲ) ah hriamngan lung 3 in an kah caah khuachung mipi inn pathum a rawk, tiah KNU bridage 5 thawng an thanh. Crd: The Chin Post
Shan-Kayinni lei Mubae (မိုးဗွဲ) khuapawng February 16 in ralhrang phu le mizapi Kayinni ralkap phufonh kar ni 6 chung kahdohnak ah ralhrang phu lei in minung 61 an thi i, raltuknak Tank 2 le ralhrang motor 3 cu kan hrawh, tiah KNDF nih nihin February 22 ah cathanh an chuah. February 16 thok in ralhrang phu hna cu Mubae(မိုးဗွဲ) khuachung ah umhmun an khuar i, cu ralhrang phu hna nih cun rallam hmunthum in an sial.
Kahdohnak chung ah ralhrang phu lei nih vanlawng, raltuknak Tank le hriamngan hmang in an kah hna. Ralhrang phu hna nih hin vanlei in voi 21 tiang an kah hna, tiah KNDF phu nih an chim. Mubae (မိုးဗြဲ) ummi khah-mah-yiah 422, Loikaw (လွိုင်ကော်) ummi khah-lah-yiah 250 le khah-lah-yiah-lah 261, Demoso (ဒီးမော့ဆို) peng ummi khah-mah-yiah 427 nih 120mm, 80mm he nikhat ah vou 100 hrawng kahdohnak chungah voi 500 leng an kah hna.
KNDF lei in minung 5 le mizapi vengtu ralkap phufonh le mipi lei in minung 10 leng an nunnak a liam ve, tiah theih a si. Kahdohnak chung ah ralhrang phu hriamthil kuan cheukhat cu kan lak khawh tiah KNDF nih an chim. Mubae (မိုးဗြဲ) le Warisu Pahlaing (ဝါရီဆူးပလှိုင်) kahdohnak ah ralhrang phu lei nih Warisu Pahlaing (ဝါရီဆူးပလှိုင်) khua le Witeku(ဝီသဲကူး) khuachung mipi umnak inn cu meikhangh in an hrawh lengah khuami hna cu ralkham ah an hman hna, tiah KNDF nih cathanh an chuah.
