Mipi Vengtu Ralkap Nih SAC Ralkap 28 An Thah Than Hna, PDF Lei 2 An Nunnak Liam Ve
Myanmar ram pumpi in dohthlennak tuah hnu 2022 March 10, nikhat chung kahdohnak ah SAC ralkap an 28 an thi i PDF 2 an nunnak a liam, tiah Yangon Khat Thit nih cazin a laak ning theih a si. Cazin ning ah SAC ralkap a thi mi hi Karenni ramkulh Loikaw ah 3, Taningtari peng ah 1,
Mangwe ramṭhen ah 3, Sagaing ramṭhen Watlet ah 1, Karen ramkulh Laykekaw ah 5, Taantaunggyi ah 3, Saw ah 8, an dihlak 28 an si. Chin ramkulh, Falam peng ah 4 CDM an lut. PDF lei in Loikaw ah 2 an nunnak a liam. Credit: The Chin Post
Karenni ramkulh, Demoso peng, Dawyohku(ဒေါရောက်ခူ) khua cu SAC ralkap nih nihin March 11 zing Sml 4 ah voi 4 bomb an thlak i minung pakhat a thi lengah inn zong an rawk, tiah tualchung thawngzamhnak nih an thanh. Sml 7 hrawng zong ah vanlawng 2 in voi 3 bomb an thlak ṭhan, tiah theih a si. Bomb thlak ruangah tualchung mi a thi le hliam a tuar mi zat fiangfai in theih khawh a si rih lo.
Shan-Karenni aa pehnak Warisupaline(ဝါရီဆူးပလိုင်) khua ah umhmun a khuar mi SAC ralkap phu cu nizaan March 10 zing ah Karenni ralkap phufonh nih an doh hna. Kahdohnak hi zing Sml 8 in chunhnu Sml 2 tiang a rau. SAC ralkap lei a thi mi an um nain zeizat dah an si ti bel fianter khawh a si rih lo. SAC ralkap motor pakhat zong an hrawh, tiah KNDF batallion 3 Phekhung hmunhma thawngzamhnak nih an thanh.
Cu SAC ralkap hna cu KNDF batallion 3, batallion 7, batallion 11, le mipi vengtu ralkap phu hna i bawm nih an doh hna i mizapi ralkap hliam tuar um loin hnu an tolh ṭhan, tiah KNDF batallion 3 nih an thanh.
March 7 thok in Demoso peng Pupha khua lei ah rallam a sial mi SAC ralkap phu nih Pupha khua inn 30 cu nizaan march 10 ah an khangh hnu ah vanlawng in bomb an thlak caah Dawngankha(ဒေါငံခါး) sang phungki nu pawl umnak inn le tar zohkhenhnak inn an rawk, tiah theih a si.
Pale Peng Nawyu Khua SAC Ralkap Phu Nih An Khangh: Sagaing ramṭhen, Yinmapin pengkomh, Pale peng Nawyu(နှောရိုး) khua cu nizaan March 10, zaan Sml 8 hrawng ah SAC ralkap tampi nih an khangh, tiah tualchung mi nih an chim.
Ziphyokung(ဇီးဖြူကုန်း) khua ah umhmun a khuar mi SAC ralkap minung 100 tluk cu nizaan zing Sml 9 tluk ah khuachung an lut i zaan Sml 8 ah inn an khangh, tiah theih a si. Nawyu khua hi inn 200 tluk khuasa an si i milu a thong in an um. Khua mi cu a himnak hmun ah an zaam, tiah theih a si. March 4 ah khan Pale peng, Ziphyokung khua ah SAC ralkap le tualchung hriamtlai phu hna kar ah kahdohnak a rak chuak i SAC lei nih Mi-35 raltuknak helicopter in an rak kah hna. Credit: The Chin Post
