Nihin March 18; Kayin, Monywa Le Myiang Kahdohnak Ah Mipi Ralkap Nih SAC Ralkap 5 An Thah Hna
Kayin, Monywa le Myiang peng hna ah SAC ralkap hna cu Bomb, kutser bomb le kutser hriam hna in an kahdoh hna caah SAC ralkap 5 an thi i, 2 hliam an tuar, tiah Mizapi vengtu ralkap hna sin in theih a si.
Kayin ramkulh, Phayar tongsu khuapi ah nihin March 18 zinglei Sml 6 : 20 hrawng ah No-4 veng le No-3 veng ah bomb an puak i, zing Sml 7:15 hrawng zong ah bomb pakhat a puak ṭhan, tiah vengchung um mi hna sin in theih a si. No-4 veng bomb puahnak cu SAC ralkap phu hna nih an rak chek i zing Sml 7:25 hrawng ah bomb dang pakhat a puak ṭhan i SAC ralkap 2 a hmun ah an thi colh; midang pakhat siizung a phanh hnu ah a thi ṭhan.
Bomb a puah lio ah SAC ralkap nih an duhnak poh an kah caah civil mi 2 hliam an tuar, tiah Phayar Tongsu No-4 veng mi sin in theih a si. Cu kahdohnak cu zei bantuk phu nih dah an tuah, ti fiang in theih a si lo. Mizapi cu SAC ralkap hna le anmah he aa kom mi minung pohpoh naih ah um lo ding in Phayar Tongso mizapi vengtu ralkap hna nih ralrin an pek hna.
Nizaan March 18 ah Kalay peng, Hmandaw khuapawng ah SAC ralkap le Mipi ralkap an i kahnak ah CDF KKG in ralkap pakhat a nunnak liam, tiah theih a si. Nizaan March 18 , Kalay thlanglei Cianta khua ah umhmun khuar mi SAC ralkap pawl cu Hmandaw khua lei ah rallam sial in an rat lio ah CDF-KKG Battalion -4 , PDF – Kalay, RKDF le PDF ralkap phu fonh hna nih Hmandaw khua pawng kan kah hna.
Kaphnih kahdohnak cu zaanlei sml 3:00 in 4:40 tiang suimilam 1:30 chung kan i kap i, kaphnih in hriamngan le hriamhme he kan hman, Kahdohnak ah kan ralkap pakhat nih ram le miphun caah a nunnak a pek, Pakhat nih hliamhma faak tuk lo a tuar, SAC ralkap lei in thi le hliam tuar kong theih a si rih lo, tiah Chinland Defense Force Kalay Kabaw Gangaw( CDF- KKG) nih a thanh.
Myanmar Ram Pumpi In March 18, 2022 Nikhat Chung Ah SAC Ralkap 25 An Thi: Myanmar ram pumpi in dohthlennak tuah hnu March 18, 2022 nikhat chung kahdohnak ah SAC ralkap 25 an thi, tiah Yangon Khit Thit nih a thanh. Cazin ning ah ralkap a thi mi hi Taningtari ramthen Myait ah 3, Karen ramkulh Demoso ah 10, KNU bridage 5 ah 1, Karen ramkulh Payatungsu (ဘုရားသုံးဆူ) ah 3, Magwe ramṭhen, Myaing ah 2, Shwe Bo ah 4, Mandalay ramṭhen Nuahtogyi ah 2, an dihlak 25 an si. KNU bridage 5 ah 1, Magwe ramthen Yesagyo ah 1; ti in minung 2 nih CDM an tuah.
