Mipi Vengtu Ralkap Phu Hna Le Ralhrang Kar Ni 6 Chung Kahdohnak A Chuak, Ralhrang 60 Leng An Thi

Shan-Kayinni lei Mubae (မိုးဗွဲ) khuapawng February 16 in ralhrang phu le mizapi Kayinni ralkap phufonh kar ni 6 chung kahdohnak ah ralhrang phu lei in minung 61 an thi i, raltuknak Tank 2 le ralhrang motor 3 cu kan hrawh, tiah KNDF nih nihin February 22 ah cathanh an chuah.

February 16 thok in ralhrang phu hna cu Mubae(မိုးဗွဲ) khuachung ah umhmun an khuar i, cu ralhrang phu hna nih cun rallam hmunthum in an sial. Kahdohnak chung ah ralhrang phu lei nih vanlawng, raltuknak Tank le hriamngan hmang in an kah hna. Ralhrang phu hna nih hin vanlei in voi 21 tiang an kah hna, tiah KNDF phu nih an chim.

Mubae (မိုးဗြဲ) ummi khah-mah-yiah 422, Loikaw (လွိုင်ကော်) ummi khah-lah-yiah 250 le khah-lah-yiah-lah 261, Demoso (ဒီးမော့ဆို) peng ummi khah-mah-yiah 427 nih 120mm, 80mm he nikhat ah vou 100 hrawng kahdohnak chungah voi 500 leng an kah hna. KNDF lei in minung 5 le mizapi vengtu ralkap phufonh le mipi lei in minung 10 leng an nunnak a liam ve, tiah theih a si.

Kahdohnak chung ah ralhrang phu hriamthil kuan cheukhat cu kan lak khawh tiah KNDF nih an chim. Mubae (မိုးဗြဲ) le Warisu Pahlaing (ဝါရီဆူးပလှိုင်) kahdohnak ah ralhrang phu lei nih Warisu Pahlaing (ဝါရီဆူးပလှိုင်) khua le Witeku(ဝီသဲကူး) khuachung mipi umnak inn cu meikhangh in an hrawh lengah khuami hna cu ralkham ah an hman hna, tiah KNDF nih cathanh an chuah. Credit; The Chin Post

Dawei Defence Min In Leirawitu Pakhat An Fimtawl: Tanintharyi ramṭhen, Dawei pengkulh, Leikyepyaung khua ah a um mi U Phae Lwin cu ralhrang sin ah thawngpetu a si an ti caah kan fimtawl, tiah Dawei Defense Force(DDF) min in February 21 ah cathanh chuah a rak si.

Dawei pengkulh mipi vengtu ralkap funtom phu DDF nih cu cawlcanghnak kong cu ‘kan theihpi hna lo,’ tiah cathanh an chuah ve. Cucaah leirawitu fimtawl kongkau ah tlukruannak a um khawh nakhnga DDF nih ṭawlrel ding in Dawei pengkulh Strike Committee nih nawlnak cathanh an chuah.

DDF nih Cathanh an chuah mi cu Dawei pengkulh mipi vengtu ralkap hna i bawm in kan tuah mi a si, tiah an ṭial. “Thah a tong mi a chungkhar hna he zong kan i tong cang i thil sining kan hlathlai dih hnu ah SAC ralhrang sin thawngpetu a si timi theihpinak/fehternak zong a um lo mi a si. Cuhlan zong ah leirawitu ah ruah mi mino nu pakhat an rak thah bal cang.

Cu pinah leirawitu inn pakhat bomb an puah i, aa tel ve lo mi kum 4 ngakchia pakhat le an nu nih an rak thi phah fawn,” tiah Dawei pengkulh Strike Committee chungtel pakhat nih BBC ah a chim. Cu pinah NUG le Human Right lei rianṭuantu phu zong nih phungninglo tuahsernak kong ah tlukruang te i tawlrel ding in an duhnak cathanh ah an langhter. Crd: The Chin Post