Press "Enter" to skip to content

Ni Hin Kawl Ram Boruak Ah Zumtu A Dir Hmun Awk, Zumtu nih hriamtlaih hi tha kan pek awk asi maw? Rev.Van Hlei Thang

Ni Hin Kawl Ram Boruak Ah Zumtu A Dir Hmun Awk,Rev.Van Hlei Thang
==========================================================

Lam 8: 30 “Na relmi hi a sullam na hngal maw?”
Lk 10: 26 “Cathiang nih an chimhmi, zeitindah a sullam nai lak?”

Tulio thil kan ton mi hi a homanh nih duhmi a si loh. Ralkap bawi pakhat hnih nih anmah ca long ruat in Kawlram mipi duhnak kha Meithal in an tlaihhrem ruang ah duh lo buin a hong chuakmi a si. Thil dik lo zoh kho loin dai tein duhnak alanghter mi pawl cu rammi vending in hlawh pek in, hriam pekmi nih mipi cu zalam cung ah ah an thah hna. Kawlram cu Thahnawnnak hmun ah a ser. A tlaih hna. Thong an thlak hna. Nizan tihni in, Innchung ah a luh hnawh hna. A thlaih hna. A thainzing ah a ruak in rak la uh an ti mi an tlawm ti loh. (Nizan hrim ah 90 Leng an thah hna. An hmuhmi poh an kah hba. BBC). Zoh ngam hmanh a si lo. Kan nun nih a celh loh. Nan si cio ko.

Hi ah hin tuanvo kan ngei maw?
Kan ngei bak. Kan mithmai bak a si. Kan chumtual le kan laihritannak kan khua le kan ram le kan miphun cung bak ah a si. Cu caah tuanvo kan ngei. Kan Bible I Samaria Mitha pa, tuanbia nih a kan chimhmi cu, kha Damiah nih an vuakdenmi pa, a va hmu ko tung I a bawm lo tu kha Pathian lung tong lo cu an si. Cu caah Rev Martin Luther King Jr nih “Thil tha lo a do lo tu cu a bawmtu an si. Cun hi bantuk caan lio ah hin cun daitein um cu miphun leiruaitu an si” a ti phah.

Cun “Ramleng ah kan um cang, kanmah lem kan si loh” ti zong Bible mit in “Sual” bak a si.
Esther cauk nih a fian ter. Judah mi harnak an ton lio ah Esther cu siangpahrang nu a si cang. Nain a pate nih “Hi bantuk nikhua ah dai tein na um ko ahcun nangmah le na pa innchungkhar cu chiatserhnak si lai”. A hei peh rih, “Hi bantuk caan caah hin dahkaw Pennak chung na phak hi si ko hnga” a ti. Moses zong, a mah cu Siangpahrang tupa a si cang. Nain a miphun sal an tan kha a zoh khawh hna loh. David nih Goliath a tuk zong khi “A miphun hna thinphang in Elah Nelrawn ah Goliath nih a tuah hna kha zoh khawh lonak hna in caah a si. Amah cu ralkap zong a si loh. “Ka sai loh” ti khawh a si.

Zumtu nih hriamtlaih hi tha kan pek awk asi maw?
Hi biahalnak hi direct in lehthiam ding bia a si loh. Pawngkam sining tampi nih lai a rel. Bible thiam pawl hmurka he ai then kho lo mi cu, “pawngkam thilsining, context hi a biapi tuk” ti zungzal a si. A dik fawn. Tutan kan context hi zoh hmanh. Ralkap an sual khawh ning hi chimpit a si. An kan tuahtoning hi, minung holh zong nih a tlinh loh. Thawngpang zoh lo le kan um kho loh. Zoh le ka zoh ngam loh. Chungsivang in kan um dih hna. A fak ti pin hi chim awk um loh. Doh lo awk hrim an that lonak zong tutan ah a lang khun.

Cu caah hi biahalnak a sullam cu, “Hi thil tha lo dohnak (phundang in) Thiltha tuahnak ah zumtu kan I tel awk a si maw?”. Hei hal vima ahcun, “Thil tha lo dohnak ah Pathian Phaisa (1/10) hman rai a si maw?” ti khi a si hnga. “Tel rilmal, Hmang rilmal lai hme teh” ti pin chim ding a um tung lo.

Nihin dirhmun in Meithal I lak zong cu kan mawh maw zei? A ngai ngai cu, Pathian nih “zeidah kan tuah tinak in zei lungput in dah kan tuah” ti a zoh deuh zungzal. Bible tha tein zoh. Pathian nih “Raithawi uh a ti. An van thawi le “nan raithawinak ka fih a ti”. Jesuh thlacam a kan fial. Nain “Mi depde thlacam in cam hlah uh” a ti. Pek zong ah pek cio cio ai lo loh. Nuhmei nu thawhlawm nih a lung a ton kha kan hngalh. Herod nih Biakinn dawh tak tak a sak. Nain Khrih dotu thiam a si.

