Naypyidaw Vanlawng Bual Ah Russia Hriamnam Phurtu Vanlawng A Tum Than Cang E
Hriamthil Phurtu Russia Vanlawng Naypyidaw Vanlawng Tual Ah A Ṭum. Russia in hriamthil phurtu valawng RA 78765(IL76) nih nihin March ni 19, zinglei ah Naypyidaw vanlawng tual ah thilri a ṭhumh tiah theih a si.
Russia hriamthil phurtu vanlawng cu March ni 19, zinglei ah Naypyidaw ah a phan. Cu vanlawng cu March ni 16 ah Russia ram Moscow in St Petersburg ah a kal, March ni 18 ah St Petersburg in Novosibirsk, March ni 19 ah Novosibirsk in Naypyidaw ah a phan.
Russia thilphur vanlawng RA-78765 (IL76) cu Naypyidaw in Bangladesh in Russia lei ah a kir lai tiah theih a si. SAC ralkap nih uknak a laak 2021 thawk in Russia le SAC kar i hawikomhnak cu a hlannak in i pehtlaihnak a ṭhat chin pin ah SAC a ṭanhtu ram ngan a si caah SAC ralkap nih Russia ram cu a bochan ngaimi ram a si tiah theih a si. The Chin Post
Breaking News: Trump An Tlaih Khawh Men. US President hlun Donald Trump cu sualpuhnak pakhat ruangah hmaizarh nihnih ni March 21 ah khin an tlaih khawh men tiah theih a si.
Hi kong hi amah Trump nih amah Social Media a simi TruthSocial ah a tialmi a si. Sual an puhnak cu kum 2016 thimnak hlan deuh ah blue-film lemcang a simi Stormy Daniel cu a kaa phihnak ah Trump sihni hna nih tangka an pek timi a si.
Hi sualpuhnak hi New York khuapi Manhattan sihni zungin a puangmi a si. Hi kongah Manhattan sihni zung nih cun biafiang an chim duh rih lo. Stormy Daniel nih Trump he pehtlaihnak an ngeih balnak kong a rak chim i, asinain cucu Trump nih a dik lo tiah a al ve.
Trump hi an tutan sual an puhmi kongah taza an cuai i an tlaih taktak ahcun US tuanbia ah President hlun an tlaih hmasa bik a si lai, hi hlan ah a um bal lomi a si tiah Akron University in Political Science Professor David B.Cohen nih a chim. Cu pinah 2024 thimnak kong zongah tampi a hnorsuan khawh tiah ramkhel thiamsang hna nih an chim. Crd; The Chin Post
Relchap; HPO/CDF-Hualngoram nih nihin March ni 18 ah mipi sin ah theihternak le ralrin peknak cathanh an chuah. “Chinland Joint Defense Committee (CJDC) biachahnak (02/2022) bang in HPO/CDF-Hualngoram ramchung ah SAC ralkap he pehtlaihnak a ngeimi zeibantuk rian hmanh ṭuan lo ding in 2022 February 24 ni ah cathanh chuah in mipi sin ah theihternak kan rak tuah cang.
SAC ralkap kuttang ah rian a ṭuanmi cu phungning tein dantat an si lai. Nihin March ni 18 zong ah SAC ralkap he hnatlaknak ngei in Ministry of Construction Department of Rural Road Development tang ah rianṭuan lio, phung a buarmi John and Joshua Company Team (kum tling lo ngakchia le tar upa tel lo) hna cu biafiang deuh kan theih khawhnak hnga ca ah tiin kan hren rih hna.
Hi rian he pehtlaihnak a ngeimi paoh phungning tein dantatnak kan pek hna lai tiah mipi sin ah theihternak le ralrin peknak kan rak tuah ṭhan” tiah HPO/CDF-Hualngoram nih an cathanh chuahmi ah an langhter.
