Nihin ah Min aung Hlaing ralbawi a Tuan Bal Mi An Thah
Mandalay ramṭhen, Pathein pengkomh SAC kuttang rianṭuan, Electric Manager Captain hlun a si mi Kyaw Ye Aung cu nihin April 19 ah kan kah thah, tiah Natsu Guerilla hriamtlai phu nih an chim. Nihin April 19 zanlei sml 5:45 minute ah Mandalay 19 lampi NanOolwin(နန်းဦးလွင်) khua kam ah an thah hi a si, tiah kan theih. Natsu hriamtlai pakhat nih cun, “Mawṭaw a khalh lio a si i ṭha tein kan ngiat.
A hnu kan zulh i hiti kan kah thah hi a si. Mawṭaw a khalh lioah cycle in kan dawi i kan kah, a mawṭaw nih mizapi ta a simi mawṭaw cu a va pah lengah cycle pakhat zong a va pah chih caah nan kan ngaihthiam naklai kan in nawl hna. A caan rem lio te i kan kah a hauh caah kan ruatthiam ko u,” tiah a chim.
Cun, Pakokku khua ṭatma 101 ah rian a ṭuanmi Aung Kyaw Pyo Oo i a pa San Nyut Oo cu April 1 zanlei 6:30 ah an rak kah thah, tiah theih a si. Sagaing pengkomh Ngaungpin khua mi San Nyut Oo cu a cal ah tleng lak in an kah i a thi, tiah theih a si.
SAC ralkap nih nawlngeihnak an lak hnu kumkhat fai chung ah mah umnak hmunhma ah um ngam loin ralzaam dirhmun a phan mi 560,000 luan an um cang, tiah United Nations Office for the Coordination of Humanitarian Affairs (UNOCHA) nih nihin April 19 ah cathanh a chuah. Mipi umnak inn, dawr le sianginn 8,000 leng SAC ralkap nih an hrawh cang i, cu chung ah cun Sagaing ramṭhen le Magwe ramṭhen ah tam bik a cang, tiah UNOCHA nih an langhter.
Kayin ramkulh chung ah SAC ralkap le KNLA kar kahdohnak a chuah ruangah minung 70,000 leng cu ralzaam dirhmun an phan, tiah KNU in ṭuanvo ngeitu Padoe Saw Taw Ni nih RFA ah a chim. Ramchung ah mah umnak hmunhma um ngam lo in ralzaam dirhmun a phan mi hi Sagaing ramṭhen in a tambik an si i, minung 230,000 leng cu ralzaam dirhmun in an phan. Kaya ramkulh chung cu a pahnihnak an si i minung 90,000 leng an si. A pathumnak ah Kayin ramkulh in an si i minung 74,000 cu ralzaam dirhmun an phan cang.
Myanmar ramchung ummi ralzaam hna chungin minung 34,500 cu India ram lei ah an zaam i, minung 1,600 cu Thailand ram lei ah an zaam, tiah an langhter chih. Cu hlan SAC ralkap nih nawlngeihnak an lak hlan ah ralzaam dirhmun in a ummi hna le, SAC ralkap nih nawlngeihnak an lak hnu ralzaam dirhmun phan mi dihlak cu sing 9 (900,000) leng an si cang tiah UNOCHA nih a langhter. The Chin Post
