Mizoram Ah Kal Aa Timmi Matupi Minung P 2 Hna Cu Ralhrang Nih Lampi Ah Bomb In An Puah Hnawh Hna Pakhat Hmunril Ah A Nunnak Liam
Chin ramkulh, Matupi peng in Mizoram lei ah motorcycle in khualtlawn ai timmi minung 2 cu lampi ah bomb nih a puah hna i pakhat hmunri ah a nunnak a liam, pakhat hliamfak a tuar tiah theih a si.
” An nih hi Matupi khuachung ah inn an hlang, ralhrang nih khual cazin an chek caah chuah ai timmi an si lampi ah bomb nih a puah hna tiah theih a si. pakhat cu hmunri ah a nunnak liam, pakhat a dirhmun hi thinphang a si, hi bomb hi mi zei nih dah an hmanh ti theih a si lo tiah khuami “nih an chim.
relchap..Kalay-Rih Karlak A Kalmi Mawṭaw SAC Ralkap Nih A Hleihluak Tuk In Phaisa An Hal Hna!
Kalay in India ramri Rih lei ah a kal mi thilphur le khualtlawng phur mawṭaw hna cu SAC ralkap nih hmun 3 ah gate i ser in, a hleihluak tuk in phaisa an hal hna, tiah theih a si.
Kalay le Rih thilphur mawṭaw khaltu pakhat nih cun, “Facang kan phurh a si ahcun facang bag khat ah thongkhat in an kan laak i, Mawṭaw pakhat ah singkhat(100,000) tluk an kan laak. Mehhang le a dang si ahcun thong 60 hrawng an kan laak,” tiah a chim. SAC ralkap pawl nih hin Meng 8, Khaikam, le Taingen ti in hmun 3 ah gate an i ser i, Khualtlawng phurtu mawṭaw hna cu meng 8 gate ah thong 10 , Khaikam gate ah thong 10 le Taingen ah thong 5 ti in phaisa an hal hna.
Khualtlawng phurtu mawṭaw khal pakhat nih cun, “A hlan ah cun thong 5 lawng an rak laak tawn, atu cu thong 10 an kan hal cang,” ti in a chim. Cucaah Kalay-Rih karlak cu mawṭaw citman a kai tuk i Kalay in Rih lei kai ah minung pakhat thong 40 an laak i Rih in Kalay lei ṭum ah thong 70 an laak hna, tiah theih a si.
THAWNGDANG…KNU brigade 4 hmunhma Baik-Dawei pengkomh ah SAC ralkap phu hna le KNLA kar kahdohnak a chuak ṭhan i, SAC ralkap bawi pakhat lengah chungtel tampi an thi i, an hriamthil le phaisa zong an laak, tiah theih a si. MA meithal 4, pistol 1, RPG 1, hriamngan 2, Myanmar phaisa, Thailand phaisa le ralhriam thilri dangdang zong an laak, tiah theih a si.
Kayin ramkulh, KNU brigade 6 hmunhma Kawkareik-Kyain Seikgyi motor lampi i um mi Wizakung(ဝိဇ္ဇာကုန်း) khua ah khualtlawng mipi phaisa a haltu SAC ralkap kuttang riantuan Border Guard Force(BGF) chungtel 2 cu nihin March 14 zinglei 8:30 hrawng ah meithal kahnak in an thi, tiah khuachung thawngzamhnak nih an langhter.
KNU brigade 6 hmunhma Kyain Seikgyi (ကြာအင်းဆိပ်ကြီး) um mi khah-lah-yiah 32 battalion hmai ah nihin March 14 zinglei suimilam 9:00 in 9:30 tiang SAC ralkap le KNLA phufonh an i kap i, suimilam 10:00 hrawng ah Kyain Seikgyi (ကြာအင်းဆိပ်ကြီး), Mingalakung(မင်္ဂလာကုန်း) nitlak lei ah kahdohnak a chuak ṭhan. Cu kahdohnak ah cun khua mi minung pakhat a nunnak a liam i, pakhat nih hliam a tuar, tiah theih a si.
