Press "Enter" to skip to content

NUG Nih SAC Ralhrang Thizat An Langhter Cang

Myanmar ramchung huap in dohthlennak a ṭhawn chin lengmang caah thlakhat chung ah SAC ralkap 2095 an thi, tiah National Unity Government (NUG) nih a thanh. NUG Cozah nih a thanh ning ah cun February 7 in March 6 tiang ah SAC ralkap 2095 an thi i 637 hliam an tuar, tiah a thanh i Mipi lei ah ralṭha tein a dir i CDM tuahtu ralkap zong an karh tuk, tiah an thanh chih.

NUG thanh ning in ramṭhen le State huap in kahdohnak a chuahnak tambiknak hmun hna cu Karen State ah voi 227, Sagaing ramṭhen ah voi 112, Mandalay ramṭhen ah voi 37 le Karenni (Kaya) State ah voi 27 kahdohnak a chuak, tiah a thanh. Credit: The Chin Post

Tedim le Tonzang Peng Ah Zogam Army nih Sa-kah le Thing-ah an Khap! Chinland Tedim le Tonzang peng ah nizan March 7 ni thok in 2033 March 7 tiang kum 10 chung mizapi ca ah Thing-ah le Sa-kah khapnak Zogam Army nih nihin March 8 ah cathanh an chuah.

Tualchung mi hna nih inn, Biakinn, Sianginn, Ngandamnak inn saknak tibantuk ah nan herh a si ahcun Zogam Army nawlpeknak lawng in nan tuah lai. Saram nan kah, thing nan ah le Tizu-ngacel nan tlaih kan in hmuh hna ahcun nan meithal le nan thilri kan in chuh hna lai, tiah an cathanh chung ah cun an langhter.

Ramchung ral ruangah harnak phunkip a tong mi Myanmar mipi hna i nan intuarnak vialte kan in hrawmpi hna i ralzam hna nih nan harnak vialte ah hmaikhahlo um lo tein nan kan chimh lai i, nanmah bawmh ding ah timhcia peng kan si tiah ”Central Young Mizo Association (CYMA) President Pu. R. Lalngheta nih a chim.

“Mizo mipi vialte nih nan intuarnak vialte nanmah tluk tein kan in tuarpi ve hna, nan inn le nan lo chuahtak in kanram (Mizoram) ah harsa ngai dirhmun in khua nan sak tikah ka lung ṭha lo, nan harnak vialte kan in theihthiam dih hna. Nan harnak poh ah hmaikhahlonak um lo tein rak kan chim u law, Central YMA nih kan sikhawh tawk, kan khap tawp in bawmh khawh kan in zuam hna lai, hnu kan in chit bak hna lai lo,” tiah Central YMA President nih cun Nizaan March 7 Hangzo Natural Park hmun ah Mizoram ummi Zo Friendship International nih tuah mi, Mizoram ah ai dormi ralzaam hna hnemhnak (Raltlan Thlahual) programe ah a chim.

Central YMA nih Mizoram chung um mi ralzam camp pohpoh pal dih kan i tim nain Covid-19 rai ruangah kan chuak kho rih lo. March 11 le 12 ahkhin Aizawl le a pawngkam lamnai deuh ummi camp hna ah kal kan i tim a chim chih. Nizaan, March 7 ah tuah mi Program ah cun Kalaymyo peng in MP Pi Siami zong nih ralzam a zohkhenhtu hna Mizo mipi cung ah lunglawmhnak bia a chim i, ramri nih an kan dan ruang ah ramhnih ah i ṭhen hmanh usihlaw Chin’ timi unau kan sinak thisa ahcun ramri a um lo, tiah a chim ve.

“Mizoram ah a rak i dormi ralzam hna lumsa tuk in innka a kan onhtu Mizoram mipi, Mizoram Cozah le ralzam caah India Cozah sin tiang ah bawmh a kan hal piaktu MP, MLA hna le a lamkip in bawmhnak a kan petu NGO hna nan dihlak cung ah Myanmar ram aiawh in kan i lawm tuk, tiah chim ka duh, Ramri ruang ah ramhnih ah i ṭhen in ramri nih kan dang hmanh sehlaw ‘Chin’ timi unau in thisen tlai kan sinak cu a kham kho lo i ramri a ngeilo, Myanmar ram a hmunh chung poh cu Mizoram mipi nan thil tuahmi kan philh lailo,” tiah Pi Siammi nih cun a chim.

Mizoram Rural Bamk(MRB) Chairman Shri. Jaya Chandra zong nih khualian in a telpi hna i ralzam hna caah Rupee sing 10 a bawmh hna, tiah theih a si. Chin State Chief Minister hlun Pu Lianluai tel in MP 21 nih an telpi hna i Hlasakthiam Benjamin Sum, Iang Len Sung, Biak Hlei Par, Vanlalsailoa, Zomuanpuii, Joseph Fanai, PC Lalnunpuii, Rebecca Zorintluangi, Mathlenga le LRa, Lalthazuala hna nih an telpi hna. Young Mizo Association (YMA) hi Mizoram chung ah cun Cozah silomi Bu vialte lakah a ngan bik mi bu pakhat a si. Credit: The Chin Post

Be First to Comment

Leave a Reply

Your email address will not be published.