Press "Enter" to skip to content

NUG Cozah Nih Min Aung Hlaing Ralkap Mipi Sin Ttang Zat Thawngfiang An Van Langhter Cang Hih

Mipi lei ah a dir mi CDM ralkap phu chung ah a lut mi cu minung 3000 hrawng an si cang, tiah NUG cozah nih cathanh an chuah. Nawlngeihnak laak thok in April 25 tiang ah NUG Ministry of Home Affairs, Immigration; CDM People’s Police Interim Administrative Committee he pehtlai in CDM palik ralkap ah aa pe mi hi 2,937 an um i SAC ralkap hna sinah cozah rianṭuan bantuk in rian a ṭuan mi Pre-CDM palik 34 an um cang, tiah NUG Ministry of Home Affairs nih cathanh an chuah.

NUG nih hlathlainak an tuah ning ah cun CDM tuahtu palik/ralkap cu minung 6000 le 7000 karlak an si cang i, a dang pehtlaih khawh rih lo mi zong NUG lei nih pehtlaih khawh an i zuam cuahmah. Pehtlaih khawh a si rih lo mi CDM palik ralkap hna zong nih Ministry of People’s Police Interim Administrative Committee sin ah a rannak in pehtlaihnak tuah ding in NUG nih theihternak an tuah.

Mipi sin ah i dor loin SAC ralkap he i bawm in rian a ṭuan rih mi cu mipi cung ah harnak a petu an si, tiah ruah nan si lai i SAC ralkap lei a ṭang mi pohpoh cu phunghram he aa tlak ning in dantat nan si te lai, tiah fak piin ralrin peknak cathanh NUG nih a chuah. Credit: The Chin Post

Relchap; April thla chung ah SAC ralkap nih Khin U peng ah rallam an sial i khua chung thlok in mipi inn zong an khangh pin ah sualnak ngei lo mipi zong an thah hna, tiah tualchung mi hna sin in theih a si. SAC ralkap nih Sagaing ramṭhen chung peng (township) tam deuh ah March 3 zaanlei in internet line an phih i rallam an sial.

Khin U peng ah SAC ralkap nih inn an khangh ruang ah inn 775 an rawk cang i mipi 4000 leng inn ngei lo in an um cang, tiah Khin U peng thawngzamnak nih record a tuah ning in theih a si. “April 23 zing ah Khin U palik le Shwe Bo training an tuahnak sakhan in ralkap 100 tluk nih Khin U peng Ywa Thar(ရွာသာ) khua inn 62 an khangh pinah civil mi 2 zong an thah hna i, PDF sakhan an luh hnawh,” tiah Khin U peng thawngzamhnak nih a langhter.

Khin U peng ah SAC ralkap nih khua mi 156 an thah cang hna i minung 100 hrawng hliam an tuar tiah theih a si. Internet line an phih hnu in SAC ralkap khah-lah-yiah (ခလရ) 77 in thazaang 200 tluk cu Shwe Bo, Khin U, Depaeyin peng hna ah rallam an sial thluahmah, tiah theih a si. Pyotaung(ပျဉ်ထောင်), Ywa Tit(ရွာသစ်), Dan Kone(ဒါန်းကုန်း), Hmantaw(မှန်တော), Kyon Lay(ကျွန်းလယ်),

Tat Pe(သက်ပေး), Ta Moh(တမုတ်), Kalalu(ကုလားလူး), Shia Lun(ရှားလွင်), Nga Tin Gyi(ငါးတင်းကြီး), Min Win Seih Kone(မင်းဝံစိုက်ကွင်း) le Ywa Thar(ရွာသာ) khua hna ah SAC ralkap le Pyosawtee hna nih Inn an khangh ruang ah inn tampi a ciam. Pintaung, Ma Gi Tone(မကျီးတုံး) Mah Daung Hla(မဒေါင်းလှ), le Ywa Tit(ရွာသစ်) khua hna ah SAC ralkap nih umhmun an khuarnak hi khumkhat leng a si cang i cu khua hna in mipi 1500 tluk cu ralzaam dirhmun an phan, tiah Khin U peng thawngzamhnak nih a thanh.

Be First to Comment

Leave a Reply

Your email address will not be published.