Nihin Hakha Kahdohnak Thawnhpang Ralhrang Thi An Um SAC Ralkap Pawl Nih Chin Hriamtlai an Tih Tuk Caah An Zam Dih

Cawbuk Ah Chin Ralkap Nih SAC Ralkap An Kah Hna Caah Pahnih An Thi, Chin ramkulh, Hakha Cawbuk sang ah Chin ralkap nih SAC ralkap le palik an kah hna caah pahnih an thi, tiah theih a si.

Tualchung mi pakhat nih, “Nihin January 25 zinglei ah Chin ralkap nih Cawbuk sang ah SAC ralkap le palik pawl cu an kah hna i pahnih an thi. A dang SAC ralkap pawl cu an ṭih tuk caah an zam dih,” tiah a chim.

An kah hna hnu tlawmpal ah SAC ralkap pawl cu an zam dih i mi inn tangah sau lak te an i thup. An ṭih tuk caah a therh mi zong an tam ngai, cu hnuah chaklei ah an kai, tiah a chim chap.

Kahdohnak a daih hnu in SAC ralkap motor nganmi pakhat le motor hmemi pakhat in SAC ralkap pawl cu Cawbuk lei ah rang taktak in an kal, tiah theih a si.

Atu bantukin an kah hna hi Cawbuk chcek gate hngak SAC ralkap le palik nih, khualtlawng mi hna cu khua bawi le sang bawi theihpinak catlap nan i ken lawnglawng ah kan in thlah hna lai an ti hna caah Chin hriamtlai nih an kah hna a si kho men, tiah tualchung mi pakhat nih a chim. the chin Post

SAC Ralkap Nih An Rak Tlaihmi Rev. En Khat Muan An Thlah Ṭhan Cang. Section 505(b) in SAC nih taza an rak cuaimi Rev. En Khat Muan cu thla 7 hrawng an hren hnuah January 19 ah an thlah ṭhan cang, tiah theih a si.

Tedim khua, Shalom Youth Committee chungtel pakhat zong a simi Rev. En Khat Muan le Lian Shing Hmung cu Non-CDM kong he pehtlai in PDF-Zoland nih ralrin peknak cathanh an rak chuahmi cu loud speaker in an rak au caah SAC ralkap nih 2022 June 27 ah an rak tlaih hna.

Tedim khuami pakhat nih, “A ngandamnak zong a ṭha ko. PDF-Zoland nih Non-CDM kong ah cathanh an rak chuahmi an au caah SAC ralkap nih an tlaih hna i ni 100 leng an hren hna. Tedim khuanu khuapa le Pastor hna nih thlahpiak dingin SAC cu an rak nawl hna,” tiah a chim.

Rev. En Khat Muan le Lian Shing Hmung cu Tedim palik sakhan ah an chiah hna i Rev. En Khat Muan cu section 505(b) taza an cuai. Loud speaker an chiahnak inn ngeitu Lian Shing Hmung cu July 5 ah biakamnak minsen an thuter i an rak thlah cang, tiah theih a si.
The Chin Post