Press "Enter" to skip to content

Nihin Matupi Le Mindat Lam Kahdohnak Ah Uico Ralkap Minung 5 Bak CDF Pasaltha Hna Nih An Thah Than Hna

Mindat-Matupi lamcung kahdohnak ah SAC ralkap 5 hrawng an thi. 2022 March 28 – Mindat-Matupi lam cungah SAC ralkap le CDF-Mindat cu March 26 ah an i kap. Cu kahdohnak ahcun, SAC ralkap 5 hrawng an thi i CDF-Mindat cu him tein an kir kho tiah CDF-Mindat nih a thanh.

March 27 ah SAC ralkap thazang 300 hrawng cu mengtung 17 pawngkam ah an i helhum len. March 27 cu Ralkap Ni a si caah zeihmanh cawlcanghnak an ngei lo tiah ralram in a rak kirmi pakhat nih a chim. Mindat peng ah tuzarh chung phone line a rawh caah ralram a ummi le a bawmtu karlak i pehtlaihnak a har deuh caah kahdohnak thawng kan theih a tlai hi a si tiah CDF-Mindat nih a thanh.

SAC ralkap thazang 70 hrawng cu mengtung 23 ah an phan cang i a hnu deuh phu pawl le mawṭaw cu meng 21-22 an phan cang tiah theih a si. Crd; The Chinland Post

2023 ah thimnak tuah ṭhan ding in timhtuahnak kan ngei tiah SAC nih a chim. The Chinland Post | 2022 March 26 – SAC nih 2023 ah tuah ding in timhtuah a simi thimnak cu Kawlram pumpi ah tuah khawh ding in kan i zuam tiah SAC in biachimnak nawl a ngeitu Major-General Zaw Min Htun nih March 24 ah a chim.

“Thimnak hi kan tuah khawhnak hmun ah kan tuah lai. Kan tuah khawh lonak hmunhma hna kan nganhtak a si ahcun Democracy le thimnak a thawtnam a tlau dih lai. Cucaah, Kawlram cozah nih a raa laimi thimnak ah Kawlram pumpi khoika hmanh nganhtak loin tuah kan i zuam”.

2010 hnu ah thimnak voithum tuah a rak si i peng 330 a ummi chungah 2010 thimnak cu peng 325, 2015 thimnak ah peng 323, 2020 thimnak ah peng 315 ah tuah khawh a rak si tiah a chim. 2010 thok in peng tlawm deuh lawngah tuah khawh a si kha hmuh a si i 2008 phunghrampi ning cun a dikmi le a tlingmi thimnak lam hman a si lai tiah a langhter caah party tling thimnak cu Kawlram pumpi khoika hmun hmanh ngan loin hman a si lai tiah Major-General Zaw Min Htun nih a chim.

Cu bantuk thimnak kan tuah khawhnak hna a hrampi a simi zalong te le tlukruannak a ummi thimnak cu Kawlram pumpi in tuah a si lai i General Election timi biafang he a tlak fawn lai tiah a chim.
Thimnak Commission chungtel U Khin Maung U nih cun, a raa laimi thimnak ah Pyithu Hluttaw cu Proportional Representation (PR), Amyotha Hluttaw cu First Past the Post (FPTP) phung hman a si lai tiah a chim.

Hramhram uktu phu nih rian a khinhmi Union Election Commission le phunglut party 90 leng ah party 59 cu a 2021 March thla Naypyidaw ah a voikhatnak an i tong hna i PR phung in thimnak tuah ding ah ceihhmainak an rak ngei. November thla chung zongah Naypyidaw ah party 53 i tong in biaruahnak an ngeih bantuk in December thla ah party 62 in Yangon khua ah biaruahnak an rak ngei ṭhan.

NLD party chungtel pakhat nih cun, 2008 phunghrampi ah Commander-in-Chief nih thimnak tuah khawhnak nawl a ngeih lo bantuk in Election Commission zong dirhnak nawl a ngeih lo caah a tu a tawlrel cuahmahmi hi phung a lut lo tiah RFA ah a chim. SAC nih thimnak tuahṭhan aa tim ko nain Kawlram pumpi in hriamtlaih le kahdohnak a chuah caah thimnak tuah khawh ding cu a fawi lai lo tiah thil ngiatlaitu pawl nih an chim.

Be First to Comment

Leave a Reply

Your email address will not be published.