Nihin Kahdohnak Ah Chin Pasaltha Minung 2 An Nunnak Liam, Ralhrang Nih Dokthek Khua Ningin An Khangh Chap

Chin ramkulh, Falam- Hakha tlawnlam um Dokṭhek khua cu nihin March 2 zaanlei suimilam 4/5 hrawng ah ralhrang nih an khangh tiah, theih a si. March 2 zing thok in Chin National Army(CNA), Chinland Defense Force(CDF) le Ralhrang hna cu Ramthlo le Dokṭhek karlak ah faak ngai in an i kap, tiah theih a si.

Dokṭhek khua Baptist Biakinn Canphio cih zong hriamngan nih a khen, tiah theih a si i inn zeizat a kangh ti cu hngalh a si rih lo. Cheukhat nih Dokṭhek khua cu an khua ning in Ralhrang nih an khangh i, CNA/CDF 2 an nunnak a liam tiah an chim (thawngfiang hngah lio a si).

Ralhrang Nih Dokṭhek khua an khangh lio!

Falam in ralhrang an rak ra ti an theih in Ṭaal, Tlangzar, Ramthlo le Dokṭhek khua mi hna cu a himnak hmun ah an zaam cang, tiah theih a si. Nihin Ramthlo le Dokṭhek kar i kahdohnak a chuah caah Chunchung khua mi zong an zaam hna, tiah theih a si. Credit: The Chin Post

Ayeyawady ramṭhen, Pathein palek sakhan ah tlaih a tong mi minung 6 nak tlawm lo an zaam, tiah palek he aa naihniam mi pakhat sin in theih a si. Nihin March 1 zinglei Sml 1 hrawng ah an zaam, tiah theih a si i, a zaam mi chung ah hin mithattu pakhat aa tel, tiah a chim. “An zaamnak kong hi aho hmanh theih lo ding in thawng an thuh caah zingka i ralkap motor tampi an phanh hnu ah kan hal hna i cuhnu ceo lawng ah kan theih. CCTV zong a um ko nain zeitin an zaam hi theih a si lo,” tiah palek he aa naihniam mi pakhat nih a chim.

“Nihin March 1, zinglei ah Pathein palek sakhan chung ah palek pawl anmah le mah an i vel i palek cheukhat an tap zei ruangah si cu fiang in theih a si lo. Thong cawng palek zong an tlaih. Thong tla an zaam ah cun rianngeitu (a cawng tu) palek hi phung ning in tlaih khawh a si. Thong ukbawi zong a rank in ṭhumh a tong kho,” tiah a chim. Pathein palek sakhan hi Maha Bandula(မဟာဗန္ဓုလ) lam, Ayeyawady palek sakhan he hmaitonh in an um i a pawngkam cu thir-hri in an kham dih, tiah Pathein khua mi pakhat nih a chim.

Demoso Peng, Kyundaw Khua Kahdohnak Ah Ralhrang 24 An Thi: Kaya( Kanrenni) ramkulh, Demosoe peng Kyundaw khua kahdohnak ah Ralhrang 24 an thi i raldohnak tank pakhat a rawk, tiah NUG Defense Ministry nih a thanh. Nihin March 1 chunhnu sml 2:00 hrawng ah Kyundaw khua ah hmunkhuar mi SAC ralhrang 400 hrawng cu Karenni ralkap phu fonh nih an va kah hna, tiah theih a si. “Raltuknak tank pakhat ka mithmuh bak ah a kang, SAC ralhrang pawl hi a thlithul deuh in kan kah hna, aruang cu zenkuan kan ngei lo, Zenkuan tam deuh ngei usihlaw cu atu nak tam deuh an thi ko hnga,” tiah Karenni Defense Force in ṭuanvongeitu pakhat nih a chim.

Nihjn suimilam 3 chung kahdohnak ah Karenni ralkap phufonh in minung pahnih an ban ah kuan nih a hnur hna, tiah a chim chih. March 1, Kyundaw khua kahdohnak hi Karenni National Defense Force( KNDF), Karenni Army( KA) Generation Z 21, Demosoe PDF , Loikaw PDF le Karreni Defense Force (KDF) hna fonh in kahmi a si. February 16 in Karreni ramkulh chung ah ke in rallam a sialmi SAC ralhrang pawl cu kahdohnak i an sungh peng caah nitin in vanlawng in an bawmh hna. Cucaah hriamnam ṭha deuh an ngeih khawhnak ding ah ramchung ramleng Myanmar mizapi nih bawmchan cio ding in KNDF nih nawlnak tuah. Credit: The Chin Post

Sagaing ramṭhen, Kalaymyo peng; Kalay-Gangaw lamkam Thanphoe khua nitlaklei ralzam camp ah ai dormi hna cu anmah inn cio ah tlung ding in le ni 4 a rauh i khua nan tlun lo ahcun PDF Tapung nan si kan ti lai i kan in thah dih hna lai, tiah SAC ralhrang nih an hro hna. Hi ralzaam camp hi SAC ralhrang nih hriamngan in voi tampi an kah cang i February 24 ah ralzaam buk an khangh.

Febuary 23 zaanlei zong ah Thanphoe khua inn 2 le facang rialnak seh pakhat an rak khangh bal. “Yanaung Gyi khua ah inn 12 le Thanphoe khua ah inn 2 le Sanseh pakhat SAC ralhrang nih an khangh i sanseh cu ralhrang pawl an kal hnu ah kan hmih khawh ṭhan. Cun, ralzam camp ah ummi Handa generator 2 le Saikel 18 an kan khanghpiak,” tiah Thanphoe Ralzam camp ṭuanvongeitu pakhat nih a chim.

2021 December thla ah SAC ralhrang nih Thanphoe khua inn khat an rak khangh hnu in khua mi hna nih Thanphoe khua in meng 4 hrawng a va hlatnak Laitlang( Chin Ttaung) hram ah buk an i sak. Riahcaw le eidin an i khon cia i Thanphoe Ralzaam camp ti in min an sak i an i dor hna. “Khuachung ah SAC ralhrang nih hriamngan an kah peng caah ahohmanh kan um ngam lo, Khuachung um mi thilri ṭha deuh poh an laak.

Cucaah ralzaam camp ah kan i dor, atu zong kan buk an kan duahpiak pin ah kan i khon mi riahcaw zong mawṭaw 2 in voi hnih an vun laak,” tiah Thanphoe ralzam camp ummi pakhat nih a chim. Atu ahcun Thanphoe khua mi tam deuh cu Kalaymyo lei ah an zaam hna i mitlawmte lawng camp ah an taang cang, Thanphoe khua le Yanaung gyi khua hi ai peh mi an si i inn 800 hrawng a um. Credit: The Chin Post