NUG Caah Thawngtha Tuk A Si, An Riantuannak Ah Cak Chin Le Tthawng Chin In An Tuan Kho Cang Lai. US Dollar 30000 An Hlut Hna
Myanmar ram kong ah bawmhchanh nak lei rian a tuantu phu a si mi ”Daejeon Metropolitan Branch of the Korea Freedom Federation’ nih April 22 ah NUG cu America dollars 30000 an hlut tiah Korea um Myanmar ram kong ah a colcangtu pakhat nih a chim. Cu phaisa cu Korea a um mi Myanmar mipi hna nih an dirh mi Myanmar Democrac & Peace he pehtlaihnak kan tuah hnu ah hlutmi a si i,
Online in pekchanhnak kan tuah tiah Myanmar Democracy &Peace i tuanvo ngeitu pakhat nih a chim. ”NUG tuanvo ngeitu hna he Zoom in meeting tuah a si lio ah phaisa cu an hlut i Myanmar ram he pehtlai in kan si khawhtawk in bawmh khawh a si ko lai ” tiah a chim.
Korea ram Daejeon khuapi ah zarhpini fatin Myanmar Democracy and peace ( မြန်မာ့ဒီမိုကရေစီနှင့် ငြိမ်းချမ်းရေးအဖွဲ့) hruainak in SAC ralkap uknak duhlonak langhter peng a si, thawhvo zong an i khawlh i Myanmar ramchung um mizapi vengtu ralkap hna caah thla fatin in bawmhnak kan pek hna tiah tuanvo ngeitu pakhat nih a chim. Crd; The Chin Post
Relchap; Ukraine Armed Forced i General Stuff chim ning ah cun Russia nih Ukraine ramri in km 60 a hlatnak ah Russia nih Iskander-M Mobile Battlefield Missile Launcher a chiah. Ukraine Armed Force nih nizan April 24 ah, “Belgorod region ah kan ral hna nih thazaang tampi an chap,” tiah an thanh. Biathli an theih ning ah Russia ralkap nih cun Ukraine ramri in km 60 a hlatnak ah Iskander Missile hi an chiah, sinain khoika zawn ah dah missile cu a um an langhter lo.
Belgorod hi Russia ram i Belgorod pengchung i ukhruainak hmun pakhat a si i, Ukraine Chaklei ah a um mi a si. Iskander hi Missile ballistic missile system a si i, NATO nih a code min(codename) ah SS-26 stone tiah a auh. Russia nih Ukraine ramri ah a chiah mi missile pahnih cu km 500 tiang a kap kho mi a si i, Nuclear ralthuam a phor kho mi a si.
#US Secretary of State Blinken le President Zelenskyy Kiev Ah An I Tong. Nizan Zarhpi ni April 24, 2022 ah Ukraine President Volodymyr Zelenskyy le US Secretary of State Antony Blinken hna cu Ukraine Khialipi Kiev ah tonnak an ngei. Blinken nih cun, “Russia nih Ukraine a tuknak ah a hlawhtling lo i, a sung. Ukraine tu nih hlawhtlinnak a hmuh deuh,” tiah a chim.
“Russia nih cun Ukraine pumpi hi laak dih a timh i, a zalonnak, anmah te i ukhruainak cu hrawh an timh nain a hlawhtling lo,” tiah Poland i media he tonnak an ngeigmh ah a chim. Hi lio ah Ukraine tlawn ah a kal ve mi US defence chief LIoyd Austin nih cun Ukraine nih Russia a tei khawh kong a chim ve. Poland i media he tonnak an ngei ve lio ṭhiam ah US Defence Chief Austin nih cun,
“Teinak hmuh kawhnak ding ah a herh hmasa bik mi cu mah le mah i bochan i, kan tei khawh lai, tiah i zumh hi a si. Cu bantuk in Ukraine nih an theih khawh lai tiah an zumh,” tiah a chim. Austin nih cun a bia a peh i, “Kan nih zong nih an tei khawh lai tiah kan zumh. Ralhriam ṭha tein kan bawmh khawh hna i, fek tein kan dirkamh hna ahcun an tei khawh hrimhrim lai,” tiah a chim chap.
Ukraine President Volodymyr Zelenskyy zong nih US ram hruaitu hna cung ah lunglawmhnak bia a chim i, a bik in President Biden cung ah aa lawmhnak a langhter. Zelenskyy nih cun, “US nih 3.4 billion bawmhnak a kan pek mi nih kan hma a kalter i, level thar ah a kan chiah, United States in bawmhnak kan hmuh mi vialte cung ah kan i lawm tuk hringhran,” tiah Blinken le Austin nih Kiev an tlawnnak ah lawmhnak bia a chimh hna.
“President Biden cung zong ah lawmhnak bia chimh ka duh, hruaitu ṭha a sinak Ukraine mizapi cung ah a langhter. American mizapi cung zong ah kan i lawm tuk hringhran,” tiah President Zelenskyy nih a chim chap. Tutan Russia le Ukraine buainak ah hin US nih Ukraine cu a thipthiar tete le a hlawm deuh zong in bawmhnak a pek i, a dihlak ah USD 3.4 billion man ralthuam le thildang in bawmhnak a pek cang. Hibantuk in US nih Ukraine bawmhnak a pek ruangah Russia cu aa lawm lo ngai i, US cu Ukraine sinah ralthuam pe ti lo ding in a theihternak a pek.
