NUG Cozah Nih Dohthlennak A Tuahmi CDM Pawl An Thlahlawh Tam Tak An Pek Hna, An Rank Zong An Kai ter Hna

Dohthlennak Ah Aa Telmi CDM Tuahtu Cozah Rianṭuan Hna Cu Thlahlawh Tampi Pek Leng Ah Rank Kaiter An Si Lai – NUG/ SAC ralkap uknak a doh i, CDM cawlcanghnak ah aa tel mi cozah rianṭuantu hna cu mipi ca ah ralṭha tein an dir ngam ti in NUG nih upat peknak cathanh a chuah. Dohthlennak a dih hnu ah CDM tuahtu cozah rianṭuan hna cu an rank kaiter an si lai tiah NUG nih nihin February 1 ah cathanh a chuah.

2021, February 1 ah SAC nih phungning lo in uknak a lak thawk in, nihin ni tiang a dikmi lam lei ah ralṭha tein a dir ngam i CDM cawlcanghnak ah aa tel mi cozah rianṭuantu hna cu dohthlennak a dih hnu ah National Honors Medal pek an si lai tiah NUG nih cun an langhter.

CDM tuahtu hna nih, uknak a lak thawk in an rak ṭuanmi rank cu nihin February 1 thawk in reng khat kaiter an si lai tiah a langhter. Cun, nica in cozah rian a rak ṭuan i CDM cawlcanghnak ah aa telmi hna zong nihin thawk in cozah rianṭuantu taktak ah fehter nan si tiah an langhter chih.

SAC ralkap nih uknak a lak thawk in hlamlomi thlahlawh vialte zong dohthlennak a dih hnu ah a bu ning in pek nan si lai, tiah NUG cozah nih cun February 1 ah cathanh a chuah. People’s Spring, The Chin Post

Relchap; Uknak Laak Hnu Ah Chin Ramchung In Inn 2100 A Rawk, Milu Hmunli Ṭhen Hmunkhat Umnak An I Thialkam – CHRO, Chin nuhrin covo a kelvengtu phu Chin Human Right Organisation(CHRO) nih an langhter ning ah, SAC ralkap nih uknak an laak hnu kumhnih chung ah Chin ramchung milu hmunli ṭhen hmunkhat cu mahle umnak hmun chuahtak in an i ṭhialkam i, inn 2100 hrawh a si tiah an langhter.

Kumhnih chung ah hin minung 421 leng nunnak a liam i, cu chung ah tualchung mi(civilian) 285 an thi. Cu lak ah cun nu 72 le ngakchia 25 an i tel. Cu pin ah tlaihkhih a tong mi 1431 an um, tiah an langhter. CHRO langhter ning ah uknak laak hnu in Chin ramchung ah inn 2100 cu a rawkral. Inn tam deuh hi SAC nih a khangh in an khangh. Innlo a rawkralmi lak ah hin Thantlang cu innlo a rawk tam biknak a si. Mipi umnak inn pinah Biakinn 50 zong an rawkral.

SAC ralkap cawlcanghnak ruangah ramchung mi tampi nih mahle umnak hmun an chuaktak i, atu dirhmun ah ramleng chuaktak in ralzam dirhmun a phan mi minung 50,000 an phan. Hi pin ah ramchung ah innlo chuaktak in aa ṭhialkam(ralhrial) mi 70,000 an um i an dihlak in Chin ramchung minung hmunli ṭhen hmunkhat cu an i ṭhialkam tiah CHRO nih an langhter.

Adang; Mindat peng Ung khua chungah SAC ralkap nih hriamngan an kah caah khuami 4 hliamhma an pu, tiah theih a si. January 31 zanlei sml 3:30 hrawngah Khah Lah Yah 274 Battalion ralkap hna nih, hriamngan duh poh in an kah caah Ung khua chung ah hriamngan kuan a tla, tiah tualchung mi pakhat nih a chim.

“Zanlei ah SAC ralkap nih hriamngan an kahmi thawng kan theih i hriamngan kuan cu Ung khua ah a tlak caah minung 4 hliamhma an pu i, motor pakhat le inn zong an rawk,” tiah The Mindat Post ah a chim.

SAC ralkap nih duh poh in hriamngan an kah caah Ung khuami kum 40 nu pakhat le kum 15-20 kar nu 3 hliamhma an pu i an hliamhma a faak ngaimi zong an um, tiah theih a si.

SAC ralkap nih January thla chungah Mindat peng ah vanlawng in voi 10 hrawng kahdohnak an tuah pinah hriamngan zong duh paoh in an thlah, tiah theih a si.
January thla chungah SAC ralkap nih Mindat peng ah hriamngan duh poh in an kah ruangah tualchung mi 9 hliamhma an pu i inn le biakinn 10 nak tlawm lo a rawh pinah motor 2 zong a rawk, tiah theih a si.