Nihin Ah Chin Ramkulh, Kanpetlet Khuate Hna Ah Ralhrang Nih Inn An Khangh Hna

Chin ramkulh, Kanpetlet pengchung khuate cheukhat ah nihin February 22 ah ralhrang nih an luhhnawh hna i inn an duahpiak hna, tiah theih a si. Kanpetlet peng chung ah hin Febuary 19 thok in CDF-Kanpetlet le ralhrang karlak kahdohnak faak ngai a chuak, tiah theih a si.

Tualchung mi pakhat nihcun, “February 19 khan kahdohnak a chuak i nihnih chung an i kap, Cu dih in ralhrang pawl cu Masatuai khua ah an riak i inn thlalangawng an khuai dih, Khuachung ummi Solar le facang an laak dih pin ah vok le ar zong an ngan lo, khuachung ah kum upa(tar) dah lo midang cu kan um ngam lo i kan zaam.

Masatuai khua in Mawchaung khua ah an kal i cuka zong ahcun kahdohnak a chuak ṭhan i cuka cun zaan an riak. A thaizing ah lamkam ummi inn 4 an khangh,” tiah a chim. Ralhrang nih luhhnawh mi khua le ralhrang tlunkalnak lam ah a ummi khua pawl cu a himnak hmun ah kan zaam i, a zaam mi hna hi khua 6 hrawng kan si, tiah a chim chih. Crd: The Chin Post

Ralhrang minister pawl tel in minung 22 le MOGE, No.1 Minung Company le minthang U Te Zah(ဉီးတေဇ) ngeih mi Htoo Group of Company le Navy ralbawi U Ne Aung (ဉီးနေအောင်) ngeih mi IGE company cu phih kharnak le dantatnak kan tuah cang, tiah European Union (EU) nih an thanh. Ralhrang nih uknak an laak ruang ah le sualnak ngei lo mipi hna cung ah a ruang um loin an an thah hna i an tlaih hna.

Democracy hmuhkhawhnak ding ah a cawlcang mi phu pawl cu an tlaih hna i an hrem tawn hna caah atu bantuk in lehrulhnak caah daan kan tat hna hi a si. Democracy a hnursuang mi le nuhrin covo a buar mi he pehtlai in minung 65 le Organisations phu 10 cu daan kan tat cang hna, tiah EU nih a thanh. European Union(EU) ah hin Europe in ram 27 an i tel. The Chin Post

Nifatin in kahdohnak a chuahnak hmun Sian-Kaya ramri Mobae (မိုးဗွဲ) ah nizan February ni 20 ah chun nitlak ti awk in kahdohnak a chuak ṭhan i ralhrang lei an hriamthil le riahcaw a dih dih cang, tiah Loikaw PDF nih an langhter. Mobae ah February ni 16 in kahdohnak a rak chuak i nizan Mobae kahdohnak ah cun Loikaw PDF, KA, KNDF, Demoso PDF, Phekhung PDF(ဖယ်ခုံ), Mobae PDF, Eastern Central Comand le JPDF phufonh nih hmunkhat te ah an doh hna, tiah theih a si.

Mobae peng, Warisu Paline(ဝါရီဆူးပလိုင်) le Weiteku(ဝီတဲကူး) khua pawng hrawng ah zingka in zaan tiang kahdohnak a faak; mizapi vengtu ralkap 5 le Loikaw PDF 2 hliam an tuar i ṭha tein an thlop hna, tiah theih a si. Ralhrang nih khua mi pawl an inn an khanghpiak hna pin ah khuachung lam ah bomb an hmanh.

Cun, hriamngan in an kah i zanlei sang ah raltuknak helipoter 2 in mipi inn pawl an kah. Ralhrang phu hna cu vanlawng nih hriamthil le riahcaw dongcat lo in a thlak hna, tiah theih a si. Yangon Pengkulh Ah Cataar He Mino Pathum Ralhrang Nih An Kawl Hna: Yangon pengkulh, Twintae peng ah mino pathum hna cu ralhrang nih an hmanthlak elctric tung ah an taar i, a hmu mi nan um ahcun laksawng tampi kan in pek hna lai an ti, tiah khua mi sin in theih a si.

“February 19 lio te in Twintae khua, No.8 sang i electric tung pawl le minung an tamnak hmun pawl ah an hmanthlak an benh hna. Nizan ah Twintae peng, khuate lei tiang an benh cang. Mino pathum hmanthlak an taar mi hna hi an pathum ning in dohthlennak ah aa pumpe ngai mi an si,” tiah khua mi pakhat nih a chim. Ralhrang hna nih cun mino pathum a hmu ko i, a humhim mi cu kum 10 thobg thlak nan si lai, tiah an ṭialchih. The Chin Post