NUG Nih Thawngtha Tuk An Thanh Than Ee!
Dohthlennak tuah a si hnu April 4, 2022 nikhat chung lawng ah SAC ralkap 53 an thi, hliamtuar mi 26 an um tiah NUG nih a thanh. Nizan April 4, nikhat chung lawng ah Magwe ramṭhen le Yangon ramthen ah kahdohnak voikhat veve, Mandalay ramṭhen ah voi 2, Sagaing ramṭhen ah voi 8 ti in kahdohnak a chuak, tiah NUG nih cun an thanh. A luancia February 7, 2022 in March 6, 2022 tiang ah SAC ralkap 2095 an thi, tiah NUG nih an langhter.
Chin ramkulh, Matupi peng Rezua(ရေဇွာ) khuachung Myomah sang ah a um mi primary sianginn chung ah April 2, zaanlei suimilam 4:40 hrawng ah bomb a puak i, Pastor 2 nih hliamhma an tuar, tiah theih a si.
Cu bomb a puak mi cu SAC ralkap hna nih an hmanh mi a si i, bomb puahnak ah hliam a tuar mi hna cu U Romeo (kum-37) le U Ting Za Lian (kum-43) an si. Sianginn le a chung thilri a rawkral mi cu a um lo, tiah theih a si.
“Nai hrawng ah Matupi lei in SAC ralkap bawmtu ding ah thlah mi SAC ralkap hna cu khuachung primary sianginn chung ah umhmun an khuar i, kandoh an ton lai an phan caah bomb an hmanh i, cuka hmun cu an kaltak. Rezua(ရေဇွာ) Mizapi ralkap nih sianginn i bomb hmanh a si thawng cu an theih caah cuka hmun pawng hrawng ah umkal lo ding in nawl an chuah. Pastor pahnih hna nih Rovaw khua an kal pah ah sianginn cu an va zoh pah i,
culio ah cun bomb cu an i lamhsual. Pastor pakhat cu a kee hrapkhat lei tanpiak a si, tiah theih a si,” ti in Myomah sang um mi pakhat nih a chim. Rezua (ရေဇွာ) ah SAC ralkap hna le mizapi vengtu ralkap CDF-Zotung phufonh kahdohnak a chuah hnu in khuachung um mizapi cu Mizoram lei ah an zaam hna, tiah theih a si.
Monywa-Yagyi-Kalaywah Motor Lampi Bomb Puak Ah Minung 6 An Thi: Sagaing ramṭhen, Kalaywah peng Sakhangyi(စခန်းကြီး) khua thlanglei Monywa-Yagyi(ယာကြီး)-Kalaywah motor lampi ah nihin April 5 chunhnu ah bomb a puak i, bomb ci nih private motor pakhat cu a khen caah motor aa cit mi minung 6 an thi, tiah Sakhangyi (စခန်းကြီး) khua mi nih an chim.
“Nihin chunhnu suimilam 1:00 hrawng ah Sakhangyi(စခန်းကြီး) khua thlanglei menghnih tluk aa hlatnak hmunhma ah bomb a puak i, Private motor Honda Fit a rang mi cu bomb nih voi 2 tiang a khen caah motor chung um mi 6 an dihlak in an thi,” tiah Sakhangyi (စခန်းကြီး) khua mi pakhat nih cun a chim. Bomb aa tonsual mi motor cu Minkin peng in Kalaymyo lei ah thilcaw ding in a kal mi a si tiah, a thi mi hna he naihniam in a um mi pakhat sin in theih a si. The Chin Post
