Press "Enter" to skip to content

Mizoram Ah Rihaisii Ruangah Minung (7) An Tlaih Than Cang Hna

CYLA DRS Nih 20-26 Sikpar Ah Minung 7 An Tlaih Hna. Central Lairam, Lawngtlai, 2022 Sikpar 26 : CYLA DRS nih 2022 Sikpar 20-26 ah rithaisii le rithaisii he aa pehtlaimi minung 7 an tlaih hna, an tlaihmi hna cu a tanglei i langhtermi bantuk hi an si.

1. Hnehzoa , College Veng Lawngtlai, 2. Solomona Zothankhuma, College Veng Lawngtlai, 3. Isak Rinchungnunga , College Veng Lawngtlai, 4. Ramdinmawia, Lawngtlai Vengpui, 5. Lalfangzaua, Lawngtlai Vengpui, 6. Godiel Lalawmpuia, College Veng, 7. Lalremruata, College Veng

Credit: The Lairam Times

Relchap; Laikhal Nun le Khuasik Thla; Khua caan si ning nih fuur caan a van i khuasik caan chung ah a hun kan luhpi. Ruah a sur ti lo, nain tichum nih khuazung a khuh i ni mui hmuh a si lo. November hi a kik tuk cu a si lo nain angki lum lo cun tuar khawh phun a si lo.

Zing arkhuang ko ah hin ngakchia thlulo upa thlulo in tappi kulh cio a si. Ngakchia deuh paoh tap-chak ah mei toh phung a si ti bang, meicung Kawm peh thlai tang ah meikhu he i chaih si. Santlaih lo chinchap ah cun angki lum thitha hmanh kan i hruk khawh hna lo tikah mei pawng thut kha kan khualumnak bik a rak si ko.

Tichum a hung tian, tlangpang thingram kung lakah chengcher (Cherry) paar cuanghlei nih a dawhpi. Pawcawmnak rianpi (leileh le tlanglo tuah) rian aa lim dih cang i ol-zan lio a si. Fur caan lio ah khua hngak taar le ngakchia rual zong an umhar le lilen ai zia cang. Rian um lio caan a si tikah inn hngak an tam.

Khuasik thla a si nain inn pawng dumhau ah cinthlak thingthei ei za an tam lio a si tikah, inn hngak nunau rual pawl mi inntual nitlang hawrh pah, hrih zoh pah, bia-nuam sai pah in ei tbk luklak in nitlak a si. Pa rual zong cu mi innhmai ah nitlang hawrh pah biaphawng den, ramkhel kong ceih, Christmas kong ceih le khingcangh (kah) tibantuk luala in ni an tla khim ve.

Khuasik cu ni a tawi tikah, zanlei sukkhal can ni a ti hrawng khin cun lo lam cu a tur bak in tur. A thlawhsial lio ah rianpi tuan kho lo ngakchia rual pheikalh tunh kal pawl nih le kheh, viu le kio thawng nih a tlirh in tlirh. Zu-dawn riah kalna, a laang in kalna an i kalh sup.

Ngakchia rual lawng hlah, upa zong cu lak ah itel ve hna. Zing arkhuang thawh cut hlan ah pheikalh veng ding ngakchia nih mi a kan hlauh thlu. A cikpak kal cu kan ningti ti bang, a tunh namiang in an i sawm. Lampi i vaan awk maucher tom alh pipi he inn khat hnu inn khat “Kawi Bet, Kawi Luai…tho cang u,” ti’n.

Hnawhsare pheikalh ven dih hnu sianginn kai tanh a hauh caah an mawh lo. Farrawn kan hawipa bang nih cun, “Pheikalh ven kan van kal i a langtlang in kan phei kalh hri reng nawn mi kan van hmuh hrim ahcun a nuam tuk. Khi hmanh khi tangka sing khat in ka hal hna sehlaw ka siang lai lo,” a rak ti phah.

Christmas a nai cang tihi, a zeidang nakin khuazung tlirh in ngaih awk tha Christmas hla an chuah mi in hngalh khawh si. Biakinn pumh caan i “Vawlei lawm tuah, Jesuh a tum” ti mi le “Na Bawi thutdan le sui luchin” ti mi hla an sak bang cun, hla-caang au hau lo, ngakchia zong nih mitchinh bu in an sak khawh.

Hla-caang van au cicet ahcun ai chawhkanh ding in an um. Tu kum Christmas cu ram dang um mi nih a kan tuahpiak lai ti si kaw, ni khat lawng a si bal lai lo, ni hnih tal cu an peh lai ti hrawng i ceih zong a hung si pah. Zeidang cu um rih seh, sacek ei hrim a hawt bak in a haw tawk zong kan thahnem cu mu.

Asinain nungak tlangval pawl ngaih mi hi phun dangte a si. A buh le sa le a Christmas a ti theng lo. Christmas le kum thar kar bawlung puai le hnianghrawm kal lai rumro a tiar bak in an i tiar. Khuasik thla hi mah le huam zawng cio tuah caan a si ko rua! Aho thinlung hmanh ah ngaihnak in a khat dih.

Christmas a thawtnam hi khuasik caan a si tihi, hi thla ah thal lio a sinak ram ka um hnu ceo in ka fiang. Lai khuate nun khuasik temtuar kha Christmas thawtnak a rak si bik ko. Tanghra kan kai lio i Tahtlang kan hawipa nih “Ahodah ka hngilh kar ah ka ngal a ka thleng,” tiah zing arkhuang in a rak au bang, kan taksa le ti kik zong a van i ral pah ziah mah.

Thli kik nih a hun kan chem, kan i hngalh lo kar ah kan hnar kua in tifimte a hung luang. Pathian pek mi kokek hmur a nak zual. Cutluk kik lak i ngal-pacaar khawn a fah zia. Kan holh hmanh ah “Fahniang thih le ngal-pacaar khawn” kan ngeih phahnak hi, Laikhal nun le khuasik thla thawtnamnak phun khat a rak si. Crd; Salai C. Twintwin

Be First to Comment

Leave a Reply

Your email address will not be published. Required fields are marked *