NUG nih PDF pawl hi ṭha tein a tlaih hna lo ahcun nikhat khat ah hriamtlai misual ah an cang dih lai

NUG nih PDF pawl hi ṭha tein a tlaih (control) hna lo ahcun nikhat khat ah hriamtlai misual ah an cang dih lai tiah Restoration Council Of Shan State (RCSS) chairman General Yawd Serk nih Shan media pakhat he tonnak ah a chim. Hi bia a chim hi October 16, 2021 i Shan media pakhat he tonbiaruahnak ah a si nain cu video cu Feb 20, 2022 lawngah social media ah an chiah i mizapi soisel a hlawh ngaingai tiah theih a si.

Cu lawng si loin RCSS Chairman nih cun PDF pawl hi tha ka pe hna lo ti zong a chim fawn. Hi bia hi RCSS nih PDF pawl raldoh nan counter hna tiah ralhrangbu nih an timi lehnak ah a chimmi a si. General Yawd Serk nih cun RCSS nih zeitik hmanh ah PDF pawl h raldoh kan chim hna lo tiah a chim fawn.

RCSS Chairman General Yawd Serk nih cun “PDF hi tha kan pe bak lo, zeiruangah dah tha kan pek lo ti ah cun PDF pawl hi atu cu an buai rih lo, asinain hmailei nikhat khat ah cun an buai hrimhrim lai. NUG nih an control kho hna lai tiah nan zum maw? Hriamnam an ngeih hnuah ṭha tein control lo ahcun hriamtlai misual ah an cang dih lai.

An control kho fawn hna lai lo. Hriamnam timi cu ṭih a nung tuk” tiah Shan holh in a chim. NUG nih cun mizapi vengtu ralkap hna nih kahdohnak hmun ah siseh, hmundang kaadang ah siseh, ral an tlaihmi cungah siseh tuah ding le tuah lo ding zulhphung ṭha tein a serh piak hna. Atu tiangah mizapi vengtu ralkap nih zulhphung lonh in dawhcah lo thil an tuah rih lo tiah NUG upa pakhat nih cun a chim ve.

Credit: The Chin Post

Chim ramkulh, Mindat peng chung ah umhmun khuar mi ralhrang nih an rak hrawh mi Vuamtu siizung cu zatuak ah sawmkua(90%) tiang a rawk, tiah Midat – CDF in rianngeitu pakhat nih a chim. Mindat- CDF in rianngeitu Ko Yaw Mang nih, “Tutan i a ra mi ralhrang pawl nih Vuamtu siizung hi laak awk ṭha lo in an hrawh, sii-ai, ihkhun,

cabuai, thutdan, seh thilri, bizu le thilri dangdang zong an hrawh dih. Mei in an khangh mi thilri pawl cu vawlei ah an phum hna i an nehnang pawl hloh khawh an i zuam, an hrawh mi thilri pawl hi a man in tuak ahcun sing thong man leng a si,” tiah a chim.

Vuamtu siizung hi operation tuah khawhnak siizung a si caah mizaw zualhma deuh an um tik ah an chiah tawnnak hmun a si i, khuami nih an i bochan ngai mi siizung a si. Midat peng le Magwe ramṭhen, Yaw hmunhma ah ummi

Vuamtu khua pawng khua hna lei ah ralhrang thazaang 200 cu rallam an sial i February ni 14 in zarhkhat chung umhmun an rak khuar. Ralhrang nih rallam an sial lio ah CDF-Mindat nih an rak kah hna i ralhrang nih hriamngan an kah hna, khuachung inn hna zong mei in an rak khangh, tiah theih a si.

Kani Peng, Kaitaung Khua Cu Ralhrang Le Pyosawthi I Bawm in An Khangh: Sagiang ramṭhen, Kani peng, KaiTaung(အိုင်တောင်) khua cu February 20 zaan Sml 6 tluk ah ralhrang le pyosawthi i bawm in khuachung mipi inn pawl cu mei in an khangh, tiah khua mi sin in theih a si.

Ralhrang nih khua chung hmunthum ah mei an duah. Aitaung khua cu ralhrang nih umhmun an khuar caah mei thah awk ah a har tuk, tiah an chim. “Ralhrang hna cu February ni 19 ah khan Aitaung khua ah rallam an sial i Kani peng Chiang khua mi, (ချိုင်ရွာ) thluaktlamlo Ko Khiang Zaw Win(ကိုခိုင်ဇောဝင်း) kum 35 an rak thah,’” tiah khua mi pakhat nih a chim.

Atu lio cu ralhrang le pyosawthi minung thazaang 90 tluk Aitaung khua sianginn ah umhmun an khuar i khuachung zeitluk dah a rawh ti tu kan thei kho rih lo,” tiah khua mi nih an chim. The Chin Post

SAC Ralhrang Nih Unknak An Laak Hnu 386 Chungah Minung 1,566 Thah An Tong Cang: AAPP nih February 21 tiang cathanh a chuah ning ah Myanmar ramchung ralhrang phu hna nih nawlngeihnak an laak hnu ni 386 chung ah sualnak ngeilo minung 1,566 thah an tong cang, tiah theih a si.

Ralhrang tlaihkhih a tong mi dihlak hi minung 12,249 an si i tlaih ding in nawlchuah mi minung 1,973 an phan cang. Nawlngeihnak latu ralhrang phu hna nih mipi nunnak an laak mi chung ah Yangon in minung tambik nunnak a liam i, Mon ramkulh chungin minung 12 an nunnak a liam ve. Tlaihkhih a tong mi minung 400 luan an si i, chung chung ah cun minung 200 nih luatnak an hmuh, tiah theih a si.