Nizan Kahdohnak Ah Ralhrang 60 Hrawng An Thi
Miahwaty-Wawlyi Kahdohnak Ah SAC Ralhrang Ralkap (61) An Thi! Kayin ramkulh Miahwaty peng chung Miahwaty le Wawlyi pehtlaihnak lampi hmun pakhat ah kahdohnak a chuak i, cuka ahcun SAC ralhrang ralkap 61 bak an thi tiah Cobra Column phu nih cathanh an chuah. March 28 ah hmunhma zohfenak an tuah lioah SAC ralhrang ralkap (61) bak an thimi cu an fehter i, seh thilri tampi le hriamnam tampi zong kan laak khawh tiah cathanh an chuahmi ahcun an langhter.
Falam ah Oxygen Plant Thar Bunh A Si Chin Relief-rehabilitation And Community Development Foundation(CRCDF) tawlrelnak in Falam ah Oxygen Plant thar pakhat bunh a si cang, tiah theih a si. Cu seh thar cu USD 6,5000 man a si i March 27, 2022 ah an bunh mi a si.
CRCDF in tuanvongeitu pakhat nih cun, “hi seh hi nikum in kan rak cah cang mi a si i.
Atu ah Yangon i kan cahnak Company pawl nih an rak kan bunh piak hi a si. Ramchung, ramleng mizapi nih Chawva thawh khawmh mi in cawk mi a si i, mizapi caah hman dingmi a si,” tiah a chim. Atu i an bunh thar mi Oxygen Plant cu nikhat ah 40 litre tlum dur 60 hrawng a rawn khawh lai, tiah an chim.
Falam khua chung le Laikua lei tiang Oxygen a herh mi pawl ca ah fawite in rawnpiak an i zuam, tiah tuanvongeitu pakhat nih cun a chim chap. Falam ah Oxygen Plant pahnih a um cang i pakhat cu mi zaw pawl an ihkhun pawng ah chiah i dawp khawh mi, Pipe line system caah an hman. Atu seh thar hi cu Oxygen dur chung i rawn ṭhannak (refill) caah hman timh a si, tiah theih a si.