Tutan hi, meithal an cawk pek, an va doh pek ah, el awk tha lomi cu “Mithah duh le minawn duh” ruang ah a si hrim hrim loh. Mithat le lainawng khamnak caah a si lehlam. Lamdang a um lo caah thimmi a si (Khatlei hi hruhru nga nga bak an si cu mu). Thil tha lo kham duh ah a si. Phung tha lo khamnak caah a si. Ralkap tuan kong ah Bible ah hi tin kan hmuh. Tipil petu Johan kha, ralkap pawl nih “Kannih teh zeitin kan um awk a si?” tiah an hal. A lehnak hna, zapi fianding in leh ahcun, “Ralkap in va ngol uh a ti hna loh. Ding te le Fel tein va tuan uh” ti a si ko. Dinnak caah tuan a fial hna khi a si.

Caantha a si
Nihin hi ralkap nih Uknak a la kho naisai loh. “TV chanel 2 long a lak” an ti mi hi a dik. Ramleng ah a sung. Ram uknak thari biapi pakhat, Zungrian a tuan kho loh. Upadi a hei chuah le a ho hmanh nih kan zul duh loh. Ningzak khi an si lehlam. Tuan ah a tlu hrim lai. Kannih caah ah caanrem a si. Kawl mi nih tlangcungmi kan temtuarnak vialte an theithiam lo ngai ton. Nain nihin cu an fiang cang. Mi zeimaw le bang nih “Rak kan ngaithiam uh” ti tiang an ti cang. Cu pin ah nihin kan ram sining hi “Uktu a um loh. Uknak ai cuhmi long an um. Cu caah 1947 hlan, Kan ram kanmah tein kan rak I uk lio” he an tahchunh. Cu caah kan tang cio lai I, kan tei lai. Kan duhmi “Self Determination” zong kan ser khawh fawn lai. Ralkap hi a nihin tiang a hlawh a tling loh.

CNF rian saupi a tuan cang caah palhnak zong angei men ko lai. Upa bia ah, “Rian a tuanmi cu an kut a hnawm” ti a si cu mu. An si loning in purhdah caan zong a tampi lai. Nain van thleidan ka duhmi cu, “tutan hi CNF bawmh a si theng loh. Thiltha kan tuah tu a si. Thil tha lo kan doh a si. Cu dohnak ah Platform kan ngeih chun mite an si ca tu ah a si deuh. Thildik duh ah nunnak a sungmi, philh ni nan um lai lo. Lam a zawhmi le CDM a tuahmi zong kan Hero tak tak nan si. Kan tuanbia ah nan tang zungzal lai. CNA/CNF zong thinlung tawne in upat kan pek hna. Ramtha kal kho in nuam tein um kho cio an si. Nain ram caah harnak an I thim. Tutan zong ah hin kannih cu, phaisa te long a si. Kawl khawh rihmi a si. Annih cu an nunnnak an thap. Ram caah kan pekchanh mi ai thlau tuk. Hei doh sian ding hmanh khi an si loh.

Biafe
Raldoh cu a tha hrim loh. Hrial awk a si. Nain sual nih ukmi Vulei a si caah duh lo buin ton can a um theu. Ral thawh duh ah si loh. Ral thlauh duh ah a si ton. Vulei nih tehte a khan. Nihin Kawlram hi cu dirhmun cu kan phan. Hitler kha rak doh lo sisehlaw, Pathian thimmi Judahmi zeizat riamruam dah an thih rih hnga? US civil war hi rak doh sihlahsehlaw, Minak pawl zeican riamruam dah sal in an um rih hnga. Europe ah 30 years’ war kha rak doh si hlahsehlaw, niihin Protestant kan zumhnak hi a nun khawh tung lai lo. Cu caah Theologian Norman Geisler bia donghter ka duh. “Lainawng pa, kham khawhnak dirhmun ah um ko tung I kham lo cu sual bak a si. Lainawng pa thluk te a si ve. Tlaihremnak kham kho si ko bu ah kham lo zong sual lian bak a si. A chungkhar, a rak luhhnawh I, duh poh in a tu dengtu doh lo cu “Pa” ti awk hmanh ai thlak loh”. I tel lo hi sual a si lehlam.

Rf: Chin Post

Be First to Comment

Leave a Reply

Your email address will not be published. Required fields are marked *