Naypyidaw lak khawh tung loin TT lak khawh ah zeital a thahnem hnga maw? ‘Nunnak tampi pek in Thantlang lak khawh taktak siseh law zeidah a kan thahnem hnga?’

Naypyidaw lak khawh tung loin TT lak khawh ah zeital a thahnem hnga maw? ‘Nunnak tampi pek in Thantlang lak khawh taktak siseh law zeidah a kan thahnem hnga?’ timi khi biatak ngai in ka tuaktan tawn. MAH ralkap nih an thazaang dihlak in lak than an i tim lai i vanlawng le miakpi in bomb an thlak lengmang lai caah khuami pakhat tal an kir ngam hnga maw? timi khi ka ruat ngai.

Khuachung ah hriamnam hme in voithum li an i kap i khuami dihlak rak zam dih si kaw, khawika a tla lai theih lomi bomb ngan pipi kha vanlawng le miakpi in rak kah lengmang hna sehlaw aho dah Tt ah khua asa ngam hnga?

MAH ralkap a hram in bongh cikcek ding ah le a fawi hoi lo. Myanmar ramchung myone 330 a um i 297 (90%) cu an dai, ralkap nih tha tein an control khawh ko. A tangmi 37 lawng hi tha tein an control khawh rih lo caah Martial Law an thanh kha a si. Hi myone 37 zong ah khuapi 37 ning in ralkap nih an control peng ko fawn.

Mah myone 37 ah ral a thawh nak kum 2 a si cang nain myo pakhat tal hmanh lak khawh a si rih lo. Hi dirhmun in ralkap nih 100% an control khawh ciami myone dang 297 bak va kal hnawh in va lak chap ding cu a fawi bak lomi khi a si. Thluak ngei ko mi nih cun ’tei awk an tha maw’ timi khi tuaktan khawh tuk a si ko.

Miphun dawtu kan mino hna cu an thinhun lio le an lungfah lio a si caah thi linh lung in nunnak pek in TT lak zong an ngamh tuk ko lai. Nain, cunglei upa lungfim nih cun emotion kha kaltak rih in miphun le kan mino nunnak caah a tha bik lai/a him bik lai timi biachah nak kha an tuah awk a si.

A taktak ah thahnem nak pelte hmanh a chuahpi lo ding Tt lak nak ah kan mino nunnak tam tuk a liam ding khi a phu bak lo, miphun a dawmi kan pale nih Pathian hmai khukbil thlacam buin khua nan ruah than a hau, caan a tlai tuk hlan ah. Credit; Salai Lungthin Tum