Press "Enter" to skip to content

NUG Nih SAC Ralkap Le Pyusawtee Hna Sinah Forhfialnak A Tuah Ko Cang Hih

Pyusawtee le SAC ralkap nih a hman mi hriamtlai pawl cu NUG nih, SAC ralkap kuttang sinak chuahtak ding in ralrin a pek hna. Cun PDF he i fonh ding zong nihin April 27 ah a forh hna. PDF sin ah rak i fonh ulaw nan himnak kong ah ṭuanvo ka lak lai, tiah NUG nih a kamh hna. SAC ralkap nih Pyusawtee cu training an pek hna i PDF he kahdohnak a chuah tik zong ah hmunkhat ah an ṭangṭi tiah theih a si.

“Sagaing ramṭhen, khuate cheukhat ah cun training kan pe ko u, tiah an kan ti caah training kan pek hna i bu zong kan serpiak hna,” tiah SAC ralkap chimphuannak nawlngeitu Zaw Min Thun nih a chim. SAC ralkap nih mizapi inn le lo mei in an khangh, an ngeih mi thilri an firpiak chap hna pinah an thah hna. Hi sualnak an tuah mi vialte hi record kan tuah dih, tiah NUG Ministry Of Defense nih a langhter.

SAC nih uknak an lak kumkhat leng hnu ah SAC ralkap le anmah lei ṭang hriamtlai hna nih mizapi inn an khangh mi hi inn 9187 a si cang i, cu chung ah Sagaing ramṭhen in inn 5617 a kaang, tiah Data for Myanmar nih April 14 ah cathanh a rak chuah. Credit; The Chin Post

Relchap; UN General Antonio Guterres cu Russia ah a tlawng i, Ukraine tukdohnak ngol cang ding in Moscow khuapi ah Russia President Vladimir Putin cu a va nawl. Atu tan hi UN General Secretary nih Russia a tlawn voikhatnak a si i, President Putin nih cun Mariupol thawngpang kong a rak ceihpi lengah Ukraine he biaruahnak an ngeih mi nih theipar ṭha a chuahpi ṭheo lai, ruahchannak kan ngei, tiah a chim.

Putin nih cun, “Mariupol i steel factory pakhat ah a taang mi Ukraine ralkap hna cu Russia ralkap nih an kah hna, tiah thawngpang a thang mi cu bia dik lo a si i, factory chung ah civil mi an um ve a si ahcun Ukraine ralkap hna nih an duhnak lei panh ding in an chuahter hna awk a si,” tiah a ruahnak cu UN General Secretary sinah a chim.

UN General Antonio Guterres nih cun,”Hi buainak daihter ding hin Ukraine le Russia ralkap hna he lungrual in rianṭuanṭi a hau i, Factory chung um civil mi hna lakchuah cu a biapi ngai mi rian a si. Russia nih cun civil mi hruaichuah mi a um lo kong le an lam ding i nan timhtuah cia mi cu hman a si lo, tiah nan thanh caah lamthar kan kawlpiak hna a hau,” tiah Putin cu Mariupol um civil mi hna chuahter a herhnak kong a chim ve.

Be First to Comment

Leave a Reply

Your email address will not be published.