Press "Enter" to skip to content

Nihin Zingah Karenni Ralkap Pakhat Nih Thil A Tonmi Cu Ngaichia Tuk A Si Ee!

Karenni ramkulh , Demosoe peng ah hmunhma thianhhliamhnak an tuah lioah KNDF ralkap pakhat cu bomb ai lamhsual ruangah a ke hnih in tanpiak a si tiah KNDF battalion 9 nih an thanh. Nihin April 22, zinglei suimilam 7:00 hrawngah KNDF battalion 9 le ttangtti hna nih hmunhma zohfelnak le thianhhliamhnak an tuah lioah bomb ai lamhsual i a tubantuk thil a can hi a si.

Bomb lamhsualnak in a ke bulmi ralkap hi mipi hna nih humhimnak an hmuhkhawhnak ding ca le SAC ralkap dohnak ah biatak tein thazaang a chuahtu a si tiah KNDF nih an thanh. Karenni ramkulh kahdoh a chuahnak hmunhma Loikaw, Demosoe, Pharusu, Mubae le Phaekhung khua lampi ah SAC ralkap nih phummi bomb tampi an hmanh tiah theih a si. Cucaah mipi hna nih umkal tikah ralring tein umkal dingah KNDF nih theihternak an langhter.

Relchap; Sagaing ramtthen , Monywa peng Kyauksitpung(ကျောက်စစ်ပုံ) khua lam ah SAC motor bomb an puahhnawh i 10 anthi tiah theih asi. SAC motor cu April 22 zing Sml 7:20 ah padeta bomb in puahhnawh an si i cycle in a ra lio mi mipi 2 an i hliam chih sual caah kan lung tha lo tiah mipi veng tu ralkap phu nih an chim. SAC motor bomb puah hnawhnak hi Monywa pengkomh batallion (2) Chindwin Attack Force in tat-khuai (4) Fight For People – FFP le tangrual phu a si mi Yin Gyi Aung phu i bawm in an tuah mi a si tiah theih a si.

Dohthlennak a tuah tu phu hna nih a tu le tu te ralrin peknak ca an thanh ban tuk in mipi hna zong nih zulh piak ding le SAC ralkap he aa hlatnak ah um ding in nawl an cahthanh ah an langhter. A luancia 2021 December 28 zong ah khan Kyauksitpungbatallion in captain Myo Myint Aung nupi Non-CDM Admistration zung ah rian tuan mi Daw Ei Phyo Su(ဒေါ်အိဖြိုးစု) zong Batallion (2) Chindwin Attack Force special operation phu le comando phu nih an rak fimtawl bal cang. Crd; The Chin Post

RELCHAP; Sagaing ramtthen , Myaung pengchung ah sianginn 22 an on cang i, sianghngakchia 3500 leng sianginn an kai kho tiah theih asi. Myaung pengchung ah education network dirh a si i, kumhnih tluk ca he a hlat cangmi sianghngakchia hna ca cawnnak cu a thar in domhpiak dingah a tu bantuk in sianginn onnak kan tuah hi a si tiah Myaung education network in tuanvo ngeitu pakhat nih a chim.

Myaung Education Network ah cun cawnnak lei kong ah tuanvo latu hna, tawlrel tu hna, phaisa kawlnak lei tuanvo latu hna, tualchung mi hna le Myaung tualchung hriamtlai phu hna an i tel. Myaung peng chung khua 80 lengchung ah khua 22 in sianginn 22 on a si cang tiah, Myaung education network nih April 21 ni ah phungning tein an thanh.

Sianginn onnak tuahmi 22 chungah primary school 4, middle school 6 le high school 12 an si. Sianginn 22 chungin sianghngakchia 3500 leng cu CDM tuahmi ca chimtu hna le volunteer in ca chimtu tiin, an dihlak ah ca chimtu 300 leng an si. NUG cozah nih caan karlak suaisam ning in cawnpiak an si i, a lenglei ca hna zong telhchih in cawnpiak an si.

Relchap; Russia nih Ukraine lak timh in thazaang tampi he thlahnih chung a tuk hnu ah, tuzarh cawn nithum ni ah khan nuclear-capable Intercontinental ballistic missile thar cu thlawhtling tein hneksaknak/zohchunhnak a ngei. Russia President Vladimir Putin nih cun tutan missile zohchunhnak an tuah mi cu vawleicung missile vialte lak ah a ṭha bik mi a si i, kan ral hna ca ah ruahnak lungput thar serpiak kho ding in hmual a ngei, tiah a chim.

Kum saupi tawlrel a si hnu ah, Sarmat Missile cu a voikhatnak ding ca ah Russia nitlak thlanglei Plesetsk timi hmun in an kahchuah i, missile kahnak in km 6000 hrawng a hlatnak hmun Kamchatka peninsula i, a hmuitinhnak hmun cu a khen. Kum caan saupi sersiam a si mi missile zohchunh a si ruang ah nitlaklei ram hna cu an khuaruah a har lo nain,

Europe le nitlaklei ram hna politics boruak a linhsat lio theng te i missile hnehsak/zohchunh a si cu an khuaruah har kong an chim. Russia nih cun February 24 khan ralkap thazaang tampi he Ukraine cu a rak luhhnawh cang nain nihin ni tiang a duh ning in a cawlcang kho rih lo. “Kan missile thar hi thiamnak sang pi in thuamh mi a si i, vawleicung missile kahnak(anti-missile) ṭha bikbik zong nih an kham khawh lo ding in ser mi a si.

Hi nakin vawleicung ah missile ṭha mi a um lo i, caan saupi cu a um fawn lai lo,” tiah Russia President Vladimir Putin nih a chim. Ukraine lakah ral thawhpitu Putin nih cun Europe le nitlak le ram hna cu an i ngaihchih khawhnak ding biachahnak tuah lo ding in a hro hna i, a nuclear missile pawl zong kahchuah khawh ding in ralrin a pek dih cang.

UN Secretary General Antonio Gutteres nih cun, “Cuhlan ah cun nuclear ral a tho kho ding ah rak ruah a si lo nain atu ah cun zeithil poh a cang kho mi a si cang,” tiah kan hnu March thla ah khan a chim. Russia defence ministry nih cun tuzarh cawn nithum ni ah Samrat(missile min) an zohchunh khawh cang kong an thanh i, an nuclear ralthuam hna zohchunhnak a ngeih dih hnu in ramdang sin ah zuar khawh a si lai kong Roscosmos Space Agency lutlai Dmitry Rogozin nih an chim. TCP

Be First to Comment

Leave a Reply

Your email address will not be published.