Ngeihchia Tuk E : Sizung A Rak Phan mi Nunnak A Ngei Ti Lomi Hngakchia kum (7) Nute A Nunnak Chan Dingin

Nunnak ngei tilo buin sizung ah an rak phakpi mi hngakchia kum (7) nute “Khin Myo Chit” a nunnak chanh dingin ai zuam mi Doctor pa nih a tialmi ca mipi theih dingin rak share ve thanmi a si . “Doctor ka tuan hnu ah a voihnih nak ka mitthli a tlak ni , Kum(7) te lawng a si rih ko mi hngakchia innchung te ah a um ko mi sualnak ngeilo hngakchia tiang hmanh zuahlo in meithal in a kap kho tu minung thinlung a ngei tilo mi ralkap . Nunnak a ngei tilo mi hngakchia kum (7) mi ka sin ah chanchannak nganpi he an rak phakpi ni , ka mitthli tla lo dingin kai zuam tuk ve nain mi mit hmuh lo nak ah cun ka mitthli donhcawk lo in a luang i mitthli tla lo dingin kai zuam nak cu ka hlawh a tling kho ti lo , hi ni hi doctor ka tuan hnu ah a voihnih nak mizaw damlo cung i ka mitthli a tlak a si .

Minung thinlung a ngei ve lomi le hriamnam he mipi a dir onh mi kan rampi, a diklo mi zong a diklo tiah kan chimrel ngam tilo nak kan ram , a diklo tiah theih tuk ko bu in cu a diklo mi cu phaisa duh ruang ah le keimah le ka chungkhar kan him ah a za tiah ai ruat i a diklo mi leikap ah a dir duh mi pawl umnak kan ram ah minung na rak chuak ve i na rak um ve mi hi cu ee ka fanu na pamhmai tuk hringhran ko eee .

Amah ca lawng ai ruatmi le a chungkhar an him poah ah cun a poilo tiah ai ruat i meithal he mipi nunnak a lak thluahmah mi ram ah cun va um hrimhrim ti hlah mu ka fanu . Na nunnak chanh dingin ruahchan nak nganpi he ka sin ah an rak in phakpi ve ko nain na caah zeihmanh tuahpiak khawhmi kan ngeihlo caah rak ka ngaithiam hram mu ka fanu .

Sikho sehlaw nangmah nih na tuarmi vialte nganfahnak hi keimah nih tuar ning law na kalnak ding lam tu hi keimah nih zawh ning law ka duh nain , nangle kei hi dawtnak le zangfahnak pakhat te hmanh a um velo nak ram ah kan rak chuah hi kan vanchia tuk titu in i ruat ko usih mu ka fanu , lungdai tein vai i din chung ne law na nunnak na pek piak mi hi i dohnak nih teinak a hmuh tik ni ah cun vankhin rak kan cuan ve te law ka fanu ” .

Hi ca hi nizan i ralkap pawl nih an kah mi “Khin Myo Chit” kum 7 nute a nunnak chanh dingin ai zuam mi doctor pa nih a tialmi a si i a reltu thinlung a khuai dihtu a si .